Barug 6
6
KARTA DI YEREMÍAS
Bobedat di idolatria
Esaki ta un kopia di e karta ku Yeremías a manda pa e israelitanan, ku rei di Babilonia tabata bai hiba Babilonia komo prizonero. Den dje el a komuniká nan un mensahe, ku el a haña di Dios.#Introdukshon 2 Reinan 24:10-17; Yeremías 29:1
1Boso a peka kontra Dios. P'esei rei Nebukadnèsar di Babilonia lo hiba boso su pais komo prizonero.#Yeremías 16:10-13 2Unabes na Babilonia boso estadia aya lo dura largu, hopi aña, shete generashon; pero despues lo Mi saka boso den pas i prosperidat.
3Awèl, na Babilonia boso lo mira diosnan, kargá riba lomba di saserdotenan, diosnan trahá di oro, plata i palu, ku ta yena e hendenan akí ku rèspèt. 4Tene kuidou antó pa nunka boso no imitá e paganonan akí; no keda yen di rèspèt pa nan diosnan,#Yeremías 10:2,5 5ora boso mira nan kargá den proseshon di hende ku ta adorá nan. Pero bisa den boso mes: ‘Ta Abo so, Señor, meresé adorashon.’ 6Pasobra mi angel ta ku boso; e ta kuida boso bida.
7E ídolonan#Salmonan 115:4-8; 135:15-18; Isaías 40:18-20; 44:9-20; Yeremías 10:2-16; Sabiduria 13:10—14:21 ta enchapá ku oro i plata, nan tin lenga, trahá pa artesano, pero nan ta un engaño i nan no por papia. 8E hendenan ta kohe oro i traha korona pa pone riba kabes di nan diosnan, komo si fuera nan tabata pòpchi di prònk. 9Pero tin be sa sosodé tambe ku saserdotenan ta hòrta oro i plata for di nan diosnan i us'é pa nan mes; nan ta asta duna prostitutanan di tèmpel fo'i dje. 10Nan ta bisti e ídolonan, e diosnan akí di oro, plata i palu, paña manera hende bibu. Pero e diosnan, bistí den paña pùrper, no por protegé nan mes kontra frus i komehein. 11Tin stòf di tèmpel diki diki riba nan, di manera ku mester limpia nan kara. 12Un di nan, manera un hues humano, tin un sèpter den su man, sinembargo e no por manda mata niun hende ku ofend'é. 13Un otro tin un spada òf un hacha den su man drechi, pero e no por salba su kurpa di guera òf sakeo. 14Esaki ta demostrá ku nan no ta dios, p'esei no tene miedu di nan.
15E diosnan akí, poné ayá den nan tèmpel, ta mes inútil ku wea di klei kibrá. 16Nan wowo ta yen di stòf, ku pia di hende, drentando tèmpel, ta lanta. 17Manera portanan di prizòn ta dal sera tras di lomba di un hende, kondená na morto pa un krímen, kometé kontra rei, asina tambe saserdotenan ta seya portanan di tèmpel ku tranka, pa ladronnan no hòrta e ídolonan. 18E saserdotenan ta sende hopi lampi pa nan, mas ku pa nan mes; pero e diosnan no por mira niun di nan. 19Ta pasa ku e diosnan akí manera ku biganan di nan tèmpel, di paden komé dor di komehein: te na ora komehein kome nan mes kurpa i nan pañanan nan no ta ni ripará. 20Nan kara ta pretu dje huma di den tèmpel. 21Raton di anochi, souchi i tur sorto di para ta sinta riba nan kabes i kurpa, i pushi tambe ta hasi meskos. 22Pues asina boso ta mira ku nan no ta dios, p'esei no teme nan.
