2 Reinan 24
24
1Durante reinado di Yoyakim, Nebukadnèsar, rei di Babilonia, a sali bai bringa kontra Huda.#Yeremías 25:1-38; Daniel 1:1-2 Yoyakim a someté su mes n'e, ma despues di tres aña, el a rebeldiá. 2SEÑOR a manda trupa di sòldá kaldeo, arameo, moabita i amonita i a perkurá pa nan destruí Huda, manera El a anunsiá pa boka di su sirbidónan, e profetanan. 3Esaki a sosodé ku Huda pasobra SEÑOR a disidí di rechasá nan pa motibu di tur e pikánan ku Manase a hasi. 4Manase no solamente a kometé mashá hopi piká, pero tambe el a mata asina tantu hende inosente ku Herusalèm tabata choria sanger. SEÑOR no ker a pordoná esei.
5Sobrá historia di Yoyakim i tur loke el a hasi ta skibí den buki di krónika di reinan di Huda. 6Yoyakim a bai sosegá i su yu Yoyakin a siguié komo rei. 7Den e tempu ei, rei di Egipto no tabata sali mas for di su pais, pasobra rei di Babilonia a konkistá tur e teritorio ku tabata kai bou di rei di Egipto, for di Roi di Egipto te na riu Eufrat.
Yoyakin, rei di Huda
8Yoyakin tabatin diesocho aña dia el a bira rei. El a goberná tres luna na Herusalèm. Su mama tabata Nehushta, yu di Elnatan; Elnatan a bini for di Herusalèm. 9Yoyakin tabata hasi loke ta malu den bista di SEÑOR, meskos ku su tata. 10Den e tempu ei komandantenan di Nebukadnèsar, rei di Babilonia a sali kontra Herusalèm i a rondoná e siudat. 11Durante e sitia Nebukadnèsar mes a bini Herusalèm. 12E ora ei Yoyakin, rei di Huda, kompañá pa su mama, su ofisialnan, su òfisirnan i su funshonarionan di korte, a sali for di porta di siudat pa entregá nan mes na rei di Babilonia ku a kohe nan prezu. Esaki a sosodé den e di ocho aña di reinado di Nebukadnèsar.#Yeremías 22:24-30; 24:1-10; 29:1-2 13Rei Nebukadnèsar a bai ku tur tesoro for di tèmpel di SEÑOR i for di palasio real. El a kita tur oro for di e artíkulonan ku Salomon, rei di Israel, a traha pa tèmpel di SEÑOR, manera SEÑOR a anunsiá. 14Nebukadnèsar a deportá tur hende for di Herusalèm: tur òfisir i tur hende importante, na tur 10.000. Tambe tur e hòmbernan di fishi, spesialmente e smetnan. Ningun hende no a keda atras, ku no ta esnan mas pober di e pais. 15Nebukadnèsar a deportá tambe Yoyakin ku su mama, su kasánan, su funshonarionan di korte i tur lider di e pais. El a hiba nan Babilonia.#Ezekiel 17:12 16Tur hende importante, na tur 7000, tur smet i otro hòmber di fishi, na tur 1000, ke men tur e hòmbernan ku por a bringa den guera, rei Nebukadnèsar a hiba Babilonia. 17Despues rei di Babilonia a hasi Matanías rei na lugá di Yoyakin. Matanías tabata tio di Yoyakin. Rei di Babilonia a kambia nòmber di Matanías pa Sedekías.#Yeremías 37:1; Ezekiel 17:13
Sedekías, rei di Huda
(2 Krónikanan 36:11-16; Yeremías 52:1-3)
18Sedekías tabatin bintiun aña, dia el a bira rei.#Yeremías 27:1-22; 28:1-17 El a goberná diesun aña na Herusalèm. Su mama tabata yama Hamutal, yu di Yirmeya, i e tabata di Libna. 19Sedekías tabata hasi loke ta malu den bista di SEÑOR, meskos ku Yoyakim. 20P'esei SEÑOR tabata asina rabiá ku Herusalèm i Huda ku El a disidí di rechasá nan.
Kaida di Herusalèm
(Yeremías 39:1-7; 52:3-11)
Sedekías a lanta despues kontra rei di Babilonia.#Ezekiel 17:15
Currently Selected:
2 Reinan 24: BPK13
Highlight
Copy
Compare
Share
Want to have your highlights saved across all your devices? Sign up or sign in
Papiamentu Bible with DC © Bible Society in Netherlands Antilles and Aruba, 2012, 2013
