Sɛ́núnywɛ́ 15
15
Izlayɛ́li ví lɛ́ɛ nɔ́ sɛn vodún ǎ
1Lo ɔ́, hwi Mawu mǐtɔn ɔ́, a nyɔ̌, lobo nɔ́ nɔ gbejí. A xwesɔ, lobo kpa acɛ nú nǔɖíɖó bǐ kpódó xomɛfífá kpán. 2Mǐ na bo hu hwɛ ɔ́, mǐ nɔ́ kpo ɖo towe nyí wɛ, ɖó mǐ tunwun acɛkpikpa towe; lo ɔ́, mǐ ná hu hwɛ ǎ, ɖó mǐ nywɛ́ ɖɔ a tunwun ɖɔ nǔ towe wɛ mǐ nyí. 3Nǔgbó ɔ́, mɛ e tunwun we lɛ́ɛ nɔ́ zán gbɛ yětɔn xwedó hwɛjijɔ, bɔ mɛ e yí gbe nú acɛkpikpa towe lɛ́ɛ nɔ́ ɖeji ɖɔ émí ná nɔ gbɛ nú tɛgbɛ gbe.
4Nǔblóbló gbɛtɔ́ tɔn e alɔnuzɔ́watɔ́ nyanya lɛ́ɛ nɔ́ bló lɛ́ɛ kpódó azɔ̌ ma ɖó ta ɖé e mɛɖetɔ́ lɛ́ɛ nɔ́ bló kpódó hwɛkan wunmɛ wunmɛ kpó e zɔ́n bɔ mǐ bú ali ǎ. 5Hwenu e gbɛtɔ́ ayimaɖotenánɔ lɛ́ɛ mɔ nǔ énɛ́ lɛ́ɛ ɔ́, akpakpa nɔ sɔ́ yě, bɔ yě nɔ́ sɔ́ yěɖée bǐ jó nú bǒcyɔ kpódó ɖiɖe gbɛmaɖowǔnánɔ énɛ́ lɛ́ɛ kpán. 6Mɛ e nɔ bló nǔ énɛ́ lɛ́ɛ é ɔ́, mɛ e nukún mɛ nǔ énɛ́ lɛ́ɛ nɔ́ nyɔ́ é, kpódó mɛ e nɔ sɛn yě lɛ́ɛ kpán bǐ wɛ yí wǎn nú nǔ nyanya wiwa, bɔ yě jɛ xá nǔ e ɖo te kpɔ́n yě é.
Kozɛ́nmɛtɔ́ e nɔ bló nǔmɛsɛn e má nyí Mawu ǎ lɛ́ɛ é
7Mi nú mǐ ná jlɛ́ nǔ dó zɛ̌nmɛtɔ́ wú. É nɔ́ jɛ tagba dó nya kɔ́, lobo nɔ dó mɛ zɛ̌n tɛnmɛ tɛnmɛ e mǐ nɔ́ zán ayǐhɔ́ngbe ayǐhɔ́ngbe lɛ́ɛ ná. Ko ɖokpó énɛ́ ɔ́ e é nya ɔ́, é nɔ́ zé dó mɛ zɛ̌n e è nɔ zán nú nǔjɔnǔ é kpódó ée è nɔ zán nú nǔ yǎyá é kpán. Lo ɔ́, éyɛ́ zɛ̌nmɛtɔ́ ɔ́ jɛ́n sixú ɖɔ nǔ e é ná sɔ́ ɖokpó ɖokpó yětɔn dó wa é. 8Énɛ́ gúdo ɔ́, ko ɖokpó énɛ́ ɔ́ wɛ é sɔ́ dó mɛ akpajlɛ́ nǔmɛsɛn e ma tíin ǎ lɛ́ɛ tɔn. Tagba tófwe jɛ wɛ é ɖe. Zaanɖé din ɔ́, zɛ̌nmɛtɔ́ énɛ́ e è sɔ́ kɔ́ dó bló zaanɖé din é ná lɛ́ húzú kɔ́ e è sɔ́ dó bló e ná é. Nǔ ná wá nyí mɔ̌ hwenu e Mawu ná wá yí lǐndɔ̌n e é ná ɛ é. 9Gbɛ tɔn ɖi ga ǎ, ɖó é ná wá kú gbe ɖokpó. É ɖo mɔ̌ có, nya nɛ́ ɔ́ ká nɔ́ linkpɔ́n ǎ, lobo nɔ jló ná wa nǔ mɛ e nɔ wa sikágan kpódó kpatágan lɛ́ɛ kpó sín azɔ̌ é ɖɔhun. É nɔ́ wa nǔ mɛ e nɔ sínsín kpatágan lɛ́ɛ ɖɔhun, lobo nɔ sɔ́ susu tɔn dó mɛblɛ́nú e é nɔ́ bló lɛ́ɛ mɛ.
