Sirag 49
49
Rei Yosías
1Nòmber di Yosías ta manera sensia aromátiko
prepará pa un trahadó di perfume eksperto;
su rekuerdo ta dushi manera miel
òf manera muzik na un bankete.#2 Reinan 22:1—23:25
2El a duna e pueblo un bon ehèmpel pa nan kombertí
i a destruí e detestabel diosnan falsu.
3El a duna Señor su kurason,
i den tempu di piká el a keda deboto.
Delaster reinan di Huda i profeta Yeremías
4Ku eksepshon di David, Ezekías i Yosías,
tur e otro reinan di Huda a hiba un mal bida
i nan a bandoná lei di Altísimo.
E ora ei fiesta a kaba pa e reinan di Huda.
5Nan a entregá nan poder na otronan
i a duna un pueblo strañero nan gloria.
6E enemigu a sende e siudat skohí,
kaminda santuario tabata, na kandela
i hasi su kayanan bashí
manera Yeremías a pronostiká.
7E pueblo a maltratá Yeremías,
esun ku for di den skochi di su mama
tabata konsagrá profeta,
pa ranka, kibra, destruí i tumba,
pero tambe pa konstruí i planta.#Yeremías 1:10
Ezekiel
8Den un vishon Ezekiel a mira Gloria di Señor,
ku Señor a mustr'é riba e garoshi di e kerubinnan.#Ezekiel 1:3-28
9Señor a laga áwaseru duru yobe riba su enemigunan.#Ezekiel 38:22
Señor a mustra bondat na esnan ku tabata kana den bon kaminda.
Profetanan menor
10Awor e diesdos profetanan!#Hoséas 1:1—Malakías 4:6
Stèk nobo spreit for di nan restunan!
Pasobra nan a kurashá pueblo di Yakob
i a salb'é pa medio di nan speransa firme.
Despues di eksilio
11Kon nos lo por kanta gloria di Zerubabel?
E tabata manera un renchi di seyo na man drechi.#Esdras 3:2; Hagai 2:23
12Meskos ku Yeshua, yu di Yosadak!#Hagai 1:1,12; 2:2; Zakarías 3:1
Ten 'i nan ten nan a traha e altá
i konstruí e tèmpel konsagrá na Señor
i destiná pa su gloria eterno.
13Den nos memoria ta biba prinsipalmente Nehemías,
ku a bolbe lanta e murayanan ku a kai,
ku den nan a pone porta ku tranka#Nehemías 2:17—6:16
i a rekonstruí nos kasnan.
Esnan mas grandi bou di hende
14Dios no a traha niun hende riba mundu meskos ku Henok,
pasobra El a kit'é for di riba mundu.#Génesis 5:24; Sirag 44:16
15Tampoko no tabatin niun hende manera Jozef,#Génesis 39—50 hefe di su rumannan,
un sosten pa su pueblo;
nan a dera su kurpa ku mashá kuidou.
16Sèm i Sèt tabata honrá bou di hendenan,#Génesis 4:25-26; 5:32
pero den kreashon, riba tur kos ku tin bida Adam ta pará.#Génesis 1:26-27; 2:7,19-20; 4:25
Currently Selected:
Sirag 49: PBDC13
Highlight
Copy
Compare
Share
Want to have your highlights saved across all your devices? Sign up or sign in
Papiamentu Bible with DC © Bible Society in Netherlands Antilles and Aruba, 2012, 2013