Tobit 14
14
Último palabranan di Tobit
1Ku e palabranan ei Tobit a kaba su kantika di alabansa. 2Tobit a bai sosegá na pas na edat di 112 aña i nan a der'é ku tur honor na Nínive. Tempu el a bira siegu e tabatin 62 aña. Despues ku el a haña su bista bèk e tabatin un bida próspero, el a hasi obra di karidat i a sigui alabá Dios i siña otro konosé SEÑOR su grandesa. 3-4Ora e tabata serka di muri, el a yama su yu Tobias i a rekomend'é lo siguiente: ‘Mi yu, bai ku bo yunan mas pronto posibel Media, pasobra mi ta kere den e palabranan dibino ku profeta Nahum a pronunsiá kontra Nínive.#Nahum 1—3 Tur lo ta kumplí, tur lo bira realidat. Tur loke e profetanan di Israel, ku Dios a manda, a bisa, ta bai sosodé ku Asiria i Nínive. Tur nan palabranan lo keda kumplí. Tur kos lo sosodé na su debido tempu. Na Media lo tin mas seguridat ku na Asiria òf Babilonia. Mi sa, i mi ta konvensí di esei, ku tur loke Dios a bisa lo sosodé i ku niun di e palabranan ei lo no faya. I nan lo kore ku tur nos kompatriotanan ku ta biba na Israel saka nan for di nan tera i henter e pais lo ta un desierto. Nan lo hasi Samaria i Herusalèm un desierto. Tèmpel di Dios lo kima i lo ta bandoná pa un tempu. 5Pero Dios lo bolbe tene kompashon ku nan i laga nan bini e pais Israel bèk. Nan lo rekonstruí e tèmpel, ounke lo e no ta mes bunita ku ántes, te ora e momento yega. Despues tur lo bini bèk for di eksilio i rekonstruí Herusalèm ku tur su splendor i nan lo rekonstruí e tèmpel manera e profetanan di Israel a anunsiá.#Hagai 2:1-3 6I tur nashon di mundu, tur hende, lo bolbe serka Dios.#Isaías 2:3; 60:1-3; 66:18; Zakarías 8:20-23 Nan lo respet'É sinseramente i bandoná nan diosnan falsu ku ta gaña nan i pone nan kometé eror. Nan lo alabá Dios di universo korektamente. 7Tur israelita ku lo ta salbá e tempu ei lo kòrda riba Dios ku sinseridat. Nan lo bini huntu i bai Herusalèm i nan lo biba trankil den e tera di Abraham pa semper; nan lo ta su doño. I esnan ku ta stima Dios sinseramente lo ta kontentu; pero esnan ku ta kometé maldat i hasi piká, lo disparsé for di henter e pais.
8-9Awor, mi yunan, esaki mi ta rekomendá boso: Sirbi Dios ku sinseridat i hasi loke ta agrad'É. Siña boso yunan hasi loke ta hustu, tambe siña nan hasi obra di karidat. Siña nan kòrda riba Dios i alabá su nòmber tur ora sinseramente i di henter nan kurason. I abo, mi yu, bai for di Nínive, no keda aki. Dia bo mama muri i bo der'é banda di mi, bai e mesun dia, no keda ni sikiera e anochi ei den e pais akí. Pasobra mi ta ripará ku aki tin mashá maldat i ku nan ta gaña hopi aki sin sinti bèrgwensa. 10Mi yu, mira loke Nadab a hasi ku su tata di kriansa Ahiakaro: el a der'é bibu. Pero Nadab su víktima por a mira kon Dios a kastigá Nadab su echo bergonsoso. Ahiakaro a bolbe den lus i Nadab a kai den skuridat pa semper, pasobra e ker a mata Ahiakaro. Komo Ahiakaro tabata generoso den dunamentu di limosna el a sali for di e trampa mortal ku Nadab a pone p'e i Nadab mes a kai den dje i muri. 11Mira antó, mi yunan, loke obra di karidat ta trese i te na unda hasimentu di malu ta kondusí: na morto. Pero ya mi bida ta kabando…’ E ora ei nan a pon'é riba kama i el a muri. Despues nan a der'é ku tur honor.
Fin di historia di Tobias
12Dia mama di Tobias a muri, Tobias a der'é banda Tobit. E i su kasá a bai Media i bai biba na Ekbátana serka su suegu Raguel. 13Tobias a kuida su suegunan ora nan tabata bieu i a honra nan. El a dera nan na Ekbátana na Media i el a heredá tur propiedat di Raguel, meskos ku esnan di su tata Tobit. 14El a muri na edat di 117 aña, rondoná di honor. 15Promé ku su morto el a tende di destrukshon di Nínive i el a mira kon rei Xèrxès di Media a saka e habitantenan di Nínive hiba Media. E ora ei el a alabá Dios pa tur loke Dios a hasi ku e habitantenan di Nínive i Asiria. Promé ku e muri e por tabata kontentu ku destrukshon di Nínive i el a alabá SEÑOR, Dios ku ta biba pa tur siglo.
Currently Selected:
Tobit 14: PBDC13
Highlight
Share
Copy
Want to have your highlights saved across all your devices? Sign up or sign in
Papiamentu Bible with DC © Bible Society in Netherlands Antilles and Aruba, 2012, 2013