Ɛsitɛ́ɛ Glɛ̌sigbe 8
8
1 Gbe nɛ́ gbe tlóló ɔ́, axɔ́sú Aatazɛɛzɛsi bɛ́ dɔkun e ko nyí Hamáa, mɛhɛngblétɔ́ ɔ́ tɔn lɛ́ɛ é bǐ nú Ɛsitɛ́ɛ. Axɔ́sú ɔ́ lɛ́ ylɔ́ Maadocée, ɖó Ɛsitɛ́ɛ ɖɔ n'i ɖɔ mɛ émítɔn wɛ. 2 Alɔkɛ́ e axɔ́sú ɔ́ ɖe sín alɔ nú Hamáa é ɔ́, é sɔ́ dó nú Maadocée, bɔ Ɛsitɛ́ɛ sɔ́ ɛ ɖó Hamáa sín nǔ lɛ́ɛ nu.
Sɛ́nbá e ná xo Jwifu lɛ́ɛ é ɔ́, è gbǐdí bǐ
3 Ɛsitɛ́ɛ lɛ́ ɖɔ xó nú axɔ́sú ɔ́; é jɛ kpo ɖo afɔ tɔn lɛ́ɛ kɔn, bó ɖɔ n'i ɖɔ ní ɖe kɔ dó nǔ nyanya e Hamáa to bó ná wa nú Jwifu lɛ́ɛ é. 4 Axɔ́sú ɔ́ ká dlɛ́n sikákpogɛ tɔn dó Ɛsitɛ́ɛ; hwenɛ́nu ɔ́ é sí te lobo nɔ te ɖo axɔ́sú ɔ́ kpá. 5 É ɖɔ n'i ɖɔ: “Axɔ́sú ce, Hamáa wlán wěma bó zɔ́n ɖɔ è nǐ hu Jwifu e ɖo axɔ́súɖuto towe mɛ lɛ́ɛ é bǐ. 6 Ényí è wǎ ɖo ya mɔ̌hun dó nú akɔta ce wɛ ɔ́, nukún tɛ́ wɛ un ná sixú kpɔ́n ná? Ényí mɛ ce lɛ́ɛ bǐ sésé vɔ ɔ́, nɛ̌ mɔ̌ wɛ nyɛ sixú nɔ gbɛ gbɔn?” 7 Axɔ́sú ɔ́ yí gbe nú Ɛsitɛ́ɛ ɖɔ: “Ényí nǔ e nyí Hamáa tɔn lɛ́ɛ é ɔ́, un bɛ́ bǐ nú we, bó ba ná nyɔ́ ɖo así we, lobo ká ɛ nyi atín jí, ɖó é ɖo ya dó nú Jwifu lɛ́ɛ wɛ wútu ɔ́, ani ba wɛ a ka lɛ́ kpo ɖe ɖo así ce? 8 [8] Gbetakɛ́n e è ɖe tɔ́n dó nyǐkɔ ce mɛ, lobo sɔ́ alɔkɛ́ ce dó ɖó wuntun é ɔ́, un sɔ́ sixú gbídí ǎ. Lo ɔ́, Maadocée kpó hwɛ kpó ɔ́, mi hɛn ɔ́, mi ná wlán ɖěvo dó alɔ e jí mi ba bɔ é ná nɔ nú Jwifu lɛ́ɛ bó nyɔ́ é. Mi ná wlán dó nyǐkɔ ce mɛ, lobo sɔ́ alɔkɛ́ ce dó ɖó wuntun.”
9 Xwe énɛ́ ɔ́ sín sunzán nukɔntɔn abǐ Nisáan sín sun ɔ́, ɖo azǎn tɔn ko-nukún-atɔn gbe ɔ́, é ná kplé wěgbójínɔtɔ́ lɛ́ɛ bǐ. Yě ná wlán sɛ́ dó Jwifu lɛ́ɛ, bó dó kɛ nu dó gbetakɛ́n e è sɔ́ dó así nú axɔ́súzɔ́watɔ́ lɛ́ɛ kpódó mɛ e sɔ́ axɔ́sú ɔ́ sín afɔ ɖó te, lobo ɖo azɔ̌ wa wɛ ɖo tota kantɔn tɛ́nwe (127) axɔ́súɖuto ɔ́ tɔn mɛ lɛ́ɛ bǐ sésé kpán wú nú yě sín Ɛndu káká wá Etiopíi. Tota ɖokpó ɖokpó sín gbe mɛ wɛ è ka ná wlán wěma énɛ́ ɔ́ dó. 10 Axɔ́sú ɔ́ sín nyǐkɔ mɛ wɛ è wlǎn dó, lobo sɔ́ alɔkɛ́ tɔn dó ɖó wuntun. Mɛ wɛ è ɖe bó bɛ́ wěma lɛ́ɛ ná bɔ yě sɔ́ yě yi jó. 11 Wěma énɛ́ lɛ́ɛ ná gbe Jwifu lɛ́ɛ ɖɔ yě ní xwedó sɛ́n yětɔn lɛ́ɛ, bó wa nǔ mlɛ́ ɖo to ɔ́ bǐ mɛ, bó dó alɔ yěɖée lɛ́ɛ, lobo wa kɛntɔ́ yětɔn lɛ́ɛ sín nǔ lě e é jló yě gbɔn é. 12 Gbe níná énɛ́ ɔ́ nyí nǔ bó ɖo axi jí gbɔn Aatazɛɛzɛsi sín axɔ́súɖuto ɔ́ bǐ mɛ, ɖo azǎn wǎtɔngɔ́ ɔ́, sun wěwegɔ́ ɔ́ e ɖo xwe mɛ, bɔ è nɔ ylɔ́ ɖɔ Adáa é gbe.
Currently Selected:
Ɛsitɛ́ɛ Glɛ̌sigbe 8: FONDC
Highlight
Copy
Compare
Share
Want to have your highlights saved across all your devices? Sign up or sign in
La Bible en langue fon © Alliance Biblique du Bénin, 2012.