Sɛ́núnywɛ́ 14
14
Kpɔ́ndéwú tomɛyitɔ́ tɔn
1Kpɔ́ndéwú ɖěvo ɖíe: nya ɖé xwe tomɛ bó ká ná dó tɔjíhún. É ɖo nǔ sɔ́ wɛ bó ná xo xu e ɖo adǎn jí é zlɛ́. É sú xó ylɔ́ atínkpavǐ e má ɖó gǎn ɖé sɔ tɔjíhún e ná sɔ́ ɛ yi tomɛ ǎ é. 2Mɛ ɖé wɛ ɖó linlin bó zɔ́n bɔ è blǒ tɔjíhún énɛ́ ɔ́, bɔ é ná dó ba akwɛ́, lobɔ alɔnuzɔ́watɔ́ ayiɖotenánɔ bló é. 3Amɔ̌, xomɛnyínyɔ́ towe wɛ nɔ́ to nǔ bǐ, Tɔ́, bó ká nɔ́ kpé nukún wú. Nǔgbó wɛ, a nɔ ɖe ali n'i gbɔn xu jí; ali ɖejidéwú gbɔn xu e ɖo adǎn wa wɛ é tɛ́ntin. 4A ɖe xlɛ́ gbɔn fí énɛ́ ɖɔ émí hɛn ɔ́, émí ná hwlɛ́n mɛ gán ɖo awǒvinú bǐ sí káká yi jɛ mɛ e ma tunwun tɔwé ɖé ǎ, bó ká sɔ́ tɔjíhún xwe tomɛ é jí. 5A jlǒ ɖɔ Sɛ́núnywɛ́ towe nǔwiwa lɛ́ɛ ní nɔ ɖagbe li nu. Énɛ́ wɛ zɔ́n bɔ gbɛtɔ́ ɖěɖě nɔ́ sɔ́ gbɛ yětɔn dó así nú atínkpavǐ lɛ́ɛ nɔ́ xo xu e ɖo adǎn jí é zlɛ́ kpódó tɔjíhún kpán wǔyɛ́yɛ́ afɔyɛ́yɛ́. 6Ɖo bǐbɛ́mɛ ɔ́, mɔ̌ ɖokpó ɔ́ jɛ́n nǔ nyí gbɔn. Goyítɔ́ ɖaxó lɛ́ɛ bǐ wɛ kú, lo ɔ́, mɛ e nyí nukúnɖíɖó gbɛ ɔ́ tɔn lɛ́ɛ é yi hɔn hwlá cí tɔjíhún mɛ. Ée a ka bɛ́ yě dó awa towe glɔ́ é ɔ́, yě dó kúnkan yaɖéyaɖé ɖěvo nú gbɛ ɔ́.
7Nǔgbó wɛ, atín e zɔ́n bɔ è wa jlǒ towe é lɔ mɔ ɖɛ yí. 8Amɔ̌, heelú atínkpavǐ ɔ́ kpódó alɔnuzɔ́watɔ́ e bló e ɔ́ kpán: alɔnuzɔ́watɔ́ ɔ́ ɖó blǒ e é bló é wútu; atínkpavǐ ɔ́, ɖó è sɔ́ ɛ dó ɖó nǔmɛsɛn é wútu. Nǔ ɖo mɔ̌ có atínkpavǐ ɖé kpowun jɛ́n é nyí, bɔ è hɛn ɔ́, è nǎ sú kún tɔn dó. 9Nǔgbó wɛ, lě e Mawu gbɛ́ wǎn nú atínkpavǐ ɔ́ gbɔn é ɔ́, mɔ̌ ɖokpó ɔ́ jɛ́n é lɛ́ gbɛ́ wǎn nú gbɛtɔ́ e nɔ́ ɖe kɔ dó e gbɔn é nɛ́. 10É ná dɔn tó nú atínkpavǐ ɔ́ kpódó mɛ e bló e é kpán. 11Mɔ̌ ɖokpó ɔ́, Mawu ná tɔ́n ahwan nǔmɛsɛn tófwe togun nɛ́ lɛ́ɛ tɔn. Atínkpavǐ yětɔn lɛ́ɛ ɔ́, nǔɖíɖó Mawu tɔn lɛ́ɛ mɛ wɛ yě ɖe, cóbɔ yě ká lɛ́ wá húzú nǔdábaɖa ɖé kpowun n'i. Yě wá húzú hwɛmɛdɔnmɛdótɔ́ nú gbɛtɔ́ lɛ́ɛ, bó wá húzú mɔ ɖo afɔ glɔ́ nú ayihwedónánɔ lɛ́ɛ.
