Silaki ví 47
47
Gbeyíɖɔ Mawu tɔn Natáan kpódó axɔ́sú Davídi kpán
1 Ée Samuwɛ́li wá yi gúdo é ɔ́,
Natáan wɛ nyí gbeyíɖɔ Mawu tɔn ɖo Davídi hwenu.
2 Ɖo kɔnɖókpɔ́vɔ́sísá ɖokpó hwenu ɔ́,
nǔ e nyɔ́ é wɛ è nɔ sɔ́; énɛ́ nyí jǒ ɔ́ nɛ́;
mɔ̌ ɖokpó ɔ́ wɛ è sɔ́ Davídi lɔ ɖó vo
ɖo Izlayɛ́li ví lɛ́ɛ mɛ é nɛ́.
3Nú éyɛ́ Davídi ɔ́, lě e alɔ ɖó gbɔ̌ wú
bó sɔ́ má vɛ́ wǔ ɖěbǔ a é wɛ alɔ ɖó kinnikínní jawuntá wú,
bó sɔ́ ma ɖi nǔɖé n'i ǎ é nɛ́,
bɔ lě e alɔ ɖó lɛ̌ngbɔ́ wú bó wlí ma vɛ́ wǔ ɖěbǔ ǎ é wɛ
alɔ ɖó adǎnkanlin wú bó wlí má cí nǔɖé ɖɔhun n'i ǎ é nɛ́.
4Hwenu e Davídi ɖo wǐnnyáwínnyá mɛ é ɔ́,
é hu nya sakasaka ɖé;
lě e è ba hlɔn nú zun e è zun Izlayɛ́li togun ɔ́ gbɔn é nɛ́;
klohwán ɖokpó jɛ́n è da bo zin Goliyati,
nya goyítɔ́ ɖaxó nɛ́ ɔ́ dɛ́;
nya énɛ́ e goyíyí kɛ́ɖɛ́ gɔ́ é.
5Davídi sú xó ylɔ́ Mawu Ajalɔ̌nlɔn ɔ́,
bɔ éyɛ́ ká dó hlɔ̌nhlɔ́n alɔ tɔn ɖisí ɔ́ mɛ,
bɔ é dó sú mɛ e tunwun ahwan xéɖéxéɖé é sín kún dó,
bó ná dó fɔ́n nǔwúkpíkpé togun tɔn tɔn ɖó te.
6Nǔ e wú wɛ mɛ lɛ́ɛ nɔ́ sɔ́ ɛ su ɖi nǔ ɖɔ
gbɛtɔ́ wɔ̌buwɔ́bú wɛ é hu ɖɔhun é nɛ́;
yě nɔ́ xomlá ɛ dó han mɛ bó nɔ́ dó dó kú nú Aklúnɔ;
yě xwe gǎngbákún n'i.
7Nǔgbó ɔ́, Davídi sú kɛntɔ́ e lɛ́ dó e gbɔn fí bǐ lɛ́ɛ é sín kún dó;
é gba Filisitɛ́ɛn e húzú kpan ta ɛ lɛ́ɛ é bǐ dó;
bɔ yě sɔ́ kpé nǔ ɖěbǔ wú káká wá tɔ́n éhɔ́nmɛ ǎ.
8Mawumímɛ́, Mawu Ajalɔ̌nlɔn ɔ́ wɛ
Davídi sɔ́ su ɖo nǔwiwa tɔn lɛ́ɛ bǐ mɛ;
é kpa susu n'i;
é ji han dó kpa Mawu kpódó ayi tɔn bǐ kpán;
lě e é ɖe wǎn e é yí nú mɛ e ɖó e é xlɛ́ gbɔn é nɛ́.
9É dó nǔxogbɛ́ta lɛ́ɛ wá,
bónú è nǎ nɔ́ se han ɖagbe ɖagbe lɛ́ɛ ɖo vɔ̌sákpe ɔ́ nukɔn.
10É wlí yɛ̌yi nú sinsɛnxwe lɛ́ɛ
bɔ yě jɛ acɔ́ lobo hwɛ́n nǔjɔnǔ;
é jló ɖɔ è nǐ sɔ́ nyǐkɔ Aklúnɔ tɔn d'aga,
lobo nú zǎnzǎn tɛɛn ɔ́,
è nǎ nɔ́ se han kpódó nǔxixo kpó ɖo tɛn mímɛ́ ɔ́ mɛ.
11Aklúnɔ sɔ́ Davídi sín hwɛ lɛ́ɛ bǐ kɛ ɛ;
é bló bɔ é fɔ́n ɔ́, é nɔ́ ɖo nǔ wú kpé wɛ tɛgbɛ;
é jɛ axɔ́sú sín akɔ xá ɛ;
é bló bɔ acɛkpikpa tɔn lí dǒ ɖo Izlayɛ́li to ɔ́ bǐ mɛ.
Salomɔ́ɔ
12Ée Davídi wá yi gúdo ɔ́,
vǐ tɔn ɖokpó wɛ jɛ tɛn tɔn mɛ;
gbɛtɔ́ nǔnywɛ́tɔ́ bǔ wɛ;
Aklúnɔ nya xɛ ɖo jǐ tɔn ɖó Davídi wú.
