Ɛsitɛ́ɛ Glɛ̌sigbe A
A
Dlɔ̌ e Maadocée kú é
1 [1] Axɔ́sú Aatazɛɛzɛsi ɖaxó ɔ́ jɛ zinkpo jí ɖo Pɛ́si to ɔ́ nu ɔ́, xwe tɔn wegɔ́ ɔ́ mɛ, ɖo azǎn nukɔntɔn e ɖo Nisáan sín sun ɔ́ mɛ é gbe wɛ Maadocée kú dlɔ̌ ɖokpó. Maadocée ɔ́, Jwifu wɛ n'i, Jayilɔ́si sín vǐ wɛ n'i, bó nyí Semiya sín vǐvú, bó tɔ́n sín Bɛnjamɛ́ɛ kúnkan mɛ, lobo ka nyí vǐvú Kisayiyási tɔn. 2 Maadocée ɔ́, Suzi toxo mɛ wɛ é nɔ́ nɔ; gbɛtɔ́ nukúnɖéjí ɖokpó wɛ é nyí, bó ká nɔ́ wa azɔ̌ ɖo hɔnmɛ. 3 É ɖo mɛ e Nabukodonɔzɔ́ɔ Babilɔ́nu xɔ́sú ɔ́ wlí sín Jeluzalɛ́mu lɛ́ɛ mɛ; éyɛ́ kpódó Jekoniyási Judée xɔ́sú ɔ́ kpán. 4 Dlɔ̌ e Maadocée kú ɔ́ ɖíe: xomɛsin dán kpódó nǔ vɛ́ mɛ wú zɔnlin zunzun kpó ɖíe, adǎn jɛ dó mɛ ta kpó ayǐkúngban dán wǔ kpán ɖíe, nǔɖé ma sɔ́ ɖo nǔɖé hwínnu ɖo ayǐkúngban ɔ́ jí ɖíe. 5 Dan Ɖaxó we ɖíe, yě ja; yě mɛ we lɛ́ɛ ɖo gbesisɔ mɛ ná li za; yě sú xó ɖaxó ɖé. 6 Ée yě sú xó ɔ́ lě kɛ́ɖɛ́ é ɔ́, togun ɖokpó ɖokpó jɛ ahwannú sɔ́ jí, bó ná yi tɔ́n ahwan togun mɛ e nɔ sí Mawu lɛ́ɛ é tɔn. 7 Zǐnflú kpó ablu kpó zán ɖíe, aluwɛ kpódó ayimaj'ayǐ kpán ɖíe, mɛtáfú kpó nǔɖé ma sɔ́ ɖo nǔɖé hwínnu ɖo ayǐkúngban ɔ́ jí kpó ɖíe, bɔ mɛ bǐ ná sísɔ́ avuvɔ ɖo ayǐkúngban ɔ́ jí. 8 To e ɖo hwɛjijɔ li jí ɔ́ wlú bǐ sésé; nyladó tɔn lɛ́ɛ zin i dɛ́ bǐ; è ɖo nǔ sɔ́ wɛ bó ná yi vɔ, 9 bɔ yě sú xó ylɔ́ Mawu bó ná dó yí gbe nú xósúsú énɛ́ e wú kun sín tɔjɔtɛn kpɛví ɖé mɛ, tɔ gblagada ɖé, bɔ sin tɔn sukpɔ́ káká. 10 Énɛ́ ɔ́ gúdo ɔ́, hwe tɔ́n, lobɔ ayǐ hɔ́n. Mɛ e ma ɖo ali ɖé jí ǎ lɛ́ɛ sí te dó mɛjɔmɛ lɛ́ɛ jí, lobo vúnvún yě.
11 Ée Maadocée kú dlɔ̌, lobo ka mɔ nǔ e Mawu jló ná wa é bó wá fɔ́n sín amlɔ mɛ é ɔ́, é lin tamɛ dó nǔ énɛ́ bǐ wú; é ba ná mɔ nǔ jɛ dlɔ̌ nɛ́ ɔ́ mɛ ɖo kéze ɔ́ bǐ mɛ káká yi gbadanu gbɔn ali bǐ nu.
Maadocée ɖe sébládómɛta ɖokpó gba nú axɔ́sú ɔ́
12 Gabata kpó Tála kpó ɔ́, yě mɛ we lɛ́ɛ ɔ́, azɔ̌watɔ́ axɔ́sú ɔ́ tɔn wɛ yě nyí; é wá su gbe ɖokpó, bɔ Maadocée wá ɖo gbigbɔjɛ́ wɛ ɖo kɔ́xota, ɖo hɔn ɔ́ mɛ hwenu e yě ɖo azɔ̌mɛ é. 13 Maadocée se bɔ azɔ̌watɔ́ we lɛ́ɛ ɖo xó ɖɔ wɛ ɖo yěɖée tɛ́ntin; é wlí tó wú ganjí; é se ɖɔ axɔ́sú Aatazɛɛzɛsi wɛ yě ɖo nǔ sɔ́ wɛ bó ná hu; é ká ɖe yě gba nú axɔ́sú ɔ́. 14 Axɔ́sú ɔ́ wá ylɔ́ axɔ́súzɔ́watɔ́ we lɛ́ɛ, bó kan nǔ byɔ́; yě ká ɖɔ xó nǔgbó n'i, bɔ é hu yě. 15 Axɔ́sú ɔ́ zɔ́n ɖɔ è nǐ wlán nǔ e jɛ nɛ́ lɛ́ɛ é bǐ, lobo nú è ma wá wɔn yě ó; Maadocée lɔ ka wlán yě. 16 Énɛ́ gúdo ɔ́, axɔ́sú ɔ́ wá sɔ́ Maadocée nú é ná cɔ́ hɔnmɛ ɔ́, lobo ka dó nǔ e é wa nɛ́ ɔ́ sín ajɔ ɛ. 17 Hamáa ɖěe nyí Bugayɔ́si, bó nyí Hamadatɔ́si sín vǐ ɔ́, lɔ nyí axɔ́sú ɔ́ sín xɔ́ntɔn. É ba ná zɔn dó nǔ e xá agooɖojǐe we énɛ́ lɛ́ɛ é wú, bó ná hɛn nǔ gblé dó wǔ nú Maadocée kpódó togun tɔn kpán.
Currently Selected:
Ɛsitɛ́ɛ Glɛ̌sigbe A: FONDC
Highlight
Copy
Compare
Share
Want to have your highlights saved across all your devices? Sign up or sign in
La Bible en langue fon © Alliance Biblique du Bénin, 2012.