Mateo 10
10
Hesus ta skohe diesdos disipel
(Marko 3:13-19; Lukas 6:12-16)
1Hesus a yama su diesdos disipelnan i duna nan poder pa saka spiritu malu i kura tur malesa i enfermedat. 2Esaki ta nòmber di e diesdos apòstelnan: promé ta Simon, yamá Pedro, i su ruman Andreas; Hakobo yu di Zebedeo i su ruman Huan; 3Filipo i Bartolomeo; Tomas i Mateo e kobradó di belasting; Hakobo yu di Alfeo i Tadeo;#10:3 Tadeo; otro manuskrito tin: Lebeo, tambe yamá Tadeo 4Simon e Zeloso#10:4 Simon e Zeloso; literalmente: Simon e Kananeo i Hudas Iskariot, ku a traishoná Hesus.
Hesus ta manda su disipelnan bai prediká
(Marko 6:7-13; Lukas 9:1-6)
5Hesus a manda e diesdos hòmbernan akí sali bai ku e siguiente instrukshon: ‘No kohe kaminda di esnan ku no ta hudiu ni drenta siudat di e samaritanonan. 6Mihó boso bai serka e karnénan pèrdí di pueblo di Israel. 7Anunsiá durante boso biahe: “Reino di shelu ta serka!” 8Kura esnan ku ta malu; lanta morto; kura esnan ku tin lepra i saka demoño for di esnan poseé. Pòrnada boso a risibí, pues duna pòrnada tambe. 9No biaha ku plaka, sea ta moneda di oro, di plata òf di bròns, den boso saku. 10No bai ku saku di biahe pa kaminda, ni ku paña èkstra, ni ku sandalia, ni ku garoti. Pasobra un trahadó ta meresé su pan di kada dia.#1 Korintionan 9:14; 1 Timoteo 5:18
11Ora boso drenta kualke siudat òf pueblo, investigá ken einan ta digno di risibí boso i keda serka dje te ora boso bai for di e lugá ei. 12Ora boso drenta e kas, kumindá e hendenan ku e saludo di pas. 13Si e hendenan di e kas ta digno, laga e pas ku boso a deseá nan, baha riba nan i si e hendenan di e kas no ta digno, hala boso palabranan di pas atras. 14I si kualke kas òf siudat nenga di risibí òf skucha boso, bandoná e lugá ei i sakudí boso pia kita stòf.#Echonan 13:51 15Mi ta sigurá boso: dia di huisio e kastigu pa e hendenan di Sódoma i Gomora lo ta ménos pisá ku e kastigu pa e hendenan di e siudat ei.#Lukas 10:4-12#Génesis 19:24-28; Mateo 11:24
Lo bini kontratempu
(Marko 13:9-14; Lukas 21:12-17)
16Tende! Mi ta manda boso manera karné meimei di lobo;#Lukas 10:3 p'esei antó sea sabí manera kolebra i inosente manera palomba. 17Tene kuidou ku hende. Nan lo kohe boso prezu i entregá boso na tribunal i bati boso ku karbachi den nan snoanan. 18Nan lo hiba boso dilanti di gobernante i dilanti di rei pa mi motibu, pa asina boso ta un testimonio pa nan i pa e paganonan. 19Ora nan entregá boso na tribunal, no preokupá di antemano kiko bisa òf kon papia. Ora e momento yega, boso lo risibí loke boso mester bisa. 20Pasobra no ta boso ta bisa nada e momento ei, ma ta Spiritu di boso Tata ta papia dor di boso.#Marko 13:9-11; Lukas 12:11-12; 21:12-15
21Un ruman lo entregá otro ruman na outoridat pa nan mat'é. Tata lo hasi meskos ku nan yu. Yu lo rebeldiá kontra nan mayornan i laga mata nan.#Marko 13:12; Lukas 21:16 22Tur hende lo odia boso pa mi motibu,#Mateo 24:9; Marko 13:13; Lukas 21:17 ma esun ku perseverá te na final lo keda salbá!#Mateo 24:13; Marko 13:13
23Ora nan persiguí boso den un siudat, hui bai un otro. Mi ta sigurá boso: boso lo no pasa tur e siudatnan di Israel promé ku e Yu di hende bini bèk.
