Silaki ví 50
50
Vɔ̌sánú-xwlémawutɔ́ ɖaxó Sinmɔ́ɔ
1Vɔ̌sánú-xwlémawutɔ́ ɖaxó Sinmɔ́ɔ Oniyási ví ɔ́ wɛ;
é jlá Aklúnɔxwé ɔ́ ɖó ɖo gbɛ hwenu tɔn;
ɖo hwe éyɛ́ tɔn nu ɔ́, é lɛ́ bló
bɔ Sinsɛnxɔ ɔ́ jínjɔ́n ayǐ d'é jí.
2Dǒ we ɖo bǔ e yi jǐ káká é ɔ́, é lɛ́ dó yě do;
yě wɛ nyí gǎnjɛwú dó e
è mɛ lɛ́ dó Sinsɛnxɔ ɔ́ é ɖo aga.
3Ɖo hwe éyɛ́ tɔn nu ɔ́,
é kun sindo ɖaxó ɖokpó;
é d'agba bó cí ɖěe è kun nú Sinsɛnxɔ nukɔntɔn ɔ́ é ɖɔhun.
4É lɔn nú é sú togun tɔn sín kún dó ǎ;
é dó ajakpá nú toxo ɔ́ ɖó ahwantɔ́nmɛzán gbe wú.
5Nú é tɔ́n sín tɛn mímɛ́ ɔ́ mɛ,
bó ná ɖi sa lɛ́ dó Sinsɛnxɔ ɔ́ lě ɔ́, é nɔ́ nyɔ́ ɖésú.
6É nɔ́ cí sunví zǎnzǎn tɔn ɖo kínkɔ́n wɛ ɖo akpɔ́kpɔ́ lɛ́ɛ tɛ́ntin ɖɔhun;
sun e kpé ká é ɖɔhun.
7É nɔ́ cí lě e hwe nɔ tɔ́n lobo nɔ za wě dó Sinsɛnxɔ Mawu Ajalɔ̌nlɔn ɔ́ tɔn jí é ɖɔhun;
nyǐ e nɔ́ ɖi dó akpɔ́kpɔ́ wězizanɔ lɛ́ɛ mɛ é ɖɔhun.
8É cí atínsɛ́ e kɛ nyɛnɛnɛ ɖo hwenu ɖagbe mɛ é ɖɔhun;
gběhan e wú ɖo tɔ tó é ɖɔhun;
Libáantín ɖo akú mɛ ɖɔhun.
9É cí zǎlínkpɔ́n e ɖo jiji wɛ ɖo vɔ̌sákpe jí é ɖɔhun;
siká kɔ́fu ɖuɖéjí tɔn e è sɔ́ awǐnnya nukúnɖéjí dó ɖó acɔ́ ná é ɖɔhun.
10É cí olívutín e sɛ́n bó tɔ kpɔn é ɖɔhun,
abǐ siplɛ́tín e yi jǐ káká bó byɔ́ akpɔ́kpɔ́ mɛ é ɖɔhun.
11Nú é sɔ́ vɔ̌sánú-xwlémawutɔ́ ɖaxó e é nyí é sín nǔ lɛ́ɛ dó,
bó sɔ́ acɔ́vɔ tɔn lɛ́ɛ dó, lobo xá vɔ̌sákpe jí lě ɔ́,
Sinsɛnxɔ ɔ́ kpó kɔ́xota tɔn lɛ́ɛ kpó bǐ nɔ́ nyɔ́ ɖɛkpɛ.
12É nɔ́ nɔ te ɖo vɔ̌sákpe ɔ́ kpá,
bɔ nǔ e vɔ̌sánú-xwlémawutɔ́ lɛ́ɛ nɔ́ hɛn wá nú vɔ̌sísá lɛ́ɛ é ɔ́,
é nɔ́ yí yě ɖo alɔ yětɔn mɛ;
nɔví tɔn lɛ́ɛ nɔ́ to lɛ́ dó e jɛ̌gbákún ɖɔhun;
sɛ́dlutín Libáan tɔn lɛ́ɛ ɖɔhun;
lě e dětín sín goto nɔ cí mlinɔɔ lɛ́ dó é ɖɔhun.
13Vɔ̌sánú-xwlémawutɔ́ Aalɔ́ɔn hɛ́nnu ɔ́ tɔn lɛ́ɛ bǐ ɖo fínɛ́,
ɖo acɔ́vɔ ɖagbe ɖagbe yětɔn lɛ́ɛ mɛ;
yě hɛn nǔ e yě hɛn wá nú Aklúnɔ lɛ́ɛ é alɔ mɛ,
ɖo kplékplé Izlayɛ́li togun ɔ́ bǐ tɔn nukɔn.
14Sinmɔ́ɔ sú ta nú vɔ̌sákpesinsɛnzɔ́ ɔ́,
bó bɛ́ vɔ̌sánú lɛ́ɛ ɖé jí nú Mawu Ajalɔ̌nlɔn Nǔbǐwúkpétɔ́ ɔ́.
15É dlɛ́n alɔ, bo sɔ́ kɔ́fu ɔ́;
é kɔn vɛ̌ɛn ɖěe nyí vǐwunsin é d'é mɛ;
é zé kɔn nyi vɔ̌sákpe ɔ́ nukɔn;
célu wǎnɖagbenɔ ɖé wɛ é nyí nú Ajalɔ̌nlɔn wɛ̌kɛ́ xɔ́sú ɔ́.