23E imágennan akí ta kubrí ku oro briante, pero tòg si hende no puli nan bon pulí, nan no ta lombra. Ora ku a saka nan for di molde, nan tabata falta nan sinku sentidonan. 24Nan a kosta mashá karu, pero nan no ta nada mas ku kosnan sin bida. 25Ya komo nan no tin pia di bèrdè, saserdotenan ta karga nan riba nan lomba,#Isaías 46:7; Yeremías 10:5 esei ta demostrá ku nan no tin niun balor. Si nan kai abou na suela, e kargadónan, yen di bèrgwensa tin ku pone nan riba nan pia. 26Si pone nan règt riba nan kurpa, nan no por move, si pone nan para skein, nan no por lanta para règt. Pone ofrenda nan dilanti ta meskos ku pone ofrenda pa hende morto.#Sirag 30:18-19 27E saserdotenan ta bende e sakrifisionan, ofresé na diosnan, pa nan mes probecho. I e kasánan dje saserdotenan tambe ta hasi meskos: nan ta kohe un parti dje karni, salg'é pa nan us'é despues, pero nan no ta duna ni hende pober ni hende den nesesidat nada fo'i dje. Muhénan ku malu di luna ta mishi ku e ofrendanan akí o tambe muhénan ku a kaba di duna lus.#Levítiko 12:2-5; 15:19-27 28Pues boso por mira ku nan no ta dios, p'esei no teme nan.
29Kon un hende por bisa ku nan ta dios? Ta hende muhé ta sirbi mesa pa e diosnan di oro, plata i palu ei! 30Den tèmpelnan saserdotenan ta sinta ku nan toganan isker, kabes i barba feitá limpi limpi i nan no ta tapa kabes. 31Nan ta grita i sklama dilanti di nan diosnan, manera yoradónan di morto na un entiero. 32E saserdotenan ta kita paña for di kurpa di e diosnan pa bisti nan propio kasá i yunan. 33Si kualke hende hasi algu bon o malu ku e diosnan akí, nan lo no por paga e hende akí bèk. Nan no por nombra ni baha un rei.#Daniel 2:21 34Nan no por duna niun hende rikesa ni plaka tampoko. Si un hende hasi nan un promesa i no kumpli kuné, nan no por reklam'é nada.#Deuteronomio 23:21 35Nan no por salba niun hende di morto,#Deuteronomio 32:29; Salmo 49:15 ni libra hende débil for di poder di esun fuerte. 36Nan no por duna hende siegu nan bista ni yuda hende den nesesidat, 37ni tene kompashon ku biuda ni kuida wérfanonan.#Deuteronomio 10:18; Salmo 146:7-9 38E diosnan di palu akí, ounke kubrí ku oro i plata, ta parse pida baranka. Hende ku ta adorá nan lo keda brongosá.#Habakuk 2:19 39Kon un hende por pensa o bisa ku ta dios nan ta?
40Pa kolmo e saserdotenan babilóniko mes ta hinka nan diosnan den pèrtá: ora nan mira un hende muda, sin kapasidat pa papia, nan ta karga dios Bel#Isaías 46:1; Yeremías 50:2; 51:44; Daniel 14:3-22 bini kuné i ta pidié duna e muda abla — komo si fuera Bel tin kapasidat pa tende! 41I nan mes no ta ni pensa ku nan mester laga e diosnan ei, pasobra nan mes no tin fakultat mental. 42Hende muhé ta mara un kordon, bai sinta kantu di kaminda i ta kima bagas.#6:42 kima bagas: un rito mágiko di amor 43I si un hòmber pasa, bai ku un di e muhénan akí i drumi kuné, e ta pil di su kompañeranan pasobra nan sí no tabatin honor di haña un invitashon i nan kordon sí no a kibra ainda. 44Tur loke ta relashoná ku ídolo ta engaño. Kon un hende por pensa o bisa ku ta dios nan ta?
