Barug 2
2
1Señor a kumpli ku loke El a primintí di hasi kontra nos i nos gobernantenan, nos reinan i hefenan i kontra habitantenan di Israel i Huda. 2El a manda un kalamidat riba nos na Herusalèm, manera niun hende no a yega di mira niun kaminda na mundu, manera ta skibí den lei di Moises: 3ku asta nos lo yega na punto ku nos ta kome karni di nos propio yunan, hòmber i muhé.#Levítiko 26:29; Deuteronomio 28:53; Yeremías 19:9; Lamentashonnan 4:10 4Señor a pone e israelitanan kai den poder di tur e nashonnan rondó di nan. El a pone ku a despresiá nan i ku nan a bira un desierto meimei di tur e paisnan bisiña kaminda El a plama nan. 5Pasobra nos a peka kontra Señor nos Dios i no a hasi kaso di su mandamentunan, nos a bira esun delaster i no esun promé.#Deuteronomio 28:13,43
6Señor nos Dios semper ta hustu, pero nos i nos antepasadonan awor akí mester tin bèrgwensa. 7Henter e kalamidat akí, ku Señor a anunsiá kontra nos, a kai riba nos, 8pasobra niun di nos no a bira lomba pa e konsehonan tèrko di nos kurason malbado i no a buska moda di plakia rabia di Señor.#Daniel 9:13-14 9P'esei Señor a wak ora pa su palabranan bira realidat, El a manda e kalamidat akí riba nos, pasobra E ta hustu den tur loke El a ordená nos pa hasi. 10Sinembargo nos no a tende di djE i nos no a biba segun e mandamentunan ku El a duna nos.
11Awèl, Señor, Dios di Israel, t'Abo a saka bo pueblo for di Egipto ku man fuerte, ku señal i milager, ku gran poder i man na laria. T'esei a hasi bo nòmber grandi te dia djawe, 12pero nos, nos a peka, nos a komportá nos malu, nos a kometé maldat, Señor nos Dios, apesar di tur bo mandamentunan.#Daniel 9:15-17 13Kita bo furia for di nos, pasobra ta algun di nos so a sobrebibí den e paisnan kaminda Bo a plama nos.
14Señor, skucha nos orashon i nos súplika. Kòrda riba bo mes honor i libra nos; hasi pa esnan ku a trese nos den eksilio trata nos ku bondat, 15pa tur hende riba mundu sa ku Abo ta Señor nos Dios i ku Israel i su desendientenan ta karga bo nòmber. 16Señor, wak abou for di bo kas selestial i hasi kaso di nos; habri bo orea i skucha; 17habri bo wowo i mira; Señor, no ta esnan ku ya ta den reino di morto, ku kurpa sin bida, ta honra Bo i gaba bo hustisia. 18Nò, Señor, ta esnan bibu, pero flihí te den nan alma, esnan ku ta kana lomba doblá i sin forsa, ku bista suak di hamber, ta nan ta honra Bo i gaba bo hustisia.#Salmonan 6:5; 30:9; Isaías 38:18-19; Sirag 17:27-28
19No ta pasobra nos antepasadonan i reinan a komportá nan dje bon ei nos ke pone nos súplika Bo dilanti, o Señor nos Dios. 20Bo a manda bo furia i rabia riba nos, manera Bo a anunsiá pa medio di bo sirbidónan, e profetanan, ora Bo a bisa: 21‘T'esaki Señor ta bisa: Baha kabes i sirbi rei di Babilonia, e ora ei boso lo por sigui biba den e pais, ku Mi a duna boso antepasadonan.#Yeremías 27:11-12 22Pero si boso no hasi kaso di e òrdu ku Mi a duna boso, di sirbi rei di Babilonia, 23e ora ei lo Mi laga kantikanan di alegria i goso i kantikanan di kasamentu disparsé na Herusalèm i e otro siudatnan di Huda; henter e pais lo bira un desierto desolá.’#Yeremías 7:34
24Pero nos no a obedesé bo òrdu di sirbi rei di Babilonia. P'esei Bo a kumpli ku e menasa ku Bo a duna nos pa medio di bo sirbidónan, e profetanan: wesunan di nos reinan i nos antepasadonan a keda saká for di nan graf; 25i ata nan bentá eibou, di dia den kalor, anochi den friu.#Yeremías 8:1-2; 36:30 Nan a muri un morto doloroso pa medio di hamber, spada i pèst.#2:25 pèst; otro posibel tradukshon: eksilio#Yeremías 14:12 26I pa motibu di maldat di Israel i Huda e kas ku tabata karga bo nòmber a bira loke e ta awe.#Yeremías 7:14
27Sinembargo, Abo, Señor nos Dios, a trata nos segun bo bondat i gran mizerikòrdia, 28manera Bo a anunsiá pa medio di bo sirbidó Moises,#Deuteronomio 28:58,62 dia Bo a mand'é skibi e lei den presensia di israelitanan i Bo a bisa: 29‘Si boso no hasi kaso di Mi, e trupa grandi i numeroso akí lo bira un pueblo chikí bou di e nashonnan, kaminda lo Mi plama nan. 30Pues Mi sa ku boso lo no obedesé Mi, pasobra boso ta un pueblo tèrko. Pero ora boso ta den eksilio e ora ei boso lo arepentí 31i rekonosé ku Ami ta Señor boso Dios. Lo Mi duna boso inteligensia i orea pa tende 32i na e lugá kaminda boso ta keda den eksilio, boso lo alabá Mi i kòrda riba Mi. 33Boso lo laga terkedat i mal komportashon ora boso kòrda kiko a pasa ku boso antepasadonan, ku a peka kontra Ami, Señor. 34E ora ei Mi ta perkurá pa boso regresá boso pais, e pais ku bou di huramentu Mi a primintí di duna boso antepasadonan Abraham, Isak i Yakob, i boso lo bolbe bira doño di dje.#Yeremías 32:37 Mi ta laga boso rende i no bai atras den kantidat. 35Lo Mi sera un aliansa eterno ku boso i un kompromiso di keda boso Dios i boso lo keda mi pueblo; lo Mi no laga mi pueblo Israel sali mas for di e pais, ku Mi a duna nan.’#Yeremías 31:31; 32:38-40; Amos 9:15
Currently Selected:
Barug 2: PBDC13
Highlight
Copy
Compare
Share
Want to have your highlights saved across all your devices? Sign up or sign in
Papiamentu Bible with DC © Bible Society in Netherlands Antilles and Aruba, 2012, 2013