Nɛ̌ wɛ hwɛndo nǔmɛsɛn tófwe lɛ́ɛ tɔn ká jɔ gbɔn?
12Gbɛtɔ́ lɛ́ɛ wá jɛ do jɛ nú Mawu jí hwenu e yě wá mɔ ayi ɖɔ émí ná bló ɖiɖe nǔmɛsɛn émítɔn lɛ́ɛ tɔn é. Nǔ énɛ́ e yě dó wá é wá dɔn gbɛ ɔ́ dó ablu mɛ bǐ sésé. 13Ɖo bǐbɛ́mɛ ɔ́, ɖiɖe énɛ́ lɛ́ɛ ɖě tíin ǎ, bó ká sɔ́ ná tíin tɛgbɛ sɔ́ yi ǎ. 14Nǔ ɖi nú nǔ má ɖó ta ɖé gbɛtɔ́ lɛ́ɛ tɔn wɛ zɔ́n bɔ nǔmɛsɛn énɛ́ lɛ́ɛ wá byɔ́ gbɛ ɔ́ mɛ. Énɛ́ ɖokpó ɔ́ wú wɛ nǔmɛsɛn énɛ́ lɛ́ɛ sín kún ná lɛ́ wá yá wǔ sú dó. Nǔ e ɖo te kpɔ́n yě ɔ́ nɛ́.
15Kpɔ́ndéwú ɖokpó ɖíe: Dɔ̌nkpɛvú nya ɖé tɔn kú, bɔ kú vawun énɛ́ ɖu ɖo lanmɛ n'i, bɔ é zɔ́n ɖɔ è nǐ bló vǐ énɛ́ sín ɖiɖe nú émí. Mɛ énɛ́ e nyí gbɛtɔ́ gbɛmaɖowǔnánɔ é ɔ́, é jɛ sinsɛn ɛ jí nǔmɛsɛn ɖɔhun. Mɛ e ɖo acɛ tɔn mɛ lɛ́ɛ ɔ́, é nɔ́ kplɔ́n ablu mɛ walɔ lɛ́ɛ kpódó hwɛndo tɔn lɛ́ɛ kpán yě. 16Ée azǎn wá ɖo azǎn jí jɛ wɛ é ɔ́, walɔ énɛ́ e má sɔgbe xá nǔɖiɖi ǎ é ɔ́ wá húzú nǔ ɖaxó, bɔ gbɛtɔ́ lɛ́ɛ nɔ́ xwedó sɛ́n ɖɔhun.
