Judit 1
1
I. E GRAN REI, SEÑOR DI HENTER MUNDU
Nebukadnèsar ta ataká un reino bisiña
1Tabata den tempu ku Nebukadnèsar tabata rei di Asiria, den e siudat famoso Nínive, i ku Arfaksad tabata rei di Media na Ekbátana.
2E Arfaksad akí a kuminsá trabounan di konstrukshon. El a lanta un muraya rondó di Ekbátana; e muraya tabata 35 meter altu i 25 meter diki, trahá di blòki ku a kap for di piedra. Kada blòki tabata tres meter largu i un meter i mei hanchu. 3Pegá ku e portanan tabatin toren di sinkuenta meter altu i nan fundeshi tabata trinta meter hanchu. 4E portanan tabata 35 meter altu i binti meter hanchu, basta hanchu pa henter su ehérsito marcha pasa ku sòldánan di infanteria den formashon.
5Den e di diesdos aña di reinado di Nebukadnèsar, Nebukadnèsar a kuminsá bringa kontra rei Arfaksad den e sabana grandi den region di Ragou. 6Tur habitante di region di e serunan a djòin Nebukadnèsar, tambe tur esnan ku tabata biba na e riunan Eufrat, Tigris i Hudaspes, i tambe esnan ku tabata biba den sabana di Elam, teritorio di rei Ariok; hopi pueblo a djòin e ehérsito di e keleuditanan.#1:6 keleuditanan; probablemente ta referí na: kaldeonan, esta e pueblo di Nebukadnèsar
7Tur kaminda Nebukadnèsar a manda mensahero: el a manda nan Persia na ost, Silisia i Damasko na wèst, Libanon i Antilibanon i e regionnan na kosta, 8serka e habitantenan di Karmel i di Guilead, tambe Galilea Ariba, e sabana grandi di Esdrelòn, 9Samaria ku e siudatnan den bisindario i e teritorio na otro banda di Yordan. El a manda nan tambe Herusalèm, Batane, Kelus, Kadesh i roi di Egipto, Tafnas, Ramses, henter region di Goshen, 10asta pasa Tanis i Memfis bai, riu Nilo ariba, henter Egipto te na frontera ku Etiopia. 11Pero niun hende den tur e regionnan ei no a hasi kaso di e yamada di Nebukadnèsar, nan no tabata ni pensa mes di bai guera huntu kuné. Nan tabata konsider'é komo un hende komun, p'esei niun hende no tabatin miedu di dje. Nan a chèrchè su mensaheronan abiertamente i a kore ku nan, laga nan bai man bashí.
12E ora ei Nebukadnèsar a bira furioso riba tur e paisnan ei. El a hura pa su trono i pa su reinado ku e ta tuma vengansa riba Silisia, Damasko i Siria i kaba ku tur habitante di Moab i di Amon, tambe ku e habitantenan di Huda i di Egipto, di Laman Mediteráneo te Laman Kòrá.
13Den e di diesshete aña di su reinado Nebukadnèsar ku su ehérsito a bringa kontra rei Arfaksad, derot'é i pone henter su ehérsito, sòldánan di kabayeria ku nan garoshinan di guera ku tur, hui. 14El a okupá e siudatnan di Arfaksad, ranka sali pa Ekbátana, poderá di e torennan, sakia e plenchinan di merkado i kambia e siudat briante ei den un ruina. 15Nebukadnèsar a kohe Arfaksad prezu den serunan di Ragou, mat'é ku su lansa i pone un fin na su reino pa semper. 16Despues el a bini Nínive bèk ku henter su ehérsito, mashá hopi sòldá mes. Ei e i su ehérsito a fiesta 120 dia sin preokupá nan ku nada.
Currently Selected:
Judit 1: PBDC13
Highlight
Share
Copy
Want to have your highlights saved across all your devices? Sign up or sign in
Papiamentu Bible with DC © Bible Society in Netherlands Antilles and Aruba, 2012, 2013