Ɖɛhan 66
66
1Hanjigbɛ́gán ɔ́ sín hanjiwéma mɛ wɛ han élɔ́ ɖe.
Mi mɛ e ɖo ayǐkúngban ɔ́ jí lɛ́ɛ bǐ ní kpa awǒbóbó nú Mawu.
2Mi ɖɔ xó lómílómí dó sɔ́ nyǐkɔ tɔn su dó han mɛ.
Mi kpa susu nú Mawu dó sɔ́ ɛ su.
3Mi ɖɔ n'i ɖɔ: “Mawu, nɛ̌ nǔwiwa towe lɛ́ɛ ká dó xɛsi sɔ nɛ́!
Hlɔ̌nhlɔ́n towe d'agba sɔ mɔ̌,
bɔ kɛntɔ́ towe lɛ́ɛ nɔ́ wá jɛ kpo ɖo asá towe mɛ kpó xɛsi kpó.
4Ayǐkúngban ɔ́ bǐ ɖo kɔ́ ɖe wɛ ɖo nukɔn towe,
bó ɖo han ji dó mlá we wɛ.
Ayǐkúngban ɔ́ ɖo xó lómílómí ɖɔ dó sɔ́ nyǐkɔ towe su wɛ.” Agbɔ̌n
5Mi wá kpɔ́n azɔ̌ e Mawu wa lɛ́ɛ.
Nǔjíwǔ wɛ é wa nú gbɛtɔ́ lɛ́ɛ.
6 É zé xu dó húzú ayǐkúngban xúxú,
bɔ è zɔn afɔ gbɔn xuzan ɔ́ mɛ dín,
bɔ mǐ j'awǎ ɖó nǔ ɖaxó énɛ́ e é wa é wú.
7É sɔ́ gǎnhúnǔ tɔn dó ɖu axɔ́sú,
bó ná ɖu káká sɔ́yi.
Nukún tɔn ɖo akɔta lɛ́ɛ jí.
Mɛ e nɔ fɔ́n gǔ dó jǐ tɔn lɛ́ɛ ní má yí nugo ó. Agbɔ̌n
8Togun lɛ́ɛ mi, mi dó kú nú Mawu mǐtɔn.
Mi sú xó bó kpa susu n'i.
9É wɛ ná gbɛ lǐndɔ̌n mǐtɔn;
é lɔn bónú mǐ ɖe afɔ nyi do ǎ.
10Mawu ce, a dǒ mǐ kpɔ́n.
A xo zo dó mǐ kpatágan ɖɔhun.
11A kplá mǐ yi dó ɖɔ mɛ;
a sɔ́ agban kpinkpɛn ɖó ta nú mǐ.
12A jǒ kɛntɔ́ mǐtɔn lɛ́ɛ dó bɔ yě xá sɔ́ gbɔn ta mǐtɔn jí.
Mǐ xo zo zlɛ́, bó xo tɔ zlɛ́.
A ka ɖe ɖɛ mǐ wǔyɛ́yɛ́ afɔyɛ́yɛ́,
bó ná gbɔjɛ́ mǐ.
13Mawu ce, un ná yi xwé towe gbe,
bó ná hɛn vɔ̌ e è nɔ dó zo é;
un ná ɖe akpá e un dó nú we lɛ́ɛ,
14akpá e un sɔ́ nu ce dó dó nú we,
hwenu e adǎn ɖo gbigbo mì wɛ é.
15Un ná fɔ kanlin e kló lɛ́ɛ dó sá vɔ̌ e è nɔ dó zo ɔ́ nú we;
un ná hɛn agbo kpó zǎlínkpɔ́n kpó,
un ná sɔ́ nyibú kpó gbǎgbá kpó dó sá vɔ̌ nú we. Agbɔ̌n
16Mi mɛ e ɖó sísí nú Mawu lɛ́ɛ e mi,
mi bǐ wá ɖótó bó se;
mi wá má kpi tan nú mi;
má ɖɔ nǔ e Mawu wa nú mì lɛ́ɛ nú mi ná se.
17Hwenu e un sɔ́ nu ce dó ɖo ylɔ̌ylɔ́ ɛ wɛ ɔ́ wɛ ɖɛ̌ ce kó ɖo susu kpa n'i wɛ.
18Ényí ayixa nyanya ɖé kó ɖo xo ce mɛ wɛ ɔ́,
Aklúnɔ ná yí ɖɛ ce ǎ.
19É ká yí ɖɛ ce.
É ɖótó ɖɛ e xo wɛ un ɖe ɔ́ ganjí.
20Un dó kú nú Mawu.
É dó tókúse ɖɛ e xo wɛ un ɖe lɛ́ɛ mɛ ǎ;
é ɖe xomɛnyínyɔ́ tɔn sín wǔ ce ǎ.
Togun lɛ́ɛ bǐ ní kpa we
Currently Selected:
Ɖɛhan 66: Fon13
Highlight
Copy
Compare
Share
Want to have your highlights saved across all your devices? Sign up or sign in
La Bible en langue fon © Alliance Biblique du Bénin, 2012.