13 Axɔ́sú Salomɔ́ɔ hwenu ɔ́ nyí hwenu fífá ɖé;
Aklúnɔ ná ɛ vivo ɖo dogbó tɔn lɛ́ɛ bǐ jí;
hwenɛ́nu wɛ Salomɔ́ɔ wá kpé wú
bó gbá Sinsɛnxɔ ɖokpó nú Aklúnɔ;
é bló tɛn mímɛ́ ɖokpó n'i nú tɛgbɛ gbe.
14Salomɔ́ɔ, nǔnywɛ́tɔ́ titewungbe wɛ
a nyǐ ɖo wǐnnyáwínnyá mɛ towe;
nǔnywɛ́ kpé we bó zɛ xwé wú lě e tɔ nɔ gɔ́ bó nɔ́ gba é ɖɔhun.
15Nǔtunwuntunwun towe lɛ́ɛ kpé ayǐkúngban ɔ́ bǐ jí;
xójíwǔ kɛ́ɖɛ́ wɛ a ɖɔ kɔn nyi gbɛ ɔ́ mɛ.
16Nǔsúɖaxó wɛ a nyǐ káká yi tɔtɛ́ntinto e ɖo zɔ lɛ́ɛ é bǐ mɛ;
mɛ lɛ́ɛ yí wǎn nú we ɖó fífá e a hɛn wá é wú.
17Gbɛ ɔ́ bǐ wɛ, han e a nɔ ji lɛ́ɛ, lǒ e a nɔ dó lɛ́ɛ,
xó e a nɔ ɖɔ lɛ́ɛ kpódó xósin e a nɔ ná mɛ lɛ́ɛ é kpán nɔ́ hɛn ayi ná.
18 Ɖo nyǐkɔ Aklúnɔ Mawu ɖěe
è nɔ ylɔ́ ɖɔ Mawu Izlayɛ́li tɔn é tɔn mɛ ɔ́,
a bɛ̌ siká kplé aflélégan ɖɔhun kpɔ́ gégé kpowun;
a to kpatágan kplé kpɛ́n e è nɔ dó nú ɖɔ é ɖɔhun.
19 Có nyɔ̌nu lɛ́ɛ wɛ a sɔ́ agbaza towe jó ná,
lobɔ gbɔn agbaza towe jí ɔ́, a húzú kannumɔ yětɔn.
20Gbɔn mɔ̌ ɔ́, a ɖǒ blɔ̌ ninɔmɛ towe wú;
a dɔn hɛ̌nnumɔ towe lɛ́ɛ bǐ kwíji,
bó dó dɔn xomɛsin Aklúnɔ tɔn dó yě jí;
taɖunɔ núwiwa towe zɔ́n bɔ wǔ kú yě.
21 Nǔgbó ɔ́, axɔ́súɖuto towe má ɖó we;
axɔ́súɖuto gǔfɔ́ntɔ́ ɖokpó sí te sín Eflayímu sín akɔta mɛ.
22 Lo ɔ́, Aklúnɔ wɔn xomɛnyínyɔ́ tɔn gbeɖé ǎ;
é gɔn akpá e é dó lɛ́ɛ é ɖe gbeɖé ǎ;
mɛ e é ɖésú kpɔ́n bó sɔ́ é ɔ́,
é lɔn nú hɛ̌nnu tɔn bú nyǐ gbeɖé ǎ;
mɛ e ɖe wǎn e é yí n'i é xlɛ́ é ɔ́, é sú vǐ tɔn lɛ́ɛ sín kún dó ǎ;
é zɔ́n bɔ mɛ lɛ́ɛ gbɛ́ kpo ɖo gbɛ ɖo Jakɔ́bu sín togun mɛ;
mɔ̌ ɖokpó ɔ́, mɛ e jɔ sín Davídi wú lɛ́ɛ é wɛ è fɔ ɖó tɛn tɔn mɛ.
Hlobowámu kpó Jelobowámu kpó
23 Énɛ́ gúdo ɔ́, Salomɔ́ɔ wá yi su Daágbó tɔn lɛ́ɛ ɖo yɔ mɛ;
éyɛ́ gúdo ɔ́, hɛ̌nnumɔ tɔn ɖokpó wɛ é sɔ́ ɖó tɛn tɔn mɛ;
nya énɛ́ ɔ́ ɖó nǔnywɛ́ vo ɖé ǎ,
lobɔ taɖunɔ núwiwa tɔn ká flá.
Nǔgbó ɔ́, Hlobowámu wá ɖe gbeta ɖokpó tɔ́n,
bɔ é zɔ́n bɔ togun ɔ́ bǐ fɔ́n gǔ.
Bɔ Jelobowámu Nɛbati ví ɔ́
wá dɔn akɔta e ɖo Totaligbé lɛ́ɛ é dó hwɛ mɛ;
é xlɛ́ nǔ nyanya sín ali
mɛ e ɖo axɔ́súɖuto Eflayímu tɔn mɛ lɛ́ɛ é.
24Hwɛ yětɔn lɛ́ɛ gba kpé káká
bɔ è gbɔ bó tún to nú yě yi fí línlín.
25Nǔ nyanya wiwa yětɔn sukpɔ́ káká
bɔ è gbɔ bo wá dɔn tó nú yě.
Currently Selected:
Silaki ví 47: FONDC
Highlight
Copy
Compare
Share
Want to have your highlights saved across all your devices? Sign up or sign in
La Bible en langue fon © Alliance Biblique du Bénin, 2012.