Mɔ̌ ɖokpó ɔ́, axɔ́sú lɛ́ zɔ́n ɖɔ è nǐ nɔ́ fɔ yɛsu nú ɖiɖe émítɔn lɛ́ɛ. 17Mɛ e ɖo zɔga lɛ́ɛ nɔ́ sixú sɛn ɖiɖe énɛ́ lɛ́ɛ tlɔlɔ ǎ. Lo ɔ́, yě gbɔ bó ɖe yě, yě bló ɖiɖe axɔ́sú e yě nɔ́ sí é tɔn tawun. Énɛ́ ɔ́, yě hɛn ɔ́, yě ná ná susu axɔ́sú e má ɖo afɔ te ɖo fínɛ́ ǎ é gbɔn ɖiɖe énɛ́ ɔ́ jí. 18Wǔ fɛ́ nú alɔnuzɔ́, alɔnuzɔ́watɔ́ ɔ́ tɔn nɔ́ zɔ́n, bɔ yě mɛ e ma tlɛ tunwun axɔ́sú ɔ́ ǎ lɛ́ɛ é ɔ́ nɔ́ fɔ hwɛndo tɔn. 19Afɔ nyɔ́ ɔ́, alɔnuzɔ́watɔ́ énɛ́ ɔ́ jló ná nyɔ́ ɖo axɔ́sú ɔ́ sí wɛ. Énɛ́ wú wɛ é zán nǔnywɛ́ tɔn lɛ́ɛ bǐ, bó bló ɖiɖe tɔn bɔ é lɛ́ nyɔ́ ɖɛkpɛ tawun. 20Ɖɛkpɛ ɖiɖe ɔ́ tɔn ɖu ɖo togun ɔ́ jí, bɔ é jɛ mɛ e é nɔ wlí yɛ̌yi ná ɖ'ayǐ é sɛn jí. 21Nǔwalɔ énɛ́ ɔ́ wá húzú mɔɖíɖó nú gbɛtɔ́ lɛ́ɛ bǐ sín gbɛ. Nǔ nyí mɔ̌ hwenu e gbɛtɔ́ e ɖo nyladó abǐ acɛkpikpa kannu é wá ná nyǐkɔ e nyí Mawu ɖokpónɔ tɔn é ɖiɖe e é sɔ́ awǐnnya abǐ atín dó bló ná é.
Nǔmɛsɛn e ma nyí Mawu nǔgbó ǎ lɛ́ɛ é sinsɛn mɛ wɛ nyladó bǐ nɔ́ wú kun sín
22Mɛ énɛ́ lɛ́ɛ bú ali ɖo Mawu tunwuntunwun yětɔn sín ali nu. Hú mɔ̌ ɔ́, ée yě lɛ́ nyí manywɛ́tɔ́ é ɔ́, yě lɛ́ kpo ɖo kan ván wɛ tɛgbɛ ɖo ali énɛ́ ɔ́ jí. Bo ká nɔ́ sun nyǐ walɔ énɛ́ lɛ́ɛ ɖɔ fífá. 23Yě nɔ́ sɔ́ vǐ kpɛví lɛ́ɛ dó sá vɔ̌ ná, lobo ɖó yɛsu tɛnmɛ tɛnmɛ ɖo wi mɛ. Yě nɔ́ ɖu agɔ̌, lobo ná mɔ tɛn dó zán gbɛ hannyahannya. 24Yě sɔ́ nyɔ́ gbɛ yětɔn zán dó mǐmɛ́ jí ǎ, yě ká sɔ́ nɔ́ nɔ gbejí ɖo asú kpó asi kpán gbɛ zínzán mɛ ǎ. Súnnu ɖě nɔ́ zán ɖě ɔ́, bó nɔ́ hu i, abǐ é nɔ́ zun i, lobo nɔ yí asi tɔn. 25Sɛ́n ɖé sɔ́ ɖe ǎ: yě nɔ́ ɖo hun gbɛtɔ́ tɔn kɔn nyi ayǐ wɛ, bó nɔ́ ɖo mɛ hu wɛ, ajo ja wɛ, lobo ka nɔ lɛ́ ɖo mɛ blɛ́ wɛ. Yě nɔ́ xo mɛ gba fún, bó nɔ́ ɖu nǔ ɖo nǔ mɛ. Ayi yětɔn mɛ́ nú yě nɔ́ ɖɔ nǔgbó ǎ, bó nɔ́ ɖɔ jlɛ, bó nɔ́ nɔ kɛn, bó nɔ́ ɖó adingban. 26Yě nɔ́ dó ya nú mɛ e nɔ wa nǔ jlɔ́jlɔ́ lɛ́ɛ é, lobo nɔ wɔn ɖagbe e yě mɔ yí lɛ́ɛ é. Yě nɔ́ dó jikpo gbɛ ɔ́, súnnu lɛ́ɛ nɔ́ ɖó xó xá yěɖée, bɔ nyɔ̌nu lɛ́ɛ lɔ nɔ ɖó xó xá yěɖée. Yě nɔ́ da yěɖée ma xwedó sɛ́n ɔ́, bɔ mɛ lɛ́ɛ bǐ wá bɛ́ agalilɛ, bó nɔ́ ɖó xó xá mɛ ɖěbǔ e yě mɔ é.
