Silaki ví 43
43
Jǐnukúnsin kpó hwe kpó
1Ɖo aga dɔ̌n ɔ́, jǐnukúnsin ɔ́ ɖó acɔ́ bó nyɔ́ kpɔ́n;
é gɔ́ nú wěziza kɛ́ɖɛ́;
ényí mi mɔ ɛ ɖo wěziza nu ɔ́,
ɖɛkpɛ tɛ́ tántánsín é ká nyɔ́ lě e!
2Hwe ɔ́ tɔ́n bó ná sí te lě tlóló ɔ́,
é nɔ́ ɖo lě e nǔwiwa
Mawu Ajalɔ̌nlɔn ɔ́ tɔn lɛ́ɛ nyí nǔ bó jɛ acɔ́ gbɔn é jlá wɛ.
3É su hwemɛ cíɖíɖí ɔ́,
hwe nɔ́ ɖa ayǐkúngban ɔ́, bɔ é nɔ́ sɛ́ gáɖágáɖá;
mɛ̌ wɛ ká ná glá bó ná nɔ te ɖo zozo tɔn nu?
4Ayǎtɔ́ gbɛdɛ́ nɔ́ xo zo dó nǔ ɖó azɔ̌ tɔn ná wa wú,
có hwesivɔ́ e nɔ́ mɛ ta nú só lɛ́ɛ é lɛ́ syɛ́n hú mɔ̌ donu atɔn.
É nɔ́ sɛ́ yǒzo tɔn gláglá ɔ́ dó;
ényí é ɖe gǎ tɔn lɛ́ɛ zɛ hwɛ ɔ́, é nɔ́ gba nukún mɛ.
5Aklúnɔ e ɖó hwe, lobo lɛ́ zɔ́n ɛ
ɖɔ é ní gbɛ kan dó wezun tɔn nu é ɔ́ d'agba ɖésú.
Sun
6Sun ɔ́ lɔmɔ̌ ɔ́, hwe tɔn nu su ɔ́,
é nɔ́ sí te tɛgbɛ;
é nɔ́ ɖó hwenu lɛ́ɛ,
bó nɔ́ xlɛ́ hwenu e ɖo wǐwá yi wɛ é.
7Nǔ énɛ́ e nɔ́ sɛ wǔ xwe,
bó nɔ́ lɛ́ blíbú é wɛ è nɔ dó lɛ́n xwezán lɛ́ɛ ná.
8Sun wɛ ná nyǐkɔ sunzán;
nú é lɛ́ wá jǐ bó kpé ká ɔ́,
nǔ jɛ acɔ́ ɖé wɛ é nɔ́ nyí;
wěziza wɛ é nyí nú ahwangɔnu sunví e
ɖo kínkɔ́n wɛ ɖo jǐxwé aga dɔ̌n lɛ́ɛ é bǐ.
Sunví lɛ́ɛ
9Kínkɔ́n nyɛ́nɛ́nɛ́ sunví lɛ́ɛ tɔn wɛ nɔ́ ɖó acɔ́ nú jǐnukúnsin;
wěziza yětɔn mɛ wɛ Aklúnɔ nɔ́ xɔ susu ɖe.
10Fí e Aklúnɔ mímɛ́ ɔ́ jló ɖɔ yě ní nɔ é wɛ yě nɔ́ nɔ;
ɖokpó yětɔn nɔ́ jó tɛn tɔn mɛ dó ǎ.
Nyǐ
11Kpɔ́n nyǐ e nɔ́ ɖi é sɛ́ dó jǐxwé bó ká dó kú nú mɛ e ɖó e é;
ɖɛkpɛ e sɛ́ ná ɛ ɔ́ jɛ ɛ.
12É nɔ́ sín togoo wěziza tɔn ɖo jǐxwé;
Mawu Ajalɔ̌nlɔn ɔ́ wɛ dlɛ́n ɛ ɖó mɔ̌ kpó alɔ tɔn kpó.
Gbɛ ɔ́ kpaa mɛ
13Aklúnɔ zɔ́n bɔ kɛ́njí ja kɔn nyi ayǐ;
gbeɖiɖe tɔn mɛ wɛ jǐ nɔ́ kɛwun ɖe.
14Nǔ e wú wɛ nǔ e é gbohwlá bó sɔ́ ɖó kɛ́n lɛ́ɛ é hun nu,
bɔ akpɔ́kpɔ́ lɛ́ zɔn xɛ ɖɔhun é nɛ́.
15Nǔwúkpíkpé Aklúnɔ tɔn nɔ́ zɔ́n
bɔ akpɔ́kpɔ́ lɛ́ɛ nɔ́ syɛ́n;
yě nɔ́ gba lobo nɔ húzú kɛ́n.
17aSo tɔn dó gbe ɔ́, ayǐkúngban ɔ́ nɔ́ húnhún.
16Aklúnɔ wá tɔ́n ɖo hweɖěbǔnu ɔ́, só lɛ́ɛ nɔ́ sísɔ́;
nú é ɖe gbe hweɖěbǔnu ɔ́,
jɔhɔn nɔ sí te sín afɔligbé.
17bAbǐ jɔhɔn gugu totaligbé tɔn,
abǐ éé nɔ́ fɔ́n sín xu mɛ é nɔ́ nyi.
Ɖi lě e xɛ lɛ́ɛ nɔ́ ɖó dó kɔ́ mɛ é
ɖɔhun wɛ Aklúnɔ nɔ́ bló bɔ kɛ́njí nɔ́ ja gbɔn;
é nɔ́ kɔn nyi ayǐ lě e wɛn nɔ zɔn kpɔ́
bó nɔ́ wá vun blá ayǐkúngban jí é ɖɔhun.
