Silaki ví 49
49
Joziyási
1 Mɛ lɛ́ɛ nɔ́ flín Joziyási ɖi célu wǎnɖagbenɔ e
céluɖatɔ́ cá ɖó kpɔ́ é ɖɔhun;
lě e wǐin víví gbɔn é wɛ nyǐkɔ tɔn víví dó nu nú mɛ lɛ́ɛ bǐ gbɔn,
abǐ nǔxonú lɛ́ɛ ɖo nǔ ɖɔ wɛ hwɛncɛnhwɛncɛn
ɖo nǔɖutɛn ɖaxó ɖé ɖɔhun.
2Ali ɖagbe wɛ é mlɛ́ bó dó lílɛ́ togun ɔ́ kpan ta Aklúnɔ;
é sú kún dó nú nǔmɛsɛn baɖabaɖa lɛ́ɛ bǐ.
3É sɔ́ ayi tɔn ɖó Aklúnɔ jí;
hwenu e mɛ lɛ́ɛ ɖo kɔ ɖe dó sɛ́n tɔn wɛ ɔ́,
é sɔ́ tɛn nukɔntɔn ɔ́ jó nú Aklúnɔzɔ́ wiwa.
Judáa xɔ́sú e gbɔn gǔdo lɛ́ɛ é, gbeyíɖɔ Mawu tɔn Jelemíi
4Axɔ́sú lɛ́ɛ bǐ wɛ hu hwɛ ɖě jɛ ɖě gúdo;
Davídi, Ezekiyási kpódó Joziyási kpán
kɛ́ɖɛ́ jɛ́n má ɖ'é mɛ ǎ;
yě ɖe kɔ sín Mawu Ajalɔ̌nlɔn ɔ́ sín sɛ́n wú,
bɔ Judáa xɔ́sú lɛ́ɛ bǐ blí bú.
5Yě sɔ́ nǔwúkpíkpé yětɔn jó nú akɔta ɖěvo lɛ́ɛ,
bó sɔ́ susu yětɔn nú to e ma nyí yětɔn ǎ é.
6 To mímɛ́ e Mawu ɖe alɔ bo sɔ́ é ɔ́,
kɛntɔ́ yětɔn lɛ́ɛ dó zo;
ɖi lě e Jelemíi ko ɖɔ gbɔn ɖ'ayǐ é ɔ́,
è sɔ́ mɔ gbɛtɔ́ xɛ ɖo ali tɔn lɛ́ɛ xo ǎ.
7Mɛ énɛ́ lɛ́ɛ dó ya n'i ɖésú,
có Aklúnɔ kó sɔ́ ɛ gbeyíɖɔ Mawu tɔn xóxó cóbɔ è wǎ ji i;
nú é ná dó hɔn ɖɔ nú nǔ zin dɛ́, bó mu nǔ zin dɛ́,
lobo sú nǔ sín kún dó é;
lo ɔ́, é ká ná lɛ́ mɛ nǔ, bó ná lɛ́ tun nǔ.
Ezekiyɛ́li
8 Ezekiyɛ́li wɛ nyí mɛ e mɔ
susu Aklúnɔ tɔn ɖó nukún wú é;
ahwankɛkɛ́ Mawu wɛnsagun tɔn
sín ta nu wɛ é ɖe susu énɛ́ ɔ́ xlɛ́ ɖe.
9Jǐ ɖaxó ɖé mɛ wɛ Aklúnɔ flín kɛntɔ́ lɛ́ɛ ɖe,
ɖó ɖagbe ná wa nú mɛ e nɔ xwedó ali jlɔ́jlɔ́ lɛ́ɛ é wú.
Gbeyíɖɔ Mawu tɔn wěwe lɛ́ɛ
10 Gbeyíɖɔ Mawu tɔn wěwe lɛ́ɛ sín xú
ɖo yɔdo yětɔn lɛ́ɛ mɛ tɛgbɛ;
Aklúnɔ ní bó ɖe nyǐ mɛ ɖěvo bo fɔ ɖo tɛn yětɔn mɛ bó!
Nǔgbó ɔ́, yě ná akɔ́nkpinkpan togun Jakɔ́bu tɔn ɔ́,
lobo ka hwlɛ́n ɛ gán ɖó yě nɔ́ nukúnɖíɖó mɛ tɛgbɛ;
Zolobabɛ́li kpódó Yecúwa kpán
11 Nɛ̌ mɔ̌ wɛ è sixú kɛ nu dó
avɔsísɔ́ Zolobabɛ́li tɔn wú gbɔn tawun?
Zǒgbe dó nǔ jí sín wuntun ɖɔhun wɛ
é cí ɖo aɖisílɔ Aklúnɔ tɔn mɛ.
12 Nǔ ɖokpó ɔ́ wɛ é nyí nú Yecúwa Yosadáki ví ɔ́ lɔmɔ̌;
yě mɛ we lɛ́ɛ bǐ wɛ vɔ́ Sinsɛnxɔ
Aklúnɔ tɔn ɔ́ gbá ɖo hwenɛ́nu;
yě bló tɛn mímɛ́ ɖokpó nú Aklúnɔ ɔ́,
bɔ é ná kpo sácí gbeɖé ǎ.
Nɛɛmíi
13 Nɛɛmíi lɔmɔ̌ jó flín ɖaxó ɖé nyi ayǐ;
é vɔ́ dǒ e mu ɖo toxo mǐtɔn mɛ lɛ́ɛ é bǐ mɛ;
é lɛ́ dó hɔn lɛ́ɛ kpó cávi yětɔn lɛ́ɛ kpán;
bó lɛ́ vɔ́ xwé mǐtɔn lɛ́ɛ gbá.
Henɔ́ci, Jozɛ́fu kpódó daágbó nukɔntɔn lɛ́ɛ kpán
14Mɛ ɖěbǔ ɖi Henɔ́ci ɖo mɛ e Aklúnɔ nɔ́ ɖó
nyi ayǐkúngban jí lɛ́ɛ é mɛ ǎ;
é zé é lɔmɔ̌ yi zɔ nú ayǐkúngban ɔ́.
15Mɔ̌ ɖokpó ɔ́ wɛ mɛ ɖěbǔ
má ká lɛ́ cí Jozɛ́fu ɖɔhun ǎ é nɛ́;
é wɛ ɖu gǎn ɖo nɔví tɔn lɛ́ɛ nu;
é hɛn sɔ togun tɔn;
è wa cyɔnú tɔn kpó sísí ɖaxó kpán.
16Sɛ́mu kpó Sɛ́ti kpó kpo sácí ɖo gbɛtɔ́ lɛ́ɛ mɛ ǎ;
nǔ ká ɖo mɔ̌ có Adámu wɛ ka ɖo aga
nú nǔgbɛɖe e Aklúnɔ ɖó lɛ́ɛ é bǐ.
Currently Selected:
Silaki ví 49: FONDC
Highlight
Copy
Compare
Share
Want to have your highlights saved across all your devices? Sign up or sign in
La Bible en langue fon © Alliance Biblique du Bénin, 2012.