Silaki ví 46
46
Jozuwée kpó Kalɛ́bu kpó
1 Jozuwée Nunu ví ɔ́, ahwanfuntɔ́ gláglá ɖokpó wɛ;
é wɛ nyí gbeyíɖɔ e jɛ Mɔyízi gúdo tlóló é;
nyǐkɔ ɔ́ jɛ xá ɛ ganjí;
nǔgbó ɔ́, Aklúnɔ sɔ́ ɛ dó
ɖó hwlɛngántɔ́ ɖaxó ɖé nú togun e é cyán é;
é ɖu ɖo kɛntɔ́ e sí te dó jǐ tɔn lɛ́ɛ é jí;
é bló bɔ togun Izlayɛ́li tɔn ɔ́ lɛ́ wá to tɔn mɛ.
2Nyǐkɔ tɔn yi aga ɖésú hwenu e é ɖe alɔ
bó sún dɛnkpe tɔn bó húzú kpan ta toxo ɖaxó lɛ́ɛ é.
3Mɛ ɖé kpan akɔ́n éyɛ́ ɖɔhun bɔ è mɔ kpɔ́n ǎ;
Nǔgbó wɛ, é wɛ nɔ Aklúnɔ sín ahwan lɛ́ɛ nu.
4É wɛ ɖe gbe bɔ hwesivɔ́ nɔ te,
bɔ kéze wá ɖi ga hú lě e é kó nɔ ɖi gbɔn é donu we.
5Hwenu e kɛntɔ́ tɔn lɛ́ɛ wá lɛ́ lɛ̌ dó e,
lobo jɛ́n ɛ gbɔn fí bǐ é ɔ́,
é sa vo nú Mawu Ajalɔ̌nlɔn Nǔbǐwúkpétɔ́ ɔ́;
bɔ Aklúnɔ ká yí gbe n'i sín jǐxwé;
é nyi kɛ́n laglásinɔ, hlɔ̌nhlɔ́n má ɖó jlɛ̌ ɖo wǔ nɔ ɖé lɛ́ɛ sɛ́ dó.
6Jozuwée zɔn ahwangɔnu kɛntɔ́ lɛ́ɛ tɔn jí;
é hu mɛ e húzú kpan ta ɛ lɛ́ɛ ɖo dodo Bɛtolɔ́ɔn tɔn mɛ;
nǔgbó ɔ́, é nyɔ́ nú togun ɖě lɛ́ɛ e kó li za xá Aklúnɔ wá yi lɛ́ɛ é
ní tunwun ahwanlyánnú énɛ́ lɛ́ɛ,
ɖó é nɔ́ xwedó nǔzɔ́nmɛ
Aklúnɔ Nǔbǐwúkpétɔ́ ɔ́ tɔn lɛ́ɛ tɛ́nwínlɛnwín.
7 Jozuwée ko ɖe gbejíninɔ tɔn xlɛ́ sín Mɔyízi hwenu ɖokpóó;
Kalɛ́bu Yefúnnɛ́ɛ ví ɔ́ lɔmɔ̌ ká ɖe xlɛ́;
agunkplékplé ɔ́ tɔn e jí yě má wa nǔ ɖó ǎ é zɔ́n
bɔ togun ɔ́ sɔ́ sixú fɔ́n gǔ dó Aklúnɔ jí ǎ;
lobɔ xó má sɔgbe ɖɔ dó mɛ wú kún ká lɛ́ sú dó.
8Ɖo sɔ́ja afɔzɔntɔ́ adɔ̌kpo gban (600.000) lɛ́ɛ mɛ ɔ́,
yě mɛ we lɛ́ɛ kɛ́ɖɛ́ wɛ gán,
bɔ yě kpé wú bó kplá togun e nyí Aklúnɔ tɔn é yi
to e ɖó ná nyí yětɔn é mɛ;
to énɛ́ e anɔ̌sin kpódó wǐin akú kpó gɔ́ bó túnflá é.
9Aklúnɔ ná hlɔ̌nhlɔ́n ɖaxó ɖé Kalɛ́bu;
é lɛ́ kpé to e ɖo sókan mɛ lɛ́ɛ é wú bó gba ɖo kpikpomɛ tɔn,
bɔ hɛ̌nnumɔ tɔn lɛ́ɛ sɔ́ dó ɖó gǔ yětɔn lobo hɛn gbánwúngbánwún.
10Gbɔn mɔ̌ ɔ́, Izlayɛ́li ví lɛ́ɛ bǐ wá mɔ ɖɔ
Aklúnɔ xwedó ɔ́, nǔ ɖagbe ɖésú wɛ.
