Barug 1
1
I. INTRODUKSHON
Barug serka e eksiliadonan na Babilonia
1Esaki ta e buki di Barug.#Yeremías 36:4 Barug tabata yu di Neria, su otro antepasadonan tabata Magsías, Sedekías, Hasadías i Hilkías. El a skibi e buki na Babilonia 2riba e di shete dia di e di sinku luna, eksaktamente sinku aña despues ku hendenan di Babilonia a konkistá i kima Herusalèm.#2 Reinan 25:8-12
3-4Barug a lesa e buki akí públikamente pa rei Yekonías#2 Reinan 24:8-17; Yeremías 24:1 di Huda, yu di Yoyakim, i pa tur eksiliado for di Huda, bibá na Babilonia, kantu di riu Sud. Tur hende a bini pa skucha loke tabatin skibí den e buki: tabata funshonarionan di gobièrnu i miembronan di famia real, ansianonan i henter e pueblo di mas altu te mas abou. 5Ora nan a tende, nan a kuminsá yora, yuna i resa na Señor. 6Nan a tene un kolèkt tambe i tur hende a kontribuí ku loke nan tabata por. 7E sèn ei nan a manda Herusalèm pa gransaserdote Yoyakim, yu di Hilkías i ñetu di Shalum i pa e otro saserdotenan i hendenan ku ainda tabata na Herusalèm huntu kuné. 8Di antemano, riba e di dies dia di e di tres luna, ya Barug a tuma e skalchinan sagrado hòrtá fo'i den tèmpel, pa hiba nan Huda bèk, huntu ku e sèn. Tabata trata di e skalchinan di plata ku Sedekías,#2 Reinan 24:17—25:7 yu di Yosías i rei di Huda, a laga traha, 9despues ku rei Nebukadnèsar di Babilonia a deportá Yekonías, funshonarionan di gobièrnu, hefenan, smetnan#1:9 smetnan: tradukshon probabel (kompará Yeremías 24:1); griego tin: prizoneronan i e pueblo for di Herusalèm pa Babilonia.#2 Reinan 24:14; Yeremías 24:1
Mensahe pa e komunidat na Herusalèm
10Nan a manda e sèn ei ku e siguiente mensahe: Nos ta manda e sèn akí pa boso paga sakrifisionan di kandela, sakrifisionan pa pordon di piká i sensia. Prepará ofrenda i ofresé nan riba altá di Señor, nos Dios. 11Resa pa rei Nebukadnèsar di Babilonia i su yu Belshasar, pa nan biba na mundu mes tantu tempu ku shelu lo eksistí.#Yeremías 29:7 12Señor lo duna nos forsa i lo habri nos bista pa nos sigui biba bou di protekshon di rei Nebukadnèsar i su yu Belshasar,#Daniel 5:2,13 pa nos sigui sirbi nan pa hopi tempu; e ora ei nos lo ta bon mirá serka nan. 13Resa tambe na Señor nos Dios pa nos, ya ku nos a peka kontra djE; p'esei te dia djawe Señor no a apartá su ira i rabia for di nos. 14I lesa e buki ku nos ta manda akí pa boso den tèmpel di Señor riba e fiesta di Ramada i otro dianan di fiesta pa hende tende. 15Resa asina:
II. ORASHON PENITENSIAL
Señor nos Dios semper ta hustu, pero nos mester tin bèrgwensa. Esaki ta konta awor akí pa tur ku ta habitante di Huda i Herusalèm, 16pa e reinan i e lidernan, saserdote- i profetanan, nos antepasadonan,#Daniel 9:7-10; Daniel 3:29-30 17pasobra nos a peka kontra Señor. 18Nos a desobedes'É i no a tende di djE i nos no a biba segun e mandamentunan ku El a duna nos. 19For di dia ku Señor nos Dios a saka nos antepasadonan for di Egipto te dia djawe, nos a desobedes'É i nos no a preokupá pa kumpli ku su òrdunan. 20P'esei tantu kataklismo a toka nos i awe nos ta bou di maldishon, ku Señor a ordená su sirbidó Moises proklamá, tempu ku Señor a saka nos antepasadonan for di Egipto, pa duna nos e tera ku ta mana lechi i miel.#Deuteronomio 28 21Nos no a tene kuenta tampoko ku loke Señor nos Dios a bisa nos den tur e mensahenan dje profetanan, ku El a manda pa nos. 22Kada un di nos a sigui e konsehonan tèrko di su kurason malbado; nos a sirbi diosnan strañero i nos a hasi kos malu den bista di Señor nos Dios.
Currently Selected:
Barug 1: PBDC13
Highlight
Copy
Compare
Share
Want to have your highlights saved across all your devices? Sign up or sign in
Papiamentu Bible with DC © Bible Society in Netherlands Antilles and Aruba, 2012, 2013