Salmo 96
96
SALMO 96
Ban kanta pa SEÑOR, E ta rei di universo
(1 Krónikanan 16:23-33)
1Kanta pa SEÑOR un kanto nobo,
kanta pa SEÑOR, mundu henter!
2Kanta pa SEÑOR, alsa su nòmber,
proklamá su salbashon tur dia bai.
3Konta tur pueblo di su gloria,
tur nashon di su gran maravianan,
4pasobra grandi ta SEÑOR, mashá famoso,
mas temibel ku tur otro dios.
5Tur dios di otro pueblo — falsu!
E, SEÑOR, ta Kreador di firmamentu
6Den su presensia tin gloria i mahestat,
den su tèmpel poder i splendor.
7Duna SEÑOR famia di pueblonan,
duna SEÑOR su gloria i poder.
8Duna su nòmber e gloria debí,
subi su plenchinan i trese regalo.
9Ador'É den su realse dibino,#Salmo 29:1-2
tembla p'E, henter mundu.
10Bisa pueblonan: ‘SEÑOR ta Rei!
Mundu ta duru pará, inmovibel;
lo E husga nashonnan ku hustisia.’
11Laga shelu ta kontentu, tera kanta,
laman ronka ku loke tin den dje,
12kunuku ku tur su mata hasi fiesta,
tur palu di mondi hubilá:
13pa SEÑOR, pasobra E ta bini;
E ta bini, sí, pa husga mundu.
Lo E husga mundu ku hustisia,
imparsialmente lo E husga nashonnan.
Currently Selected:
Salmo 96: PBDC13
Highlight
Copy
Compare
Share
Want to have your highlights saved across all your devices? Sign up or sign in
Papiamentu Bible with DC © Bible Society in Netherlands Antilles and Aruba, 2012, 2013
