1 Samuel 20
20
Yonatan ta yuda David
1David a hui for di kas di e profetanan na Rama. El a yega serka Yonatan i bisa: ‘Kiko mi a hasi, di kiko nan ta kulpa mi, ki krímen mi a kometé kontra bo tata, ku e ta buska mi pa mata?’
2Yonatan a kontestá: ‘Dios mester libra ku e ta buska bo pa mata! Mi tata no ta hasi apsolutamente nada sin bisa mi. Pakiko mi tata lo skonde e asuntu akí pa mi? Dios mester libra!’
3Pero David a insistí: ‘Bo tata sa mashá bon kuantu bo ta apresiá mi. P'esei e no ke pa bo sa su intenshon, pa bo no bira fèrdrit. Pero mi ta hura pa Dios i pa bo bida, ku mi bida ta kologá na un hilu.’
4Yonatan a puntra David: ‘Kiko bo ke mi hasi pa bo?’
5David a rospondé: ‘Bo sa ku mañan ta fiesta di Luna Nobo#Numbernan 28:11 i ku mi mester keda kome serka rei. Si bo laga mi bai, mi ta skonde den kunuku te ótromañan anochi. 6Si bo tata ripará ku mi no t'ei, bo ta bis'é ku mi a pidi bo mashá pa bo laga mi bai mi stat, Betlehèm, ya ku aya henter mi famia ta selebrá e sakrifisio anual. 7Si e bisa: “Ta bon”, esei ke men ku mi ta for di peliger; pero si e bira di malu, bo por tin sigur ku el a disidí di hasi mi daño. 8Hasi mi e fabor ei, demostrá ku bo ta un bon amigu ya ku abo a sera un pakto ku mi, bo sirbidó, dilanti di SEÑOR. Si resultá ku mi ta kulpabel, mata mi bo mes, no entregá mi den man di bo tata.’
9Pero Yonatan a rospondé: ‘No papia asina! Si mi haña sa sigur ku mi tata a disidí di kita bo for di kaminda, konta ku mi ta bisa bo.’
10David a puntra Yonatan: ‘Ken ta bin bisa mi si bo tata rospondé bo malu?’
11Yonatan a bis'é: ‘Ban den kunuku.’ Nan a kohe kaminda pa kunuku. 12Aya Yonatan a bisa David: ‘SEÑOR, Dios di Israel, ta mi testigu ku ótromañan na e mesun ora akí lo mi papia ku mi tata pa fula su boka. Si e tin bon intenshon ku bo, mi ta laga bo sa, 13pero si mi tata ke hasi bo daño, Dios kastigá mi mal kastigá, si mi no avisá bo i yuda bo hui. Mara Dios ta ku bo e ora ei, manera E tabata ku mi tata. 14Si mi keda na bida, trata mi bon manera Dios ta trata mi. Si mi muri, 15keda semper fiel na mi famia,#2 Samuel 9:1 asta ora SEÑOR bari kita tur bo enemigunan un pa un for di riba tera.’ 16Despues di esei Yonatan a sera un pakto ku famia di David ku e palabranan akí: ‘SEÑOR pidi abo i bo enemigunan kuenta i rason!’ 17Kaba Yonatan den su amor pa David a pone David hura un bia mas, pasobra e tabata stima David manera e tabata stima su mes. 18Despues Yonatan a bis'é: ‘Mañan ta fiesta di Luna Nobo, nan lo sinti bo falta ora bo lugá na mesa keda bashí. 19Warda te ótromañan, antó bo ta kana bai zùit, te na e lugá kaminda bo a skonde bia pasá, keda para na e piedra Hazael. 20Lo mi hasi manera ta riba punta di un piedra mi ta mek i tira tres flecha banda di e piedra. 21Despues mi ta manda e mucha ku ta sirbi mi bai buska nan. Si mi grit'é: “Nan ta djis banda di bo, kohe nan,” bo por sali trankil, pasobra e ora ei nada lo no pasa bo. SEÑOR ta testigu entre abo ku mi. 22Pero si mi bisa mi kriá: “E flechanan ta mas leu,” bai e ora ei, pasobra SEÑOR mes ke pa bo bai. 23SEÑOR lo husga nos, si nos no atené nos na nos palabra.’ E ora ei David a bai skonde den kunuku.
