Salmo 51
51
SALMO 51
Mi a peka, SEÑOR, pordoná mi
Pa maestro di kanto. Un salmo di David. Despues ku profeta Natan tabata serka dje pa motibu ku el a peka ku Bat-Shèba.#2 Samuel 12:1-15
1Tene piedat di mi, o Dios, den bo bondat,
den bo inmenso kompashon kita mi falta.
2Laba mi limpi di mi kulpa
i purifiká mi di e malu ku m'a hasi.
3Pasobra mi sa ku mi a faya,
mi piká ta semper mi dilanti.
4Kontra Bo, Bo so mi a peka,
loke ta malu den bo bista mi a hasi.#Salmo 32:5
P'esei, bo sentensia ta hustu
i ireprochabel ta bo huisio.#Romanonan 3:4
5Mira, den kulpa mi a nase,
pekadó mi mama a konsebí mi.
6Ma Bo ta gusta bèrdat, te den fondo!
Pues, inkulká den mi paden sabiduria.
7Purifiká mi ku hisopo#Éksodo 12:22; Levítiko 14:51; Ezekiel 36:25; Hebreonan 9:13-14,19 i mi ta puru,
hasi mi limpi, mas blanku ku lechi.#Isaías 1:18
8Laga mi tende di fiesta i alegria
pa mi wesunan kibrá por ta kontentu.
9Kita bo bista for di mi pikánan
i mi maldatnan, kita nan tur.
10Krea den mi un kurason, Dios, ku ta limpi,
hinka un spiritu nobo i fiel den mi paden.#Ezekiel 11:19; 36:26; 2 Korintionan 5:17
11No tira mi leu di bo Kara,
no kita bo spiritu santu fo'i mi.
12Salba mi! Debolbé mi mi alegria,
laga un spiritu generoso ta mi forsa.
13Lo mi mustra malechornan bo kaminda
i pekadónan lo bolbe serka Bo.
14Manchá di sanger mi ta — Dios, libra mi,
(o Dios, Abo, mi Salbador)
anto mi lenga lo gaba bo hustisia.
15Señor, habri mi lepnan
i mi boka lo kanta bo alabansa.
16Pasobra Bo n' ta gusta sakrifisio;
si m'a kima un bestia pa Bo,
lo e no a kai na bo agrado.#Salmonan 40:6; 50:8-14
17Mi sakrifisio na Dios: mi kontrishon!
Un kurason kibrá i arepentí,
o Dios, Bo no ta despresiá.#Salmo 34:18
18Den bo kariño hasi bon na Sion,
bolbe lanta murayanan di Herusalèm.
19Lo bo gosa sakrifisionan legítimo,
ofrendanan kimá henteramente;
i nan lo trese toronan yòn
pa ofresé nan riba bo altá.
Currently Selected:
Salmo 51: PBDC13
Highlight
Copy
Compare
Share
Want to have your highlights saved across all your devices? Sign up or sign in
Papiamentu Bible with DC © Bible Society in Netherlands Antilles and Aruba, 2012, 2013
