Ɛsitɛ́ɛ Glɛ̌sigbe Xónusɔ́ɖóte
Xónusɔ́ɖóte
Ɛsitɛ́ɛ wéma Glɛ̌sigbe mɛ tɔn ɔ́ nyí wěma ɖé, bɔ è húzú sín Ebléegbe mɛ kpowun ǎ. È sixú ɖɔ wěma ɖěvo wɛ bɔ è wlǎn. Lě e è to xó lɛ́ɛ gbɔn ɖě bɔ dó ɖě wú ɔ́, ɖokpó ɔ́ jɛ́n nyí ɖo wěma we lɛ́ɛ bǐ mɛ; amɔ̌, nǔhúzúdó-gbeɖěvomɛtɔ́ lɛ́ɛ wá sɔ́ akpáxwé vovo ɖaxó nukúnɖéjí wǒ ɖé lɛ́ɛ gɔ́ ná, bɔ ga yětɔn hwe ǎ.
Ɖo Jwifu e nɔ dó Glɛ̌sigbe lɛ́ɛ nukún mɛ ɔ́, Ɛsitɛ́ɛ wéma Ebléegbe mɛ tɔn ɔ́ sín tan lɛ́ɛ gěgé vɛ́ se nú tó, bó vɛ́ mɔ nú nukún. Bɔ tan lɛ́ɛ bǐ wá hwɛ́n gbɛtɔ́ ɖokpónɔ sín nǔwiwa, bɔ è sɔ́ wá mɔ Mawu Izlayɛ́li tɔn sín alɔ ɖěbǔ ɖ'é mɛ ǎ. Énɛ́ ɔ́ wɛ nǔhúzúdó-gbeɖěvomɛtɔ́ lɛ́ɛ jló ná bló ɖó, bó wá sɔ́ nǔ e ayi yětɔn mɔ ɖɔ é hwedó lɛ́ɛ é gɔ́ nú wěma dodó ɔ́. Xó yɔ̌yɔ́ énɛ́ lɛ́ɛ e yě wǎ sɔ́ gɔ́ ná lɛ́ɛ sín ga ɖiɖi lɛ́ɛ wá ɖibla sɔ nǔ e è kó wlán dó wěma nukɔntɔn ɔ́ mɛ é: afɔ 105 wɛ è lɛ̌ wá gɔ́ nú 167 e ko ɖo Ɛsitɛ́ɛ Ebléegbe mɛ tɔn mɛ ɖ'ayǐ lɛ́ɛ.
Akpáxwé e è wǎ gɔ́ nú wěma Ɛsitɛ́ɛ tɔn ɖo Glɛ̌sigbe mɛ lɛ́ɛ ɖíe:
A. 1-11 Dlɔ̌ e Maadocée kú dó nǔ e ná wá jɛ ɖo nukɔn mɛ lɛ́ɛ jí é
A. 12-17 Maadocée ɖe sébládómɛta ɖokpó gba nú axɔ́sú ɔ́
B. 1-7 Wěma nukɔntɔn e Aatazɛɛzɛsi wlán bó zɔ́n ɖɔ è nǐ vɔ Jwifu lɛ́ɛ bǐ é. (3.13 kpódó 3.14 kpán tɛ́ntin). 4.8b Wɛn e Maadocée sɛ́ dó Ɛsitɛ́ɛ é (é vlɔ́n kan nú wěfɔ e ko ɖo Ɛsitɛ́ɛ Ebléegbe mɛ tɔn mɛ é.)
C. 1-11 Ɖɛ e Maadocée xo é (bɔ dó 4.17 wú).
C. 12-30 Ɖɛ e Ɛsitɛ́ɛ xo é.
D. 1-16 Ɛsitɛ́ɛ zé tamɛ nyi gbě, bó yi mɔ axɔ́sú ɔ́ (é vlɔ́n kan nú wěfɔ 5.1-2 e ko ɖo Ɛsitɛ́ɛ Ebléegbe mɛ tɔn mɛ é).
E. 1-24 Wěma yɔ̌yɔ́ ɖěvo e Atazɛɛzɛ́si wlán bó dó ví Jwifu lɛ́ɛ é (è ɖo wěfɔ 8.12 kpódó 8.13 kpó tɛ́ntin).
F. 1-10 È tín dlɔ̌ e Maadocée kú é mɛ, bɔ é nyí xó nu sɔ́ nyi te nú wěma ɔ́ (é bɔdó 10.3 wú).
F. 11 È wá sú ta nú xó ɔ́, dó kléwún mɛ, bó dó ɖó hwenu nú wěma Glɛ̌sigbe mɛ tɔn ɔ́, bó ká ɖe xlɛ́ ɖɔ sinsɛn sín wěma wɛ.
Nǔ gɔ̌ nú nǔ énɛ́ lɛ́ɛ kpódó nǔjláɖózɔ́ e è wa ɖo Ɛsitɛ́ɛ Ebléegbe mɛ tɔn wú ɔ́ kpó lɛ́ ɖe xlɛ́ ɖɔ Mawu ɖó acɛ ɖo togun tɔn jí: é ɖo gbejí nú togun e é jɛ akɔ xá é, lobo ka ɖo ali xlɛ́ ɛ wɛ ɖo nǔ bǐ mɛ. Ɖɛ e Ɛsitɛ́ɛ sɔ́ yɔkpɔ́vú sín ayi dó xo, bɔ Maadocée lɔ xo lɛ́ɛ bǐ ɖe xlɛ́ agbawungba ɖɔ gbɛtɔ́ kún sixú hwlɛ́n mɛ gán ó; Mawu wɛ nɔ hwlɛ́n mɛ gán. Awěxomɛ hwenu ɔ́, nǔɖitɔ́ lɛ́ɛ nɔ ɖeji ɖɔ Aklúnɔ émítɔn ɖo kpɔ́ xá émí, bó ɖo alɔ cyɔ́n émí jí wɛ.
Currently Selected:
Ɛsitɛ́ɛ Glɛ̌sigbe Xónusɔ́ɖóte: FONDC
Highlight
Copy
Compare
Share
Want to have your highlights saved across all your devices? Sign up or sign in
La Bible en langue fon © Alliance Biblique du Bénin, 2012.