Silaki ví 16
16
Aklúnɔ ɔ́ nyɔ́ bó ka nylá hun
1Ma ba ná ji vǐ gěgé nú yě wá nyí nǔɖé ján ó.
Ma nú xomɛ hun we dó vǐ súnnu e a ji bɔ yě gbɛ́ wǎn nú Aklúnɔ lɛ́ɛ wú ó.
2Nú a ji vǐ gěgé bɔ yě ma nɔ sí Aklúnɔ ǎ hǔn,
ma nú xomɛ hun we ó.
3Ma ɖó nukún ɖɔ yě ná dɔ́ ji ó,
ma ka lɛ́ gán jɛ kpɔ́ susu yětɔn wú ó.
È ji vǐ ɖokpó géé ɔ́, é nyɔ́ hú afatɔ́n (1.000).
È nɔ vǐmaji bó kú ɔ́, é nyɔ́ hú è ji vǐ e gbɛ́ wǎn nú Aklúnɔ lɛ́ɛ kɛ́ɖɛ́.
4Nǔnywɛ́tɔ́ ɖokpó géé ɖo toxo ɖé mɛ ɔ́, é ko kpé bɔ toxo ɔ́ ná gɔ́.
Lo ɔ́, nǔvɔ́nɔ ajotɔ́ ɖokpó jɛ fínɛ́ ɔ́ mɛ bǐ na gba dó.
5Nǔ mɔ̌hunkɔ gěgé wɛ un mɔ kpó nukún ce kpó;
bɔ nǔ e lɛ́ hú mɔ̌ ɔ́ un lɛ́ se gěgé kpó tó ce kpó.
6Zo Aklúnɔ tɔn nɔ wlí ɖo mɛ nyanya lɛ́ɛ sín gbɛmɛ.
Xomɛsin tɔn nɔ wlí zo dó togun e fɔ́n gǔ é jí.
7 Mɛ gaga jixómɛ tɔn e gán jɛ hlɔ̌nhlɔ́n yětɔn wú,
bó fɔ́n gǔ dó jǐ tɔn lɛ́ɛ ɔ́, é sɔ́ kɛ yě ǎ.
8É cyɔ́n alɔ to e mɛ Lɔ̌ti nɔ e jí ǎ;
ɖó é gbɛ́ wǎn nú goyíyí to ɔ́ mɛ nu lɛ́ɛ tɔn.
9É kú nǔbláwǔ nú Kanáanu lɛ́ɛ ǎ,
hwɛ yětɔn wɛ zɔ́n bɔ é sú kún yětɔn dó.
10Mɔ̌ ɖokpó ɔ́, é kú nǔbláwǔ nú Izlayɛ́li ví adɔ̌kpo gban (600.000) lɛ́ɛ ǎ.
Gǔ e yě fɔ́n dó Aklúnɔ jí é wɛ zɔ́n bɔ yě kú.
11Nú é ná bó nyí mɛ ɖokpó géé wɛ kpo bó fɔ́n gǔ dó Aklúnɔ jí ɔ́,
nú é má dɔn tó n'i ǎ ɔ́, nǔ kpácá wɛ é ná nyí,
ɖó nǔbláwǔ kú nú mɛ kpó xomɛsin kpó bǐ ɔ́,
Aklúnɔ tɔn wɛ bǐ nyí. É hɛn ɔ́, é ná sɔ́ hwɛ kɛ mɛ kpó xomɛnyínyɔ́ kpó,
lo ɔ́, é nɔ lɛ́ ɖe hunnylánylá tɔn xlɛ́.
12Lě e é nylá hun sɔ ɔ́, mɔ̌ wɛ é lɛ́ nyɔ́ xomɛ sɔ é nɛ́.
Nǔ e gbɛtɔ́ lɛ́ɛ wa é wɛ é nɔ kpɔ́n dó dó hwɛ nú yě.
13É nɔ jó hwɛhutɔ́ dó yǎyá ma dɔn tó n'i ǎ.
Mɔ̌ ɖokpó ɔ́, mɛ e ɖo gbejí n'i lɛ́ɛ sixú gbɔ agbǎ ǎ.
14Aklúnɔ ɖo gbesisɔ mɛ tɛgbɛ, bó ná dó ɖe xomɛnyínyɔ́ tɔn xlɛ́.
Lo ɔ́, nǔ e mɛ ɖokpó ɖokpó wa é wɛ é ná kpɔ́n dó wa nǔ xá ɛ.
È sixú gló Aklúnɔ ǎ
17Ma ɖɔ: “Má hɔn hwlá, lobo bú dó Aklúnɔ.
Sín aga dɔ̌n ɔ́, mɛ̌ ká ná flín mì?