24Un disipel no ta riba su maestro#Lukas 6:40 ni un kriá no ta riba su shon!#Huan 13:16; 15:20 25Pa un disipel mester ta sufisiente si e bira manera su maestro i pa e kriá si e bira manera su shon. Si kabes di kas mes nan a yama Belzebul,#Mateo 9:34; 12:24; Marko 3:22; Lukas 11:15 ki ta para pa su hendenan di kas?
No tene miedu
(Lukas 12:2-7)
26P'esei no tene miedu di hende. Lo deskubrí tur loke ta tapá; lo saka tur sekreto pone na kla.#Marko 4:22; Lukas 8:17 27Loke Mi bisa boso den skuridat, proklam'é di dia kla; loke bisa boso ketu ketu, grit'é na bos altu for di riba dak! 28No tene miedu di esnan ku por mata kurpa di hende, ma no por mata su alma sí; mas bien tene miedu di Dios ku tin poder pa destruí kurpa i alma den fièrnu. 29Dos para chikí ta kosta dos plaka, tòg? Ma niun di nan no ta kai na suela sin boso Tata ke. 30Pa loke ta trata boso, asta tur boso drachinan di kabei ta kontá. 31P'esei no tene miedu, pasobra boso ta bal mas ku hopi para!
Konfesá Kristu dilanti di hende
(Lukas 12:8-9)
32Si kualke hende deklará públikamente ku e ta na mi banda, Mi tambe lo deklará dilanti di mi Tata ku ta den shelu, ku Mi ta na su banda. 33Ma ken ku nenga públikamente ku nan konosé Mi, Mi tambe lo nenga ku Mi konosé nan dilanti di mi Tata ku ta den shelu.#2 Timoteo 2:12
Konsekuensia di Hesus su binida
(Lukas 12:51-53; 14:26-27)
34No pensa ku Mi a bini riba mundu pa trese pas. Mi no a bin trese pas, ma guera. 35Pasobra Mi a bini pa laga:
yu hòmber lanta kontra tata,
yu muhé kontra mama
i suegra kontra suegra grandi.
36Sí, hende su mes famia
lo bira su enemigu.#Mikéas 7:6
37Esun ku stima su mama òf su tata mas ku Mi, no ta digno di pertenesé na Mi; esun ku stima su yu hòmber òf su yu muhé mas ku Ami, no ta digno di pertenesé na Mi. 38Esun ku no hisa su krus sigui Mi, no ta digno di pertenesé na Mi.#Mateo 16:24; Marko 8:34; Lukas 9:23; Huan 12:24 39Esun ku purba gana su bida, lo pèrd'é i esun ku pèrdè su bida pa mi motibu, lo hañ'é.#Mateo 16:25; Marko 8:35; Lukas 9:24; 17:33; Huan 12:25
Rekompensa
(Marko 9:41)
40Esun ku risibí boso, ta risibí Mi#Lukas 10:16; Huan 13:20 i esun ku risibí Mi, ta risibí esun ku a manda Mi.#Marko 9:37; Lukas 9:48 41Esun ku risibí un profeta, pasobra e ta profeta, lo haña rekompensa di un profeta i esun ku risibí un hòmber hustu, lo haña rekompensa di un hòmber hustu. 42Mi ta sigurá boso: ken ku duna maske ta un glas di awa friu na un di mi disipelnan mas chikí pasobra e ta mi disipel, lo no keda sin haña su rekompensa.’
Currently Selected:
Mateo 10: PBDC13
Highlight
Share
Copy
Want to have your highlights saved across all your devices? Sign up or sign in
Papiamentu Bible with DC © Bible Society in Netherlands Antilles and Aruba, 2012, 2013