Silaki ví 42
42
1Nǔ e mi se é vɔ́ ɖɔ kpódó xó xomɛ e
è ɖɔ nú mi lɛ́ɛ é ɖɔ tɔ́n kpó ní hu winnyá nú mi.
Énɛ́ ɔ́, mi ná tunwun nǔ e nyí winnyá ɖuɖu nǔgbó tɔn é,
bɔ mɛ bǐ ná mɔ hwɛjijɔ nú mi.
Winnyá tófwe ɖuɖu
Amɔ̌, nǔ e un ná ɖɔ nú we lɛ́ɛ é má hu winnyá nú we ó.
Ma wa nǔ nyi do gbɔn mɛ ɖé klán ɖó vo nú mɛɖé gbla mɛ ó.
2Tónú se nú sɛ́n ɔ́ kpódó gbejí nɔ nú akɔ e
Mawu Ajalɔ̌nlɔn ɔ́ jɛ xá we é kpán ní má hu winnyá nú we ó.
Hwɛjijɔ dó nú mɛ e gbɛ́ wǎn nú Aklúnɔ,
ɖo nǔ e mɛ é má ɖó alɔ ɖe ǎ é ní má hu winnyá nú we ó.
3Akwɛ́ xó kpé xá xɔ́ntɔn, abǐ mɛ e kpó mɛ kpó nɔ́ yi tomɛ é,
abǐ gǔ e nyí towe é má xá mɛ ɖěvo ma hu winnyá nú we ó.
4Nǔdagan e ɖo gbejí ɔ́ ɖíɖó, le kpɛɖé abǐ gěgé ɖuɖu má hu winnyá nú we ó.
5Ajɔ̌nú towe lɛ́ɛ sisa bo ɖu le ɖ'é jí ní má hu winnyá nú we ó;
tó dɔn nú vǐ towe lɛ́ɛ tlítlí ní má hu winnyá nú we ó;
mɛsɛntɔ́ nyanya xixo káká,
bó gblé wǔ i ní má hu winnyá nú we ó.
6Ényí asi towe nyí nǔdobatɔ́
abǐ nú gbɛtɔ́ má ɖó jiɖiɖe d'é wú
gěgé ɖo xwé towe gbe hǔn,
bo sɛ nǔ towe lɛ́ɛ xwe dó fí ɖé lobo sú hɔn dó.
7Cóbónú a nǎ zɔ́n akwɛ́ hɛn mɛɖé hǔn,
to xa ganjí hwɛ̌, lobo ka lɛ́ da ɖo ganjí;
nǔ e sɔ́ jó wɛ a ɖe é
kpó nǔ e yí wɛ a ɖe é kpó ɔ́, dǒ wěma mɛ.
8Tó dɔn nú mɛ e ma bí ǎ é, ayimasɔgbenánɔ
abǐ degénɔ kpikpoe e nɔ́ ɖo xó ɖó
xá mɛ bǐ kpaa lɛ́ɛ é ní má hu winnyá nú we ó;
énɛ́ ɔ́, a nǎ ɖe xlɛ́ ɖɔ émí se kplɔ́n ganjí,
bɔ mɛ bǐ ná mɔ hwɛjijɔ nú we.
Nǔ e nɔ́ hɛn hǔn nú vǐtɔ́ dó vǐ tɔn nyɔ̌nu wú lɛ́ɛ
9 Vǐ nyɔ̌nu nɔ́ ná linkpɔ́n gěgé tɔ́ tɔn;
é ná bó má kɛ nu d'é wú ǎ ɔ́, é ká nɔ́ ɖo ayi tɔn mɛ;
ado nɔ ɖo huhu i wɛ dó wǔ tɔn káká bɔ adɔ̌ nɔ́ vɛ́ ɛ bɔ amlɔ nɔ gló e;
ée é wínnyá lě ɔ́, tɔ́ ɔ́ nɔ́ lin ɖɔ é ní má nɔ te dín cóbó da asú ó;
nú é ká da asú ɔ́, é nɔ́ ɖo xɛsi ɖi wɛ ɖɔ asú tɔn ní má gbɛ́ wǎn n'i ó.
10Hwenu e é kpo ɖo ɖyɔ̌vǐ mɛ é ɔ́,
xɛsi tɔ́ ɔ́ tɔn wɛ nyí ɖɔ súnnu ɖé má wá blɛ́ ɛ
bó dó xo ná ɖo xwé é ɖésú tɔn gbe ó,
hwenu e é ná wá da asú é ɔ́,
é sixú gɔn gbejí má nɔ nú asú tɔn vlafo;
nú é ká cí tɔ́ tɔn xwé ɔ́, é sixú wá gɔn vǐ ma ji.
11Ényí vǐ towe nyɔ̌nu ɔ́ ká tlí tó hǔn, bó nɔ cɔ́ ɛ ganjí,
é má nyí mɔ̌ ǎ ɔ́, walɔ gblégblé zínzán tɔn ná zɔ́n
bɔ kɛntɔ́ towe lɛ́ɛ ná nɔ́ gbɔ́ we ko;
mɛ lɛ́ɛ ná ɖɔ xó dó wǔ tɔn ɖo toxo mɛ,
lobɔ togun ɔ́ ná kplé dó wǔ tɔn;
hwenɛ́nu ɔ́, é ná dó winnyá we ɖo agun mɛ.
