Tobíi 3
3
Tobíi sa vo nú Aklúnɔ
1Aluwɛ ɖaxó ɖé jɛ jǐ ce, bɔ un jɛ azɔn wɛn jí, bó jɛ avǐ ya jí; azɔn ɔ́ wɛn wɛ un ɖe, bó jɛ ɖɛ xo jí bó ɖɔ:
2“Nǔgbó wɛ, hwɛjijɔnɔ wɛ nú we Aklúnɔ.
Nǔwiwa towe lɛ́ɛ bǐ nɔ́ jlɔ́.
Wǎn yíyí kpó gbejíninɔ kpó wɛ a nɔ dó wa nǔ ná tɛgbɛ.
Hwi wɛ nɔ gbo hwɛ nú gbɛ ɔ́.
3Hǔn flín mì Aklúnɔ;
nyi kɔ kpɔ́n mì;
ma sɔ́ hwɛ ce lɛ́ɛ kpódó nǔwanyido nyi kpó tɔ́gbó ce lɛ́ɛ tɔn kpán sín bǎ dó xo mì ó.
4Mǐ se tónú nú sɛ́n towe lɛ́ɛ ǎ;
énɛ́ wú wɛ a yǐ gbe bɔ kɛntɔ́ mǐtɔn lɛ́ɛ vɔ mǐ,
bó bɛ́ mǐ yi kɔn nyi to ɖěvo mɛ bo hu mǐ.
Mɛ lɛ́ɛ nɔ́ gbɔ́ mǐ ko, bó nɔ́ zun mǐ,
ɖo togun ɖě lɛ́ɛ é gɔ́n a sɛ́ mǐ dó lɛ́ɛ é mɛ.
5Nǔgbó wɛ, hwenu e a sɔ́ hwɛ ce kpó tɔ́gbó ce lɛ́ɛ tɔn kpán sín bǎ dó xo mì é ɔ́,
hwɛjijɔ wɛ a xwedó dó gbo hwɛ nú mì.
Nǔgbó ɔ́, mǐ se tónú nú sɛ́n towe lɛ́ɛ ǎ;
mǐ zán gbɛ ɖo nǔgbó mɛ ɖo nukɔn towe ǎ.
6Hǔn din ɔ́, sɔ́ mì dó wa nǔ e jló we é.
Gbɔ bo yí gbɛ ce, un jló ná bú sín ayǐkúngban ɔ́ jí nú agbaza ce ní lɛ́ húzú kɔ́gúdu.
Nyɛ ɔ́, kú nyɔ́ hú gbɛ nú mì, ɖó zun e ma jɛ xá mì ǎ lɛ́ɛ bǐ wɛ un se,
aluwɛ ɖaxó ɖé jɛ jǐ ce.
Aklúnɔ, hwlɛ̌n mì gán ɖo awěxomɛ élɔ́ sí;
dɔn mì byɔ́ gbɔjɛ́ mavɔ mavɔ ɔ́ mɛ.
Aklúnɔ, ma ɖe kɔ dó mì ó!
Un gbɔ bo kú ɔ́, é nyɔ́ nú mì hú ɖɔ má nɔ gbɛ
ɖo awěxomɛ mɔ̌hunkɔ mɛ,
bó ná ɖo zungbe énɛ́ lɛ́ɛ se wɛ.”
Mɛsɛntɔ́ nyɔ̌nu ɖokpó zun Sala
7Gbe énɛ́ gbe ɖokpó ɔ́, ɖo toxo Ɛkibatáni tɔn mɛ, ɖo Mɛdi ɔ́, mɛsɛntɔ́ Hlagwɛ́li tɔn ɖokpó zun Sala vǐ nyɔ̌nu nya nɛ́ ɔ́ tɔn. 8Ɖó nǔgbó ɔ́, azɔn tɛ́nwe wɛ Sala ko da asú; lo ɔ́, é ká kó da asú hweɖěbǔnu ɔ́, yɛ nyanya Asimɔde ɔ́ nɔ́ hu asú énɛ́ cóbɔ é ná jɛ kpɔ́ xá ɛ lě e é ɖó ná nyí gbɔn ɖo asú kpó asi kpó tɛ́ntin é. Hǔn mɛsɛntɔ́ énɛ́ ɔ́ ɖɔ nú Sala ɖɔ: “Hwi wɛ nɔ hu asú towe lɛ́ɛ; yě mɛ tɛ́nwe nɛ́ a ko da nɛ́, bɔ nyǐkɔ yě ɖěbǔ tɔn ká ɖo wǔ towe ǎ. 9Asú towe lɛ́ɛ kú wútu wɛ a nǎ nɔ́ ɖo hun nylá dó mǐ wɛ mɔ̌ a? Xwedó yě bó yi! Mǐ ba ná mɔ vǐ súnnu abǐ nyɔ̌nu ɖé jɔ sín xo towe mɛ ǎ!”
