Salmo 75
75
SALMO 75
Dios ta hues
Pa maestro di kanto. Na weis di ‘No destruí’. Salmo di Asaf.
1Nos ta alabá Bo, Dios,
sí, nos ta alabá Bo;
nos ta invoká bo nòmber
i ta konta di bo milagernan.#75:1 nos ta invoká…milagernan: segun algun vershon antiguo; hebreo tin: bo nòmber ta serka i nan ta konta di bo milagernan
2‘Na e ora ku Mi mes a stipulá
lo Mi husga di akuerdo ku hustisia.
3Tera ku tur su habitantenan por tembla:
Ami a ankra su pilánan.
4M'a bisa hende arogante: “Stòp di broma!”
i pekadó: “No kana hasi grandi.
5No kana blòf hasi grandi.
Pakiko tantu arogansia?” ’
6No ta di pariba o pabou
ni for di desierto o di serunan yudansa ta bin,
7sino Dios mes ta Esun ku lo ta hues:
lo E humiliá esun,
anto lo E alsa un otro.
8SEÑOR tin beker di furia den su man,
yen di biña ku ta skuma, bon mesklá.
Lo E basha for di dje, pa nan bebe,
tur hasidó di maldat riba mundu,
beb'é limpi limpi asta e kachikachi.#Yeremías 25:15-29; Ezekiel 23:32-34; Habakuk 2:16; Revelashon 14:10; 16:19
9Ma lo no stòp di proklam'É
i kanta salmo pa e Dios di Yakob.
10Lo mi kita tur orguyo di malbadonan,
ma bon hendenan lo kana frenta na altu!
Currently Selected:
Salmo 75: PBDC13
Highlight
Copy
Compare
Share
Want to have your highlights saved across all your devices? Sign up or sign in
Papiamentu Bible with DC © Bible Society in Netherlands Antilles and Aruba, 2012, 2013