24Ora fiesta di Luna Nobo a kuminsá, rei a kai sinta na mesa. 25E tabata sintá na su lugá di kustumber, kantu di muraya. Yonatan a sinta dilanti di Saul#20:25 Yonatan a sinta dilanti di Saul: segun vershon griego; hebreo tin: Yonatan a lanta para i Abner banda di Saul, e lugá di David a keda bashí. 26E dia ei Saul no a bisa nada. El a pensa: ‘Kualke kos lo a pas'é ku e no por a bini mesa manera lei ta manda; sigur ta impuru e ta.’ 27Su manisé, e di dos dia di e fiesta di Luna Nobo, lugá di David a bolbe keda bashí. E ora ei Saul a puntra su yu Yonatan: ‘Pakiko e yu di Ishai no a bini mesa ni ayera ni awe?’
28Yonatan a kontestá: ‘David a pidi mi mashá pa mi lag'é bai Betlehèm. 29El a bisa mi: “Laga mi bai, por fabor, ta asina ku mi famia ta selebrá un sakrifisio den siudat i mi ruman hòmber a manda bisa mi: No keda sin bini. Sea asina bon di duna mi liber pa mi bishitá mi rumannan.” P'esei e no a bin kome huntu ku su mahestat.’
30E ora ei Saul a bira razu riba Yonatan i e di kuné: ‘Yugu di sarna rebelde! Mi tabata sa ku bo ta tuma parti pa e yu di Ishai ei, bo ta pone bo mes kara i barika di bo mama na bèrgwensa! 31Tanten ku e ta kana bibu riba e mundu akí, bo no ta sigur di bo bida ni di bo reino. Ban mira, manda busk'é i tres'é pa mi, pasobra e mester muri. No tin awa pa lab'é!’
32Pero Yonatan a kontestá su tata: ‘Pakiko e mester muri? Kiko el a hasi?’
33E ora ei Saul a tira su lansa riba Yonatan ku intenshon di mat'é. Yonatan a komprondé ku su tata a disidí firmemente di kita David for di kaminda. 34Furioso el a lanta for di mesa. E di dos dia di e fiesta di Luna Nobo ei e no a kome nada. A duel e ku su tata a ofendé David asina. 35Su manisé Yonatan a bai kunuku, manera el a palabrá ku David. Un mucha hòmber hóben a kompañ'é. 36Yonatan a bis'é: ‘Bo mester kore bai kohe e flechanan ku mi tira.’ E hóben a kuminsá kore i Yonatan a tira un flecha pasa riba su kabes. 37Ora e hóben a yega na e lugá kaminda e flecha a kai, Yonatan a grita su tras: ‘Hei, e flecha a kai mas leu!’
38Un bia mas Yonatan a grita: ‘Hasi lihé, kore, no keda para!’ E mucha a kohe e flecha i bini bèk serka su shon. 39E no tabata sa di nada; Yonatan ku David so tabata sa de ke se trata. 40Despues Yonatan a duna e mucha su armanan i a bis'é: ‘Bai hiba nan stat pa mi!’
41Ora e mucha hòmber a bai, David a sali for di tras di e piedra#20:41 for di tras di e piedra: segun vershon griego; hebreo tin: di parti zùit i a bùig tres bia te na suela. Nan a yora i brasa otro te ora David a logra dominá su mes. 42Yonatan a bisa David: ‘Bai na pas, pasobra e huramentu ku nos a hasi tabata den nòmber di SEÑOR, i nos a pidi pa semper E ta meimei di nos i meimei di bo desendientenan i di mi.’#20:42 20:42c—21:15 ta korespondé ku v. 21:1-16 den e teksto hebreo. Despues di esei David a bai i Yonatan a bolbe siudat.
Currently Selected:
1 Samuel 20: BPK13
Highlight
Copy
Compare
Share
Want to have your highlights saved across all your devices? Sign up or sign in
Papiamentu Bible with DC © Bible Society in Netherlands Antilles and Aruba, 2012, 2013