10Ayi tɔn ɔ́, zofín kpowun wɛ, nǔ e ɖo te kpɔ́n ɛ ɔ́ nyɔ́ hú afúntúntún ayǐkúngban jí tɔn, lobɔ kɔ́ xɔ akwɛ́ hú gbɛ tɔn. 11Nǔgbó ɔ́, é dó vɛ̌ nú Mawu e ɖó e, lobo ná ɛ lǐndɔ̌n kpódó yɛ e nɔ ná gbɛ mɛ é kpán. 12Nǔgbó wɛ, zɛ̌nmɛtɔ́ énɛ́ ɔ́ nɔ́ mɔ gbɛ mǐtɔn dó mɔ ayihúndanú, fɔwátɛ́xi ɖaxó e mɛ è hɛn ɔ́, è nǎ kɔ́tɔ́ mɛ ɖe dó jɛ dɔkun é. É ɖɔ: “É nyɔ́ ó, é nylá ó; è ɖǒ ná ba akwɛ́ gbɔn alɔ lɛ́ɛ bǐ mɛ.”
13Zɛ̌nmɛtɔ́ énɛ́ ɔ́ tunwun ganjí ɖɔ nǔ nyanya wa wɛ émí ɖe. Nǔgbó ɔ́, é sɔ́ kɔ́ dó mɛ zɛ̌n kpódó bǒcyɔ kpán ná.
Ejípunu e nɔ sɛn kanlin lɛ́ɛ lɔmɔ̌ é
14Aklúnɔ, mɛ e nyí kɛntɔ́ togun towe tɔn lɛ́ɛ ɔ́, yě mɛ e dó ya n'i xóxó ɖ'ayǐ ɖo acɛkpikpa yětɔn hwenu lɛ́ɛ ɔ́, ayimasɔgbenánɔ tawun wɛ yě nyí. Nukúnnú-mɔjɛnǔmɛ yětɔn tɛ sɔga yɔkpɔ́vú kpɛví títí tɔn ǎ. 15Nǔgbó wɛ, yě sɔ́ nǔmɛsɛn togun lɛ́ɛ tɔn dó mɔ Mawu ná. Lo ɔ́, nǔmɛsɛn énɛ́ lɛ́ɛ ɖó nukún lobo ka nɔ mɔ nǔ ǎ. Yě ɖó awɔntín lobo ka nɔ gbɔjɛ́ ǎ; yě ɖó tó, bó ká nɔ́ se nǔ ǎ; yě ɖó alɔví ɖo alɔ nu, bó ká nɔ́ sixú hɛn nǔ ǎ; yě ɖó afɔ bo ka sixú sɛ tɛn ǎ. 16Ɖó gbɛtɔ́ wɛ bló yě. Mɛ e bló yě ɔ́, gbɛ funfún e ɖo é ɖésúnɔ wú é ɔ́, hwě wɛ è hwě n'i. Lo ɔ́, mɛɖé sixú kpé wú bó bló nǔmɛsɛn ɖé bɔ é ná sixú cí é ɖésú ɖɔhun ǎ. 17Gbɛtɔ́ ɖó ná wá kú gbe ɖokpó. Nǔ ɖo mɔ̌ ɔ́, alɔ tɔn e é nɔ́ wa nǔ nyanya ná lɛ́ɛ ɔ́, nǔ gbɛ ma ɖo wǔ jɛ́n é sixú bló ná. Nǔgbó ɔ́, alɔnuzɔ́watɔ́ énɛ́ ɔ́ xɔ akwɛ́ hú nǔ e sɛn wɛ é nɔ ɖe nɛ́ lɛ́ɛ bǐ. Éyɛ́ ɔ́, é mɔ gbɛ bo yí, lo ɔ́, nǔmɛsɛn énɛ́ lɛ́ɛ sixú mɔ gbɛ gbeɖé ǎ.
18Mɛ énɛ́ lɛ́ɛ nɔ́ ɖo kanlin baɖabaɖa e wǎn gbɛ́ lɛ́ɛ sɛn wɛ, kanlin e gú hú ɖě lɛ́ɛ bǐ é. 19Kanlin nɛ́ lɛ́ɛ nyɔ́ ɖɛkpɛ vɔ́vɔ́ ɖě lɛ́ɛ ɖɔhun ǎ; nǔɖé ká ɖo yě wú bó sixú dɔn mɛ ǎ; Mawu sixú yí wǎn nú yě ǎ, é ká sixú xo ɖɛ tɔn dó yě jí ǎ.
Currently Selected:
Sɛ́núnywɛ́ 15: FONDC
Highlight
Copy
Compare
Share
Want to have your highlights saved across all your devices? Sign up or sign in
La Bible en langue fon © Alliance Biblique du Bénin, 2012.