Barug 5
5
1Herusalèm, kita bo paña di mizeria i rou,
bisti mahestat di Dios su gloria pa semper.
2Lora bo kurpa den su mantel di hustisia,#Isaías 52:1; 61:3,10; Revelashon 21:2
koroná bo kabes ku splendor di Esun Eterno.
3Pasobra Dios ta bai mustra tur nashon
ku ta biba bou di shelu bo gloria radiante.
4Esaki ta e nòmber, ku pa semper l'E duna bo:#Isaías 60:14; 62:4; Yeremías 33:16; Ezekiel 48:35
‘Pas di Hustisia, Splendor di Santidat.’
5Herusalèm, lanta, bai para riba seru,
bira bo kara pariba i mira
bo yunan ta bini di pariba i pabou,
reuní riba òrdu di Dios Santu,
kontentu di mira ku Dios a kòrda riba nan!#Isaías 43:5; 60:4; Barug 4:37
6Un ten nan a sali na pia bai laga bo,
hibá fo'i tera p'un eskolta enemigu.
Awor Dios ta trese nan kas serka bo,
hisá na laria, manera un rei riba trono.#Isaías 49:22; 60:4; 66:20
7Dios a ordená pa baha
kada seru altu i eterno,
yena vayenan i paria suela,
pa Israel pasa trankilamente,
guiá pa gloria di Dios.#Isaías 40:4-5; Lukas 3:4-6
8Asta mondi- i palunan di dushi holó
lo duna Israel sombra riba òrdu di Dios.
9Dios mes lo trese su pueblo kas;
nan lo kana yen di alegria den lus di su gloria,
kompañá pa su mizerikòrdia bondadoso.
Currently Selected:
Barug 5: PBDC13
Highlight
Share
Copy
Want to have your highlights saved across all your devices? Sign up or sign in
Papiamentu Bible with DC © Bible Society in Netherlands Antilles and Aruba, 2012, 2013