Deuteronomio 16
16
Tres fiesta grandi
(Éksodo 23:14-17; 34:18-24)
1Perkurá pa den luna di Abib boso selebrá Fiesta di Pésag#Éksodo 12:1-20; Levítiko 23:5-8; Numbernan 28:16-25 na honor di SEÑOR, boso Dios, pasobra ta den un anochi di e luna ei El a saka boso for di Egipto. 2Mata e ora ei un baka, un karné òf un kabritu komo sakrifisio di Pésag na e lugá ku SEÑOR lo skohe pa manifestá su presensia. 3No kome pan ku zürdeg; shete dia boso mester kome pan sin zürdeg, meskos ku dia boso a sali purá for di Egipto. E pan akí, “e pan di apuro”, mester rekordá boso boso bida largu e dia ku boso a sali for di Egipto. 4Durante e shete dianan ei no mester por haña zürdeg den henter e region i karni di e bestia ku boso mata anochi no mag keda te su manisé. 5No mata e sakrifisio di Pésag den un di e siudatnan ku SEÑOR, boso Dios, ta bai duna boso. 6Anochi ora solo ta bai baha, e ora ku boso a sali for di Egipto, boso mester mat'é na e lugá ku SEÑOR, boso Dios, skohe pa manifestá su presensia. 7Prepar'é i kom'é na e lugá ku SEÑOR, boso Dios, skohe; e ora ei mainta boso ta bai kas bèk. 8Kome pan sin zürdeg seis dia largu i tene un enkuentro festivo na honor di SEÑOR, boso Dios, riba e di shete dia; no hasi ningun trabou e dia ei.
Instrukshon enkuanto Fiesta di Sinkuenta Dia
9Konta shete siman: kuminsá konta for di e promé dia di kosecha di trigo. 10Selebrá e ora ei na honor di SEÑOR, boso Dios, e Fiesta di Sinkuenta Dia#Levítiko 23:15-21; Numbernan 28:26-31 i hasi boluntariamente un ofrenda ku na proporshon ta igual na e kosecha ku El a bendishoná boso kuné. 11Gosa den presensia di SEÑOR, boso Dios, huntu ku boso yunan, boso katibunan, ku e levitanan ku ta biba serka boso i ku e strañeronan, e wérfanonan i e biudanan ku tin serka boso, na e lugá ku SEÑOR, boso Dios, skohe pa manifestá su presensia. 12Keda kòrda ku boso tabata katibu na Egipto i kumpli kuidadosamente ku e mandamentunan akí.
Instrukshon enkuanto Fiesta di Ramada
13Ora boso kaba di bati trigo i kaba di machiká wendrùif, selebrá Fiesta di Ramada#Levítiko 23:33-36,39-43; Numbernan 29:12-38 shete dia largu. 14Gosa plenamente ku boso yunan, ku boso katibunan. Kombidá tambe e levitanan, strañeronan, biudanan i wérfanonan ku ta biba serka boso den siudat. 15Selebrá e fiesta akí shete dia largu na honor di SEÑOR, boso Dios, na e lugá ku SEÑOR skohe; pasobra SEÑOR, boso Dios, lo bendishoná boso di tal manera den tur boso kosecha i den tur boso trabou i boso lo ta kontentu di bèrdè.
16Tres bia pa aña tur hende hòmber mester bai den presensia di SEÑOR, boso Dios, na e lugá ku SEÑOR skohe, esta riba Fiesta di Pan Sin Zürdeg, Fiesta di Sinkuenta Dia i Fiesta di Ramada. No bai man bashí sí, 17bai ku un ofrenda ku ta igual ku e proporshon di rikesa ku El a bendishoná boso kuné.
Regla pa e huesnan
18Nombra hues i amtenar pa boso tribunan den tur e siudatnan ku SEÑOR, boso Dios, duna boso. Nan mester husga pueblo ku hustisia. 19No trose hustisia, no tuma parti, ni tuma regalo bou di mesa, pasobra regalo ta siega hende sabí i ta pone hende inosente pèrdè nan kaso.#Éksodo 23:6-8; Levítiko 19:15 20Kore tras di hustisia so, e ora ei lo bo biba hopi tempu felis den e pais ku SEÑOR, boso Dios, ta bai duna boso.
Regla pa parti hustisia
21Ora boso traha un altá pa SEÑOR, boso Dios, no lanta palu sagrado#Éksodo 34:13 banda di dje. 22No lanta piedra sagrado#Éksodo 23:24; Levítiko 26:1 tampoko. Pasobra ta kosnan repugnante pa SEÑOR, boso Dios.
Currently Selected:
Deuteronomio 16: PBDC13
Highlight
Share
Copy
Want to have your highlights saved across all your devices? Sign up or sign in
Papiamentu Bible with DC © Bible Society in Netherlands Antilles and Aruba, 2012, 2013