Tobíi 2
2
Tobíi húzú nukúntíntɔ́nnɔ
1 Hwenu e Asaladɔ́ɔn ɖu axɔ́sú é ɔ́, un lɛ́ kɔ yi xwé ce gbe ɖo Ninívu; è jǒ asi ce Ana kpó vǐ ce Tobiyási kpán nú mì. Ɖo Pantekótuxwe e mǐ nɔ́ ɖu aklúnɔzán gbe tɛ́nwegɔ́ ɔ́ e nɔ́ jɛ ɖo Dǐndínwáyixwe ɔ́ gúdo ɔ́ gbe ɔ́, è ɖa nǔɖuɖu ɖagbe ɖé nú mì. Un jínjɔ́n ayǐ, bó ná ɖu nǔ. 2È fɔ nǔɖuɖu ɖagbe gěgé wá távo jí nú mì, bɔ un ɖɔ nú vǐ ce Tobiyási ɖɔ: “Vǐ ce, yi kpɔ́n nɔví mǐtɔn e è kplá gǎnnugǎnnu wá Ninívu lɛ́ɛ é mɛ, bó ba wamamɔnɔ e kpo ɖo gbejí nú Aklúnɔ kpó ayi tɔn bǐ kpán é ɖokpó ní wá dó alɔ ká mɛ xá mì. Nǎ nɔ te kpɔ́n kɔlílɛ́ towe hwɛ̌ cóbó ná ɖu nǔ.”
3Tobiyási yi wamamɔnɔ ɖokpó ba gbé ɖo nɔví mǐtɔn lɛ́ɛ mɛ, lo ɔ́, é ká lɛ́ kɔ wá bó ɖɔ: “Daá!” Bɔ un kanbyɔ́ ɛ ɖɔ: “Vǐ ce, nɛ̌ ká gbɔn?” É yí gbe nú mì ɖɔ: “Daá, un mɔ Izlayɛ́li ví ɖokpó din, bɔ è hu. Mɛ ɖé gbo gbe e sɔ́ nyi gblogblo tɛn axi ɔ́ tɔn. É lɛ́ kpo ɖo fínɛ́ din.”
4Bɔ un jó nǔɖuɖu ce dó ma sɔ́ ɖó alɔ wú, bó dó wezun azɔn ɖokpó, bó yi zé cyɔ ɔ́ síin. Un sɔ́ ɛ ɖó nǔ sá fí ɖé hwɛ̌, bó nɔ te nú hwe to yi xɔ cóbónú má ɖi i . 5 Ée un lɛ́ kɔ wá yi xwé ce gbe é ɔ́, un lɛ wǔ, bó dó slá wǔ, bó ɖu nǔ ce wǔbláwúblá. 6 Un flín nǔ e gbeyíɖɔ Amɔ́si ɖɔ dó Betɛ́linu lɛ́ɛ wú é ɖɔ jí: “Xwe ɖuɖu mitɔn lɛ́ɛ bǐ ná húzú aluwɛ, bɔ han mitɔn lɛ́ɛ bǐ ná húzú nǔwamɛhan.” Bɔ un jɛ avǐ ya jí. 7Énɛ́ gúdo ɔ́, ée hwe yi xɔ é ɔ́, un yi kun do ɖokpó, bó ɖi cyɔ ɔ́. 8Xwékpánu ce lɛ́ɛ nɔ́ cá mì ko, bó nɔ́ ɖɔ: “Tobíi ko ɖi xɛsi káká jɛ din ǎ.” È ko ba ɛ, bó ná hu i ɖó nǔ énɛ́ e é nɔ́ wa é wú kpɔ́n, bɔ é hɔn yi. Din ɔ́, é kó lɛ́ jɛ mɛkúkú lɛ́ɛ ɖi jí.
9Zǎn énɛ́ mɛ ɔ́, un lɛ wǔ bó ná dó slá wǔ; bɔ un yi mlɔ́ ayǐ ɖo kɔ́xo jí ɖo dǒ kpá, bó ká jó nukún mɛ ce nyi wěxo ɖó yǒzo wú. 10Un tunwun ɖɔ xɛ ɖé ɖó dǒswe ɔ́ mɛ fínɛ́ ɖo ta ce nu ǎ. Mǐ yětɔn zozo kɔn nyi nukún jí nú mì; énɛ́ gúdo ɔ́, wuntun wěwé ɖé lɛ́ɛ tɔ́n ɖo nukún ce lɛ́ɛ jí. Un yi mɔ dotóo ɖé lɛ́ɛ nú yě ná gblé nú mì. Lo ɔ́, nú yě ɖo amasin dó nukún lɛ́ɛ jí wɛ ɔ́, wuntun wěwé lɛ́ɛ nɔ́ ɖo nukún lɛ́ɛ hɛn gblé d'é jí wɛ, káká bɔ un wá ba nukúnnú kpo bǐ. Un nɔ nǔ má mɔ xɔ xwe ɛnɛ. Nǔ ce nɔ́ blá wǔ nú hɛ̌nnumɔ ce lɛ́ɛ. Ayikáa kpé nukún wǔ ce nú xwe we, bó wá yi Elimayísi.
11Hwe énɛ́ nu ɔ́, asi ce Ana bɛ́ avɔlunlɔn sín azɔ̌. 12É nɔ́ bɛ́ azɔ̌ e gǎn tɔn lɛ́ɛ zɔ́n ɛ ɔ́ yi jó, bɔ yě nɔ́ sú axɔ́ ɛ. Gbe ɖokpó ɖo Disitlɔ́sisun ɔ́ sín azǎn tɛ́nwegɔ́ ɔ́ gbe ɔ́, é lɔn avɔ akpó ɖokpó, bó sɔ́ yi jó nú gǎn tɔn lɛ́ɛ. Yě sú axɔ́ ɛ, bó lɛ́ ná ɛ gbɔ̌ ɖokpó d'é jí. 13Xwé ɔ́ gbe ná byɔ́ lě ɔ́, gbɔ̌ ɔ́ jɛ xó sú jí. Un ylɔ́ asi ce bo kanbyɔ́ ɛ ɖɔ: “Fítɛ́ gbɔ̌ énɛ́ ká gosín?” Mɛ ɖé wɛ ná kó fin sɔ́ yi jó nú éé nɔ lɛ́ɛ; mǐ ɖó acɛ e ɖu nǔ e è fin é ǎ. 14Asi ce yí gbe nú mì ɖɔ: “Nǎ wɛ è nǎ mì dó azɔ̌kwɛ́ ce jí sín!” Un ɖi nǔ n'i ǎ, bó ɖɔ é ní sɔ́ gbɔ̌ yi jó nú mɛ e tɔn wɛ lɛ́ɛ, káká bó sin xomɛ dó e ɖó énɛ́ wú. É yí gbe nú mì ɖɔ: “Nǔ e a nɔ ná wamamɔnɔ lɛ́ɛ ɔ́, le tɛ́ ká tɔ́n sín mɛ nú we? Ɖagbe e a nɔ wa lɛ́ɛ ɔ́, è mɔ fí e é fó dó é ganjí sín!”
Currently Selected:
Tobíi 2: FONDC
Highlight
Copy
Compare
Share
Want to have your highlights saved across all your devices? Sign up or sign in
La Bible en langue fon © Alliance Biblique du Bénin, 2012.