1 Samuel 19
19
Saul ke mata David
1Saul a papia ku su yu hòmber Yonatan i ku tur su ofisialnan di su plan pa mata David. Pasobra Yonatan tabata stima David 2el a pone David na altura. 3El a bis'é: ‘Saul, mi tata, ta buska bo pa mata. Pues bai ku kuidou i mira pa mañan mainta bo bai skonde na un lugá sekreto. Mi ku mi tata ta bai den e kunuku kaminda bo ta skondí. Mi ta papia ku mi tata di bo i si mi haña sa algu mi ta laga bo sa kiko el a bisa.’
4Yonatan a papia na fabor di David i a bisa su tata: ‘Su mahestat no hasi malu ku bo sirbidó David, pasobra e no a hasi su mahestat nada. Al kontrario, tur loke el a hasi a kumbiní bo. 5El a pone su bida na peliger matando e filisteo, i SEÑOR a libra henter Israel. Su mahestat mes a mira i a keda mashá kontentu. Pakiko su mahestat ke kita bida di un inosente, pakiko mata David sin motibu?’ 6Saul a laga Yonatan konvens'é i el a hura: ‘Por Dios, no ta mata David.’ 7E ora ei Yonatan a yama David i a kont'é tur kos. El a hiba David bèk serka Saul i David a keda sirbi Saul manera ántes.
8Un bia mas a bini guera i David a bai bringa kontra e filisteonan; esakinan a sufri un derota asina grandi ku nan a hui pa David. 9Pero un mal spiritu mandá pa SEÑOR a poderá di Saul ora e tabata sintá den su kas ku su lansa den man. Miéntras David tabata toka p'e 10Saul a purba di klaba David na muraya ku e lansa, pero David a skein Saul i e lansa a pasa bai pega den muraya. E mes anochi ei David a hui. 11Mesora Saul a manda su hendenan kas di David pa vigil'é i mat'é su manisé.#Salmo 59 Título hebreo Pero Mikal, kasá di David, a pon'é na altura i a bis'é: ‘Si bo no hui awe nochi, bo ta morto mañan.’ 12Mikal a laga David baha di bentana i el a hui. 13Despues Mikal a kohe un imágen di e dios di kas pone den kama. El a pone un bòshi di kabei di kabritu riba kabes di e kama i a tapa e imágen ku un deken.
14Ora Saul a manda su hendenan pa kohe David prezu, Mikal a bisa nan: ‘E ta malu.’ 15Saul a bolbe manda su hendenan bai buska David i a bisa nan: ‘Maske e ta na kama, tres'é ku kama ku tur pa mi mat'é.’ 16Ora Saul su hendenan a drenta e kas, nan a haña e imágen di e dios di kas den kama ku e bòshi di kabei di kabritu na kabes di kama. 17Saul a puntra Mikal: ‘Di kon bo a gaña mi i a laga mi enemigu hui?’ Mikal a kontestá: ‘Pasobra el a bisa mi ku e ta mata mi si mi no lag'é hui.’
18Asina David a logra hui. El a bai serka Samuel na Rama i a konta Samuel tur loke Saul a hasi kuné. Despues David ku Samuel a bai kas di e profetanan i keda aya. 19Ora Saul a tende ku David tabata den kas di e profetanan na Rama 20el a manda su hendenan bai kohe David prezu. Ora nan a yega, nan a mira un grupo di profeta profetisando, ku Samuel na kabes. Diripiente spiritu di Dios a baha riba Saul su hendenan i nan tambe a profetisá. 21Ora Saul a tende kiko a pasa, el a manda un otro grupo i nan tambe a profetisá. Pa di tres bia Saul a manda hende, ku nan tambe a sosodé meskos. 22P'esei Saul mes a sali pa Rama i ora el a yega na e pos grandi ku tin na Seku, el a puntra pa Samuel i David. E hendenan a bis'é: ‘Nan ta na kas di e profetanan na Rama.’ 23Saul a kohe kaminda pa Rama i spiritu di Dios a poderá di dje tambe. Saul a bai den un estado profétiko i asina el a sigui su kaminda te ora el a yega aya. 24E tambe a kita su pañanan, e tambe tabata den un estado profétiko dilanti di Samuel. Despues el a sak den otro, i el a keda drumi sunú henter e dia i anochi ei. P'esei nan ta bisa: ‘Saul tambe ta un di e profetanan?’#1 Samuel 10:11-12
Currently Selected:
1 Samuel 19: BPK13
Highlight
Copy
Compare
Share
Want to have your highlights saved across all your devices? Sign up or sign in
Papiamentu Bible with DC © Bible Society in Netherlands Antilles and Aruba, 2012, 2013