Mɛ ɖěbǔ na tunwun mì ɖo ahwan wɔ̌buwɔ́bú ɔ́ tɛ́ntin ǎ.
Mɛ nǎhún wɛ un ka nyí ɖo nǔɖíɖó tobutóbú lɛ́ɛ mɛ?”
Ma ɖɔ mɔ̌ ó.
18Jǐnukúnsin kpó jǐ aga vwéé kpó;
ayǐkúngban kpó do gɔngɔn kpó ɔ́,
nú Aklúnɔ wá ba jǒnɔ yě ɔ́, yě nɔ́ dán wǔ.
19Só lɛ́ɛ kpó dodó ayǐkúngban tɔn lɛ́ɛ kpó ɔ́,
nú Aklúnɔ nyi kɔ kpɔ́n yě ɔ́,
yě bǐ nɔ ɖi xɛsi bó nɔ́ sísɔ́.
20Lo ɔ́, mɛ ɖěbǔ nɔ lin énɛ́ ɔ́ kpɔ́n ǎ.
Mɛ̌ ká nɔ́ ké ya nú nǔ e Aklúnɔ nɔ́ wa é?
21Jɔhɔn ɖaxó ɔ́, mɛɖé nɔ mɔ ɛ ǎ.
Mɔ̌ ɖokpó ɔ́ wɛ nǔwiwa Aklúnɔ tɔn lɛ́ɛ bǐ
ɖo hwlǎhwlá bɔ mɛɖé má nɔ́ mɔ ǎ é nɛ́.
22Hwɛjijɔ núwiwa énɛ́ lɛ́ɛ ɔ́,
mɛ̌ ka sixú dó wɛn yětɔn?
Mɛ̌ ka sixú nɔ te kpɔ́n yě?
Gbeta Aklúnɔ tɔn fɔn tate mǐ.
23Nǔ e gbɛtɔ́ e má ɖó nǔnywɛ́ ǎ é nɔ lin é nɛ́.
Mɛ e sín ayi ma xwetɛ́ ǎ ɔ́ nɔ́ bú ali,
bó nɔ́ ɖo nǔmasɔgbe kɛ́ɖɛ́ lin wɛ.
MAWU KPÓDÓ GBƐ E É ƉÓ Ɔ́ KPÓ
(16.24—23.27)
Nǔnywɛ́ Mawu tɔn ɖo gbɛ e é ɖó é mɛ
24Vǐ ce, ɖǒtó mì;
yǐ kplɔ́n nǔ e un tunwun é tɔn;
sɔ́ ayi towe ɖó nǔ e un ɖɔ é jí.
25Un ná ɖe nǔ e kplɔ́n dodó ɔ́ nyí ɔ́ xlɛ́ we;
un ná wlíbo nú nǔ e un tunwun é, bó ná kplɔ́n we.
26Ɖo bǐbɛ́mɛ, hwenu e Aklúnɔ ɖó nǔɖíɖó tɔn lɛ́ɛ tlóló é ɔ́,
é ná tɛnmɛ ɖokpó ɖokpó yě.
27É to nǔ e nɔ ná wěziza lɛ́ɛ é ɖó sonu sonu nú tɛgbɛ gbe.
É sɔ́ sɛ́n ɖé lɛ́ɛ ɖó te nú yě,
bɔ yě ná xwedó sín bǐbɛ́mɛ káká yi fífó nú.
Xovɛ́ nɔ sin yě gbeɖé ǎ.
Nǔ ka nɔ cikɔ nú yě gbeɖé ǎ.
Yě ɖěbǔ nɔ jó azɔ̌ yětɔn dó gbeɖé ǎ.
28Yě ɖěbǔ nyi aglo yěɖée kpɔ́n gbeɖé ǎ.
Yě ká nɔ d'asá Aklúnɔ sín sɛ́n lɛ́ɛ gbeɖé ǎ.
29Énɛ́ gúdo ɔ́, Aklúnɔ lɛ́ nyi kɔ kpɔ́n ayǐkúngban jí,
é bló bɔ nyɔ̌ná tɔn lɛ́ɛ gɔ́ ɛ.
30É bɛ́ kanlin tɛnmɛ tɛnmɛ lɛ́ɛ kɔn nyi jǐ tɔn,
bɔ kú yětɔn gúdo ɔ́, yě ná lɛ́ lɛ́ kɔ yi ayǐkúngban ɔ́ lanmɛ.
Currently Selected:
Silaki ví 16: FONDC
Highlight
Copy
Compare
Share
Want to have your highlights saved across all your devices? Sign up or sign in
La Bible en langue fon © Alliance Biblique du Bénin, 2012.