16Hwenɛ́nu ɔ́, vɔ̌sánú-xwlémawutɔ́ lɛ́ɛ bɛ́ xósúsú;
yě nɔ́ kún ahwankpɛn gannɔ yětɔn lɛ́ɛ,
bɔ é nɔ́ ɖi gbe gbɔn fí bǐ,
bónú togun ɔ́ ná dó flín Mawu Ajalɔ̌nlɔn ɔ́.
17Tlóló ɔ́, togun ɔ́ bǐ nɔ́ jɛ kpo bó nɔ́ ɖe kɔ́;
bó nɔ́ dó ɖo Aklúnɔ Nǔbǐwúkpétɔ́ yětɔn Ajalɔ̌nlɔn ɔ́ sɛn wɛ.
18Énɛ́ gúdo ɔ́, hansinɔ lɛ́ɛ nɔ́ kpa susu nú Mawu dó han mɛ;
han lómílómí, han víví nɔ́ gɔ́ Sinsɛnxɔ ɔ́ mɛ bǐ.
19Togun ɔ́ nɔ́ jɛ kɔ nú Aklúnɔ Mawu Ajalɔ̌nlɔn ɔ́;
é nɔ́ nɔ ɖɛ mɛ ɖo Mawu xomɛnyɔ́tɔ́ ɔ́ nukɔn
káká jɛ hwenu e nǔwiwa ɔ́ fó dó é.
20 Énɛ́ ɔ́, Sinmɔ́ɔ nɔ jɛ te sín vɔ̌sákpe ɔ́ jí;
é nɔ́ zé alɔ yi jǐ, bó nɔ́ kɛ nu
dó xo ɖɛ Aklúnɔ tɔn dó Izlayɛ́li kplékplé ɔ́ bǐ jí;
lě e é ɖó acɛ bó ná ylɔ́ Aklúnɔ nyíkɔ gbɔn é nɛ́.
21Agun kplékplé ɔ́ bǐ nɔ́ lɛ́ jɛ kpo,
bó ɖe kɔ́ bó ná dó mɔ ɖɛxixo Mawu Ajalɔ̌nlɔn ɔ́ tɔn yí.
Ɖɛxixo gǔdo tɔn ɔ́
22Din ɔ́, mi dó kú nú Mawu Nǔbǐwúkpétɔ́ ɔ́;
gbɔn fí bǐ ɔ́, é nɔ́ dó nǔ ɖaxó ɖaxó sin;
é bló bɔ mǐ su;
sín hwenu e è ko ji mǐ é ɖokpóó wɛ;
é kó ɖo xomɛnyínyɔ́ tɔn ɖe xlɛ́ mǐ wɛ.
23É ní ná mǐ ayij'ayǐ, bónú xomɛ mǐtɔn ní gba wɔ̌;
ní bó ná mǐ fífá din hwenu e mǐ ɖe é,
lě e é nyí gbɔn xóxó ɖ'ayǐ ɖo Izlayɛ́li é ɖɔhun.
24Xomɛnyínyɔ́ tɔn ní nɔ xá mǐ,
lobo hwlɛ́n mǐ gán ɖo azǎn lɛ́ɛ bǐ gbe ɖo gbɛ mǐtɔn mɛ.
Togun atɔn e wǎn gbɛ́ lɛ́ɛ
25Togun we wɛ ɖe bɔ un gbɛ́ wǎn ná,
bɔ atɔngɔ́ ɔ́, è nǎ xa ji bo lɛ́n ɛ dó togun kɛ́n mɛ lɔ ǎ.
26Yě mɛ e nɔ nɔ Seyíi sín sókan mɛ lɛ́ɛ é,
Filisitɛ́ɛn lɛ́ɛ kpódó togun ma ɖo ali ɖé nu
e nɔ́ nɔ Sikɛ́mu lɛ́ɛ kpán.
Bɛn Silaki kpódó wěma tɔn kpán
27Jezu ɖěe nyí Silaki ví, bó lɛ́ nyí Eleazáa ɖěe gosín Jeluzalɛ́mu é sín vǐvú ɔ́, wlán nǔ dó wěma élɔ́ mɛ bó dó kplɔ́n nǔ mɛ; Sɛ́núnywɛ́ kpódó nǔtunwuntunwun kpó kɛ́ɖɛ́ wɛ ká ɖ'é mɛ; nǔnywɛ́ e ɖo ayi tɔn mɛ é wɛ é fúnfún jǐ ɖɔhun. 28Nǔ nyɔ́ nú mɛ e ná nɔ́ wá xógbe élɔ́ lɛ́ɛ jí hwɛhwɛ é; mɛ e ná hɛn yě ayi mɛ é ná húzú nǔnywɛ́tɔ́.
29Nú é wa nǔ mlɛ́ yě ɔ́,
é ná ɖó hlɔ̌nhlɔ́n ɖo nǔ bǐ mɛ ɖo alɔkpa bǐ mɛ;
ɖó é ná nɔ́ sí Aklúnɔ ɖo afɔɖiɖe tɔn ɖokpó ɖokpó mɛ.
Currently Selected:
Silaki ví 50: FONDC
Highlight
Copy
Compare
Share
Want to have your highlights saved across all your devices? Sign up or sign in
La Bible en langue fon © Alliance Biblique du Bénin, 2012.