27Nǔgbó wɛ, hwɛndo nǔmɛsɛn e ma nyí Mawu nǔgbó ǎ lɛ́ɛ é tɔn mɛ wɛ nyladó bǐ nɔ́ wú kun sín. É wɛ nyí hɔ̌nkan nǔ nyanya tɔn, bɔ nǔ nyanya kɛ́ɖɛ́ wɛ nɔ́ tɔ́n sín nǔwiwa tɔn lɛ́ɛ mɛ. 28Yě mɛ e nɔ sɛn nǔmɛsɛn énɛ́ lɛ́ɛ ɖó tamɛ ǎ, bó nɔ́ ba yěɖée mɛ kpo, bó nɔ́ jɛ ayǐ, bó nɔ́ jɛ gbo blí jí. Yě nɔ́ dó nǔ e ma sɔgbe ǎ lɛ́ɛ é sín wɛn, abǐ yě nɔ́ zán gbɛ lě e é jló yě gbɔn é, abǐ yě nɔ́ gɔn akpá e yě dó lɛ́ɛ é ɖe. 29Ée é nyí ɖɔ yě sɔ́ jiɖiɖe yětɔn bǐ dó bǒcyɔ gbɛmaɖowǔnánɔ énɛ́ lɛ́ɛ mɛ é ɔ́, yě gbó adɔ ɖɔ è kún ná sa sɛ́n dó émí ɖó akpá dó má ɖe émítɔn lɛ́ɛ wú ó. 30Amɔ̌, è nǎ wá sa sɛ́n dó yě ɖó nǔ we wú: jɛ nukɔn ɔ́, yě bú ali ɖo Mawu biba yětɔn mɛ, lobo sɔ́ yěɖée jó nú nǔmɛsɛn e má nyí Mawu ǎ lɛ́ɛ. Énɛ́ gúdo ɔ́, yě xo nǔ mímɛ́ lɛ́ɛ nyi kɛ́n, lobo nɔ dó akpá maɖemaɖe dó bú mɛ lɛ́ɛ. 31Nú yě ja akpá dó gbé ɔ́, yě nɔ́ sɔ́ nǔmɛsɛn e má nyí Mawu ǎ lɛ́ɛ dó ɖó kúnnuɖetɔ́ yětɔn. Amɔ̌, bǒcyɔ énɛ́ lɛ́ɛ ɖó gǎn ɖé ǎ, é ká nyí ɖɔ yě wɛ ɖo hwɛ ná ɖó nú yě wɛ ǎ. Hwɛ e è ɖǒ nú hwɛhutɔ́ lɛ́ɛ wɛ è nǎ ɖó nú yě. Nǔgbó wɛ, mɛ e nɔ wa nǔ nyanya lɛ́ɛ ɔ́, è nǎ nɔ́ dɔn tó nú yě tɛgbɛ.
Currently Selected:
Sɛ́núnywɛ́ 14: FONDC
Highlight
Copy
Compare
Share
Want to have your highlights saved across all your devices? Sign up or sign in
La Bible en langue fon © Alliance Biblique du Bénin, 2012.