Hwɛɖɔtɔ́ lɛ́ɛ
11 Mi nú mǐ ná ɖɔ xó dó hwɛɖɔtɔ́ lɛ́ɛ lɔmɔ̌ wú;
ɖokpó ɖokpó yětɔn wɛ nyí mɛ nukúnɖéjí yětɔn yětɔn;
yě ɖe ayi yětɔn sín Aklúnɔ wú
bó yi sɛn nǔmɛsɛn e ma nyí Mawu nǔgbó tɔn ǎ lɛ́ɛ é ǎ;
mi nú mǐ ná flín yě bó dó kú nú Aklúnɔ.
12Xú yětɔn lɛ́ɛ ɖo yɔdo yětɔn lɛ́ɛ mɛ tɛgbɛ;
é ɖo mɔ̌ có, Aklúnɔ ní bó ɖe nyǐ
mɛ e ná wa nǔ yětɔn ɖɔhun jɛ gǔdo yětɔn lɛ́ɛ é;
yě lɔ ní nyí mɛ ma kpo sácí ɖo vǐ yětɔn lɛ́ɛ mɛ.
Samuwɛ́li
13 Samuwɛ́li ɔ́, Aklúnɔ tɔn yí wǎn n'i;
gbeyíɖɔ tɔn wɛ é kó nyí,
é sɔ́ gǎnɖuɖu tɔn jínjɔ́n ayǐ;
é sɔ́ gǎn ɖé lɛ́ɛ ɖó togun ɔ́ nu nú yě ná xlɛ́ ɛ ali.
14Aklúnɔ sɛ́n ɔ́ wɛ é nɔ́ xwedó
dó ɖɔ hwɛ xá agunkplékplé ɔ́,
bɔ Aklúnɔ nɔ́ nyi kɔ kpɔ́n Jakɔ́bu xwédo ɔ́.
15Gbejíninɔ tɔn ɖe xlɛ́ ɖɔ gbeyíɖɔ jɔ gbeyíɖɔ wɛ é nyí;
è mɔ ɖo xó tɔn lɛ́ɛ mɛ ɖɔ nǔmɔtɔ́ jiɖedéwú wɛ é nyí.
16Hwenu e kɛntɔ́ lɛ́ɛ lɛ́ dó e gbɔn fí bǐ é ɔ́,
é sú xó ylɔ́ Aklúnɔ Nǔbǐwúkpétɔ́ ɔ́;
é sɔ́ lɛ̌ngbɔ́ wínnyáwínnyá ɖokpó dó sá vɔ̌ n'i.
17Hwenɛ́nu ɔ́, Aklúnɔ ɖe gbe bɔ jǐ dó gbe;
é kɛ nu kpó zǐngídi ɖaxó ɖé kpán bɔ è se gbe tɔn.
18É sú gǎn e kpó é kpó ma ɖo ganjí ǎ lɛ́ɛ é
kpódó Filisitɛ́ɛn lɛ́ɛ sín gǎn lɛ́ɛ bǐ kpán sín kún dó.
19Hwɛ̌ cóbónú é ná dɔ́ kú mlɔ nú tɛgbɛ gbe ɔ́,
é ɖe kúnnu ɖo Aklúnɔ kpódó axɔ́sú ɔ́ kpán nukɔn ɖɔ:
“Un yí mɛɖé nú ɖé sín así tɔn gbeɖé kpɔ́n ǎ;
káká jɛ afɔkpa tɔn ɖésú jí.”
Hwɛ̌ lɔ ɔ́, mɛɖé mɔ nǔɖé bó ɖɔ dó wǔ tɔn kpɔ́n ǎ.
20É kó dɔ́ kúmlɔ cóbó ká lɛ́ ɖɔ xó gbeyíɖɔ ɖɔhun,
bó dó ɖɔ lě e axɔ́sú ɔ́ sín gbɛ ná fó gbɔn é n'i.
Ayǐkúngban glɔ́ do wɛ gbe tɔn ɖi sín;
é lɛ́ ɖɔ xó dó Mawu nyíkɔ mɛ,
bó ná dó súnsún togun ɔ́ sín hwɛ lɛ́ɛ.
Currently Selected:
Silaki ví 46: FONDC
Highlight
Copy
Compare
Share
Want to have your highlights saved across all your devices? Sign up or sign in
La Bible en langue fon © Alliance Biblique du Bénin, 2012.