18Wěwé pépé nǔɖé má fán d'é mɛ tɔn nɔ́ nyɔ́ kpɔ́n,
bɔ è ka ɖo mimɔ ɛ wɛ nú é ɖo ayǐ kɔn nyi wɛ lě ɔ́, xomɛ nɔ hun mɛ.
19Aklúnɔ nɔ́ lɛ́ fúnfún laglási wínníwínní ɖé lɛ́ɛ kɔn nyi ayǐ ɖi jɛ ɖɔhun;
fífá ɔ́ nɔ́ hɛn ɛ bɔ é nɔ́ húzú wun wínníwínní ɖé lɛ́ɛ.
20Nú jɔhɔn fífá totaligbé tɔn jɛ nyinyi jí hweɖěbǔnu ɔ́,
laglási nɔ tɔ́n ɖo sin nukún mɛ;
jɔhɔn énɛ́ ɔ́ nɔ́ nyi gbɔn sin bǐ jí,
bó nɔ́ cyɔ́n ɛ gǎglónú e ahwanfuntɔ́ lɛ́ɛ nɔ́ hɛn é ɖɔhun.
21Jɔhɔn zozo ɔ́ nɔ́ gblé nǔ ɖo só lɛ́ɛ wú,
bɔ gbětótló mɛ bǐ nɔ́ xú;
é nɔ́ sú atín lɛ́ɛ kpódó gběhan lɛ́ɛ kpó sín kún dó ɖi zo ɖɔhun.
22Lo ɔ́, akpɔ́kpɔ́ fífá sin ɖ'é mɛ ɔ́ nɔ́ yá wǔ ba ama bó nɔ́ dó azɔn nɛ́ ɔ́;
yǒzo hɛɛ wá yi vɔ ɔ́, ahǔn nɔ́ lɛ́ hɛn xomɛhunhun wá.
23Ɖo Aklúnɔ sín tito mɛ ɔ́, é ɖu ɖo xu lɛ́ɛ jí,
lobo ɖó tɔtɛ́ntinto lɛ́ɛ ɖó fínɛ́.
24Mɛ e nɔ gbɔn xu jí yi tomɛ lɛ́ɛ é nɔ́ ɖɔ awǒvinú e ɖ'é mɛ lɛ́ɛ é.
Tan yětɔn lɛ́ɛ nɔ́ kpácá mǐ ɖésú.
25Nǔ baɖabaɖa kpódó ɖagbe ɖagbe lɛ́ɛ kpán,
kanlin alɔkpa alɔkpa lɛ́ɛ bǐ,
kanlinjíwǔ xu mɛ tɔn lɛ́ɛ bǐ ɖo tɛn énɛ́ lɛ́ɛ mɛ. 26Gbɔn acɛ tɔn mɛ ɔ́,
nǔ e é ɖésú Mawu ɔ́ sɛ́ dó lɛ́ɛ é ɖěbǔ nɔ́ cí ali ǎ,
bǐ nɔ́ ɖo te gbɔn xó tɔn ɖiɖɔ gbla mɛ.
27Mǐ hɛn ɔ́, mǐ ná lɛ́ sɔ́ hwenu gěgé dó lɛ́ ɖɔ xó ná,
có mǐ ká ná kpé nǔ bǐ wú bó ɖɔ ǎ;
ta sú nú xó mǐtɔn lɛ́ɛ ɔ́ wɛ nyí ɖɔ Aklúnɔ nyí nǔ bǐ.
28Fítɛ́ è ka sixú ba hlɔ̌nhlɔ́n e è nǎ kpa susu n'i é sín?
Mawu Aditi ɖěe d'agba hú nǔ e é ɖó lɛ́ɛ é bǐ é wɛ é nyí.
29Aklúnɔ ɔ́ jí wǔ, bɔ agbadídó tɔn zɛ xwé wú;
nǔwúkpíkpé tɔn nɔ́ kpácá.
30Bó ná dó kpa susu nú Aklúnɔ ɔ́,
mi ji han dó mlá avɔsísɔ́ tɔn lě e mi kpé wú gbɔn é;
có é ná kpo ɖo taga hú mi wɛ tɛgbɛ.
Mi zán hlɔ̌nhlɔ́n mitɔn bǐ dó mlá avɔsísɔ́ tɔn dó han mɛ;
agbɔ̌n má kpé mi d'é wú ó,
ɖó mi sixú ɖo nǎ fó wɛ gbeɖé ǎ.
31Mɛ̌ wɛ mɔ Aklúnɔ ɔ́ ɖó nukún wú kpɔ́n bó hɛn ɔ́, é ná ɖɔ xó dó wǔ tɔn?
Mɛ̌ wɛ ká sixú kpé wú bó ná sɔ́ ɛ su lě e é jɛ xá ɛ gbɔn é?
32Nǔwiwa tɔn kwín we ɖé kpowun mɔ wɛ jɛ́n mǐ ɖe;
lo ɔ́, nǔ tobutóbú e kpo bɔ mǐ má mɔ ǎ lɛ́ɛ é lɛ́ d'agba hú mɔ̌.
33Nǔgbó wɛ, Aklúnɔ wɛ ɖó nǔ bǐ;
é ná Sɛ́núnywɛ́ mɛ e nɔ nɔ gbejí n'i lɛ́ɛ é.
Currently Selected:
Silaki ví 43: FONDC
Highlight
Copy
Compare
Share
Want to have your highlights saved across all your devices? Sign up or sign in
La Bible en langue fon © Alliance Biblique du Bénin, 2012.