10Gbe énɛ́ ɔ́ gbe ɔ́, Sala byɔ́ aluwɛ ɖaxó ɖé mɛ; é zɔn ɖasin nu, bó yi tɔ́ tɔn sín xɔ ɖokpó mɛ ɖo aga, bó lin dó ayi mɛ ɖɔ émí ná dó kan kɔ bo kú. Lo ɔ́, é wá lin tamɛ kpɔ́n, bó ɖɔ nú éɖée ɖɔ: “Mɛ lɛ́ɛ sixú wá zun tɔ́ ce bó ɖɔ nǔyá n'i ɖɔ: ‘vǐ nyɔ̌nu ɖokpó e a ɖǒ bó yí wǎn ná káká ɔ́ nɛ́ yi dó kan kɔ bo kú ɖó nǔxámɛ tɔn lɛ́ɛ wú nɛ́!’ Akpɔ e un ná dó nú tɔ́ ce nyɔ̌xónɔ ɔ́ sixú wá zɔ́n bɔ é ná nɔ aluwɛ mɛ káká bó kú; un gbɔ bó jɛ kɔ nú Aklúnɔ ɖɔ é ní jó mì dó má kú ɔ́, é nyɔ́ hú ɖɔ má dó kan kɔ bo kú; énɛ́ ɔ́, un sɔ́ ná ɖo zungbe énɛ́ lɛ́ɛ ɖě se wɛ ǎ.”
Sala xo ɖɛ
11Bɔ Sala kpan nukɔn flɛtɛ́li ɔ́; é zé alɔ tɔn lɛ́ɛ yi jǐ, bó xo ɖɛ ɖɔ:
“Kpikpa wɛ jɛ xá we káká sɔ́yi!
Nǔɖíɖó towe lɛ́ɛ bǐ ní ji han dó kpa we magbokɔ!
12Din ɔ́, un kpan nukɔn we;
un sɔ́ nukún ce lɛ́ɛ bǐ ɖó jǐ towe.
13Ɖe ɖɛ mì sín ayǐkúngban élɔ́ jí
nú un ma sɔ́ se zungbe mɛɖé tɔn ó!
14Aklúnɔ, a tunwun ɖɔ un ɖo mǐmɛ́ jí;
súnnu ɖokpó lě sɛkpɔ́ mì ǎ.
15Un hɛn nyǐkɔ ce kpó tɔ́ ce tɔn kpó
ɖě kwíji ɖo fí élɔ́ e un tún to bó wá ɖe é ǎ.
Vǐ nyɔ̌nu ɖokpó wɛ un nyí nú tɔ́ ce;
é sɔ́ ɖó vǐ ɖěvo bó ná ɖu gǔ tɔn ǎ.
É ɖó nɔví ɖé abǐ hɛ̌nnumɔ ɖé nú
é ná sixú sɔ́ mì dó ɖó asi ná ǎ.
Asú tɛ́nwe wɛ ko kú dó mì.
Étɛ́ sín gbɛ wɛ un ka ná lɛ́ nɔ?
Lo ɔ́, Aklúnɔ, nú é má jló we nú a nǎ yí gbɛ ce ǎ hǔn,
bó ɖótó zun e zun mì wɛ è ɖe lɛ́ɛ é.”
È zɔ̌n Hlafayɛ́li ɖɔ é ní dó alɔ Tobíi kpó Sala kpó
16Hwe ɖokpó ɔ́ nu ɔ́, Mawu susu lɛ́ɛ bǐ nɔ ɔ́ se ɖɛ Tobíi kpó Sala kpó tɔn. 17 É sɛ́ Hlafayɛ́li dó ɖɔ é ní yi gbɔ azɔn nú yě mɛ we lɛ́ɛ bǐ. É ɖó ná ɖe wuntun wěwé lɛ́ɛ sín Tobíi nukún jí, bónú é ná lɛ́ vɔ́ wěziza Mawu tɔn mɔ. É ɖó ná lɛ́ ɖe ɖɛ Sala vǐ nyɔ̌nu Hlagwɛ́li tɔn sín yɛ nyanya Asimɔde kannu, bó ná sɔ́ ɛ da nú Tobiyási vǐ súnnu Tobíi tɔn. Nǔgbó ɔ́, lě e sɛ́n ɔ́ zɔ́n gbɔn ɔ́, Tobiyási wɛ ɖó ná da ɛ jɛ nukɔn nú mɛ ɖěvo e jló ná sɔ́ ɛ dó ɖó asi ná lɛ́ɛ é bǐ. Hwenɛ́nu ɔ́, Tobíi e ɖo kɔ́xota ɔ́ ɖo xɔ tɔn mɛ byɔ́ wɛ, bɔ Sala ɖo te jɛ sín xɔ e ɖo aga ɖo tɔ́ tɔn xwé é mɛ wɛ.
Currently Selected:
Tobíi 3: FONDC
Highlight
Copy
Compare
Share
Want to have your highlights saved across all your devices? Sign up or sign in
La Bible en langue fon © Alliance Biblique du Bénin, 2012.