12Vǐ towe nyɔ̌nu ɖó ná jó éɖée nú súnnu ɖé bɔ é ná mɔ mɛ̌ tɔn ǎ;
é ká ɖó ná lɛ́ byɔ́ xɔ e mɛ nyɔ̌nu xwési lɛ́ɛ nɔ́ nɔ é ǎ.
13Ɖi lě e nǔvíɖogbɛ lɛ́ɛ nɔ́ tɔ́n sín avɔ mɛ gbɔn é
ɖɔhun wɛ dǎkaxixo nɔ́ gosín nyɔ̌nu lɛ́ɛ gɔ́n gbɔn é nɛ́.
14Dǎkaxixo súnnu tɔn nyɔ́ hú gǎn xomɛnyínyɔ́ nyɔ̌nu tɔn;
nyɔ̌nu wɛ nɔ́ dó winnyá asú tɔn.
SUSU MAWU TƆN ƉE ÉƉÉE XLƐ́ ƉO GBƐ Ɔ́ MƐ, BÓ ƉE XLƐ́ ƉO TAN MƐ
(42.15—43.33)
Aklúnɔ d'agba
15Din ɔ́, un ná flín nǔ e Aklúnɔ wa lɛ́ɛ é bǐ,
un ná ɖɔ nǔ e un mɔ é.
Aklúnɔ bló nǔ bǐ gbɔn nukikɛ tɔn gbla mɛ;
nǔ e é bló é nɔ́ nɔ gbe tɔn jí.
16Hwesivɔ́ e nɔ hun ɔ́, é nɔ́ hun dó nǔ bǐ jí;
nǔ e Aklúnɔ bló é bǐ mɛ wɛ susu tɔn ɖe.
17 Wɛnsagun Aklúnɔ tɔn lɛ́ɛ ɖésú kpé wú
bó ná kpi nǔ ɖaxó ɖaxó e é jlɛ́ lɛ́ɛ é sín tan ǎ;
ɖěɖě e Aklúnɔ Nǔbǐwúkpétɔ́ ɔ́ sɔ́ jínjɔ́n ayǐ
bónú wɛ̌kɛ́ ɔ́ ná dó tíin ɖo susu tɔn sín nukɔn é sín tan ǎ.
18Aklúnɔ nɔ́ gbéjé xu kpɔ́n káká yi bɔ̌ mɛ,
lobo nɔ lɛ́ kíjé ayi lɛ́ɛ mɛ kpɔ́n,
bó nɔ́ mɔ nǔ e ɖo gɔngɔn mɛ nú yě lɛ́ɛ é;
nǔgbó wɛ, Mawu Ajalɔ̌nlɔn tunwun nǔ bǐ;
é kpɔ́n bó mɔ nǔ jɛ wuntun hwenu lɛ́ɛ tɔn wú.
19É nɔ́ ɖɔ nǔ e kó jɛ wá yi é
kpódó ɖěe ná wá jɛ lɛ́ɛ é kpán;
nǔ e ɖo hwlǎhwlá ɖo ayi gwegwe mɛ lɛ́ɛ é ɔ́,
é nɔ́ ɖe bǐ nyi wěxo.
20Linlin ɖěbǔ nɔ́ sí dó e ǎ; nǔglɔ́ xó ɖé ká ɖe n'i ǎ;
21Aklúnɔ to nǔ ɖaxó ɖaxó lɛ́ɛ
lǐnnyɛgbe lǐnnyɛgbe lě e nǔnywɛ́ tɔn ɖɔ n'i gbɔn é;
mɛ ɖokpó ɔ́ wɛ é nyí sín do lobo ka ná lɛ́ nyí nú tɛgbɛ gbe;
nǔ e é kó wa lɛ́ɛ é bǐ ɔ́, nǔ ɖěbǔ sɔ́ ɖe bɔ è nǎ sɔ́ d'é jí ǎ;
mɔ̌ jɛ́n wɛ ɖě má sɔ́ ɖe bɔ è nǎ ɖe sín mɛ ǎ é nɛ́;
nǔkplɔ́nmɛ mɛ ɖé tɔn ka hu dó e ǎ.
22Mǐ hɛn ɔ́, mǐ ná ɖó wǎn yíyí jɔ wǎn yíyí
nú nǔ e Aklúnɔ bló lɛ́ɛ é bǐ
káká yi jɛ myɔ kínkán wínníwínní e nukún ɖo mimɔ wɛ lɛ́ɛ é jí.
23Nǔ énɛ́ lɛ́ɛ bǐ ɖo gbɛ lobo ka ná nɔ nú tɛgbɛ gbe;
bǐ nɔ́ se tónú lě e é jɛ xá gbɔn é.
24Nǔ bǐ wɛ nɔ́ zɔn webɔ webɔ, ɖě sɔgbe xá ɖě;
nǔ blɔ̌ɖowǔ ɖěbǔ ɖo nǔ e Aklúnɔ bló lɛ́ɛ é mɛ ǎ.
25Nǔ ɖokpó ɖokpó nɔ́ ɖe lě e é xɔ akwɛ́ sɔ é xlɛ́;
susu tɔn kpínkpɔ́n ɔ́, mɛ̌ wɛ é ká ná cikɔ ná?
Currently Selected:
Silaki ví 42: FONDC
Highlight
Copy
Compare
Share
Want to have your highlights saved across all your devices? Sign up or sign in
La Bible en langue fon © Alliance Biblique du Bénin, 2012.