45E ídolonan ta trahá pa karpinté i platé, i nan ta solamente loke e artista ta deseá pa nan ta. 46Nan kreadónan ta hende mortal, antó kon nan kreashonnan por ta dios? 47E hendenan akí ta laga solamente un engaño bergonsoso atras pa nan desendientenan. 48Ora tin guera o desaster e saserdotenan ta palabrá ku otro unda nan por bai skonde ku nan diosnan. 49Tur hende no ta mira ku nan no ta dios? Pasobra ni salba nan no por salba nan mes di guera i desaster. 50Nan no ta nada mas ku pida palu, kubrí ku oro i plata; p'esei un aña riba un dia lo resultá ku nan ta puru engaño. Tur nashon i rei lo mira bon kla ku nan no ta dios, sino trabou di hende i ku nan no ta poseé niun poder dibino. 51Pues tur hende mester komprondé antó ku nan no ta dios.
52Nan no por nombra un rei den un pais i nan no por duna hende áwaseru.#Deuteronomio 11:14; 28:12; Salmo 147:8 53Ni nan propio kaso nan no por defendé, kòrda pa nan protegé hende oprimí. Nan ta mes impotente ku lora ku bientu ta supla bai kuné. 54Ora kandela kuminsá den un tèmpel, ku ta pertenesé na e diosnan di palu ei tur na oro i plata, nan saserdotenan ta kore bai pa nan ta fo'i peliger, pero e diosnan ta kima den kandela manera palu. 55Nan no por resistí ni rei ni enemigu. 56Pues kon por ta posibel aseptá o pensa ku ta dios nan ta?
57Nan no por skapa di ladron i atrakadó, e diosnan di palu ei, enchapá ku oro i plata. Ken ku ta por kita nan oro i plata i baha bai ku e pañanan ku nan tin bistí sin ku e diosnan akí por hasi nada pa defendé nan kurpa. 58Mihó un rei ku por proba su kurashi, un kos di uso den kas, útil pa su shon, asta un porta di kas ku ta protegé tur kos den kas i no un di e diosnan falsu ei. Un pilá di palu den palasio tambe ta bal mas ku tur e diosnan falsu ei. 59Solo, luna i streanan ku ta bria asina kla ta mandá ku un propósito i nan ta kumpli kuné. 60Di mes manera ora welek kòrta, por mir'é djaleu i tur kaminda. Bientu tambe ta supla den tur pais. 61I ora Dios ordená nubianan pa nan pasa riba henter mundu, nan ta kumpli ku nan tarea, meskos tambe kandela, ora E mand'é kai pa kima seru- i boskenan.#Salmonan 104:3-4; 148:3-8 62Pero no por kompará ídolonan ku niun di e kosnan akí, ni den beyesa, ni poder. 63Ke men antó ku no por konsiderá nan dios, ni yama nan na e nòmber ei, konsiderando ku nan ta inkapas di dikta sentensia o konsedé benefisio na hende. 64Pues boso por mira antó ku nan no ta dios, no teme nan.
65Nan no por bendishoná ni maldishoná reinan; 66nan no por mustra nashonnan milagernan den shelu,#Yoel 2:30 ni nan no ta bria manera solo, ni manda lus manera luna. 67Bestia feros ta mihó ku nan, pasobra e bestianan akí por salba nan kurpa skondiendo. 68Pues no ta eksistí ningun prueba ku nan ta dios, p'esei no teme nan.
69E diosnan ei di palu, oro i plata parse spantapara den plantashon di kònkòmber: niun para no ta spanta bula bai. 70E diosnan ei di palu, oro i plata parse tranké di sumpiña den hardin: tur para ta sinta riba nan. Nan parse kadaver ku hende ta pusha bou di tera. 71Nan mantel pùrper, nan bistí di lino fini ta putri na nan kurpa. Pues bo ta mira ku nan no ta dios. Finalmente komehein ta kome nan i tur hende ta hasi bofon di nan.
72Mihó un hende hustu, sin e diosnan ei: e sí niun hende lo no hasi bofon di dje.
Currently Selected:
Barug 6: PBDC13
Highlight
Share
Copy
Want to have your highlights saved across all your devices? Sign up or sign in
Papiamentu Bible with DC © Bible Society in Netherlands Antilles and Aruba, 2012, 2013