1 Makabeonan 16
16
HAZAÑANAN DI YU HÒMBERNAN DI SIMON I SU MORTO
Lucha pa libertat
1Huan a bai for di Guèzèr pa bai konta su tata Simon kiko Kendebeo tabata hasiendo. 2Simon a bisa su dos yu hòmbernan di mas grandi Hudas i Huan: ‘Ami, mi ruman hòmbernan i famia parti di mi tata a bringa enemigunan di Israel fo'i nos hubentut te awor i diferente bia nos a logra libra Israel. 3Awor ami a bira bieu, pero danki Dios boso ta den flor di boso hubentut. P'esei tuma mi lugá i di mi ruman i sali bai bringa ku yudansa di shelu!’
4Simon a skohe 20.000 sòldá di infanteria i kabayeria for di e pais. Nan a sali pa bringa kontra Kendebeo i a pasa nochi na Modein. 5Mainta ora nan tabata drenta den sabana, un ehérsito grandi di sòldá di kabayeria i di infanteria a bin kontra nan. Tabatin un roi ta kore entre e dos ehérsitonan. 6Huan i su ehérsito a para dilanti di e enemigu. Ora el a ripará ku su sòldánan tabatin miedu di krusa e riu, e mes a krusa promé, despues numa su ehérsito a krusa. 7Komo e sòldánan di kabayeria di e enemigu tabata asina tantu, Huan a parti su sòldánan di infanteria den dos ala i a pone su sòldánan di kabayeria meimei di nan. 8E ora ei nan a supla tròmpèt i a derotá Kendebeo ku su ehérsito. Hopi a muri, sobrá a hui bai fòrti. 9Den bataya nan a heridá Hudas, ruman di Huan. Huan a persiguí e enemigu te Kedron, ku Kendebeo a reforsá. 10Komo otronan a buska refugio den torennan den teritorio di Ashdod, el a sende e torennan na kandela. Di e manera ei mas o ménos 2.000 sòldá enemigu a muri. Despues el a bolbe Huda sano i salvo.
Morto i suseshon di Simon
11Tolemaio, yu di Abubo, tabata general di sabana di Yériko. E tabatin kantidat grandi di oro i plata, 12pasobra e tabata suegu di e gransaserdote. 13Dor di esei el a bira orguyoso i ker a poderá di e pais. El a disidí di traishoná Simon i su yunan i di e manera ei kita nan for di kaminda. 14Simon tabatin kustumber di bishitá tur e siudatnan den pais, preokupá pa nan interes. Asina el a yega Yériko, huntu ku su yunan Matatías i Hudas. Tabata den di diesun luna, luna di Sebat di aña 177.#16:14 Aña 177 ta korespondé ku aña 134 promé ku Kristu. 15E yu di Abubo, na un manera hipókrita, a risibí nan den e fòrti chikí yamá Dok, ku el a konstruí. El a pone un gran bebementu pa nan, miéntras su sòldánan tabata skondí ei. 16Ora Simon i su yunan a bira burachi, Tolemaio i su sòldánan a lanta saka nan arma, bula riba Simon den sala di fiesta, mata e, su dos yunan i algun di su sirbidónan. 17Asina Tolemaio a kometé un krímen grandi i a paga bon ku malu.
18Tolemaio a skibi rei loke a pasa i a pidié manda sòldá bin yud'é i pasa gobernashon di e siudatnan i e pais p'e.#16:18 pasa gobernashon…p'e; otro posibel tradukshon: ku e promesa pa pasa e gobernashon…p'e (Antíoko) 19Tambe el a manda sòldá bai Guèzèr pa kita Huan for di kaminda. El a skibi karta invitá e generalnan di ehérsito pa djòin e, anto lo e duna nan oro, plata i regalo. 20El a manda otro sòldá pa okupá Herusalèm i seru di tèmpel. 21Pero un hende a bai dilanti pa atvertí Huan, ku tabata na Guèzèr, ku nan a mata su tata i su ruman hòmbernan. E hende a terminá: ‘Tolemaio a manda sòldá pa mata abo tambe.’ 22Ora Huan a tende e notisia akí, el a bira tur aríbabou, pero komo e tabata atvertí, el a logra kohe e hòmbernan ku mester a mat'é, prezu i mata nan.
23Sobrá historia di Huan, su hazañanan den guera, su echonan heróiko, konstrukshon di e murayanan di siudat i tur loke el a hasi, 24ta skibí den buki di krónikanan di su gransaserdosio for di dia el a sigui su tata komo gransaserdote.
Currently Selected:
1 Makabeonan 16: PBDC13
Highlight
Share
Copy
Want to have your highlights saved across all your devices? Sign up or sign in
Papiamentu Bible with DC © Bible Society in Netherlands Antilles and Aruba, 2012, 2013