Ɛsitɛ́ɛ Glɛ̌sigbe C
C
Ɖɛ e Maadocée xo é
18 Maadocée flín nǔ tobutóbú e Aklúnɔ wa lɛ́ɛ é, lobo xo ɖɛ ɖɔ: 19 Aklúnɔ, Aklúnɔ axɔ́sú Nǔbǐwúkpétɔ́, wɛ̌kɛ́ ɔ́ bǐ wɛ ɖo acɛ towe mɛ. Hwenu e é jló we bɔ a nǎ hwlɛ́n Izlayɛ́li gán ɔ́, mɛ ɖěbǔ glá bó gbɛ́ nú we ǎ. 20 Hwi wɛ ɖó jǐnukúnsin kpódó ayǐkúngban kpán, lobo lɛ́ ɖó nǔ ɖagbe ɖagbe e ɖo ayǐkúngban ɔ́ jí lɛ́ɛ é bǐ. 21 Hwi wɛ nyí Aklúnɔ nǔ bǐ sésé tɔn, bɔ mɛ ɖěbǔ sixú syɛ́n ta bó nɔ te ɖo nukɔn towe ǎ mɛ Aklúnɔ. 22 Aklúnɔ, a tunwun nǔ bǐ; hwɛ Aklúnɔ ɔ́, a tunwun ganjí ɖɔ un kún ná yi ɖe kɔ́ nú Hamáa, nya goyítɔ́ énɛ́ ɔ́ ó. Lo ɔ́, un wa mɔ̌, ɖó un mɔ nyɛɖée dó mɔ mɛjɔmɛ, abǐ un gbɛ́ wǎn n'i, abǐ un jló ná ɖe xlɛ́ ɛ ɖɔ un nyí nǔɖé hú i wú wɛ ǎ. 23 É nyɔ́ wa ɔ́, un ɖo gbesisɔ mɛ ná ɖíɖɔ́ afɔ nya énɛ́ ɔ́ tɔn, nú énɛ́ ɔ́ sixú hwlɛ́n Izlayɛ́li togun ɔ́ gán ɔ́. 24 Lo ɔ́, un wa mɔ̌, lobo nú susu e è nǎ gbɛtɔ́ é ní má ɖo aga nú ée è ɖǒ ná ná Mawu é ó. Un ná wɛ ta gbeɖé ɖo mɛɖé nukɔn zɛ hwi Aklúnɔ ce ɔ́ wú ǎ, bɔ é ká nyí goyíyí wú wɛ ǎ.
25 [8] “Bɔ din ɔ́ mɛ Aklúnɔ, hwi mɛ e nyí Mawu, bó lɛ́ nyí axɔ́sú é, hwɛ Mawu Ablaxámu tɔn ɔ́, cyɔ́n alɔ togun towe jí. Nǔgbó wɛ, kɛntɔ́ mǐtɔn lɛ́ɛ ɖo mǐ cɔ́ wɛ, bó ná vɔ mǐ. Yě ɖo linlin wɛ ná sú togun e nyí towe sín bǐbɛ́mɛ ɖokpóó é sín kún dó. 26 Ma wɔn togun énɛ́ ɔ́ ó; towe wɛ é nyí; nǔgbó wɛ, a yǐ i dó ɖó towe, lobo ɖe e sín Ejípunu lɛ́ɛ lɔ mɛ. 27 Wlǐ tó vosisa ce wú; wa nǔ ɖó ɖagbe mɛ e nyí towe lɛ́ɛ é tɔn wú; blǒ bónú aluwɛ mǐtɔn ní húzú awǎjijɛ, énɛ́ ɔ́, mǐ ná gán, dó nɔ gbɛ dó ji han lómílómí dó sɔ́ nyǐkɔ towe su Aklúnɔ. Ma lɔn nú mɛ e nɔ sɔ́ we su lɛ́ɛ blíbú ó mɛ Aklúnɔ!” 28 Izlayɛ́li ví lɛ́ɛ sú xó kpódó hlɔ̌nhlɔ́n kpó, ɖó yě mɔ kú e ɖo awa gblá yě wɛ é.
Ɖɛ e Ɛsitɛ́ɛ xo é
29 Axɔ́si Ɛsitɛ́ɛ ɔ́, hwenu e é wá mɔ ɖɔ nǔ ɔ́ gbɛ́ abɔ̌ bó gbɛ́ ta é ɔ́, élɔ́ mɔ̌ yi ba alɔdó ɖo Aklúnɔ gɔ́n. 30 É ɖe axɔ́si sín avɔ tɔn lɛ́ɛ sín wǔ, bó byɔ́ nǔwamɛvɔ mɛ. Afín kpódó kɔ́gúdu kpó wɛ é lɛ dó ta dó célu jɔ célu tɛn mɛ. É sɔ́ wlíbo nú agbaza tɔn ɖěbǔ ǎ; acɔ́ vɔ́vɔ́ é sɔ́ ɖó ǎ, bɔ ɖa e ɖo ta é bǐ kan. 31 Énɛ́ gúdo ɔ́, é sa vo élɔ́ nú Aklúnɔ Mawu Izlayɛ́li tɔn bo ɖɔ:
“Aklúnɔ Mawu ce, axɔ́sú togun ce tɔn, hwi wɛ nyí Mawu ɖokpó géé éé tíin é, wǎ d'alɔ mì, un jɛ nyɛ ɖokpónɔ géé; mɛ ɖěbǔ sɔ́ sixú d'alɔ mì zɛ wǔ we ǎ. 32 Nǔgbó wɛ, gbɛ ce jɛ kpɔn kéɖékéɖé nu. 33 Sín hwenu e è ji mì ɔ́ ɖokpóó wɛ un ko nɔ se nǔ élɔ́ ɖo daágbó ce lɛ́ɛ sín kúnkan mɛ, ɖɔ hwɛ Aklúnɔ ɔ́, a ɖ'alɔ aga, bó sɔ́ togun Izlayɛ́li tɔn ɖo akɔta lɛ́ɛ bǐ mɛ; tɔ́ mǐtɔn lɛ́ɛ ɖo daágbó mǐtɔn lɛ́ɛ mɛ, bɔ a sɔ́ yě dó ɖó togun towe, bɔ a ka lɛ́ ɖe akpá e a dǒ nú yě lɛ́ɛ é bǐ. 34 Din ɔ́, mǐ hu hwɛ dó we bɔ a ka jó mǐ nú kɛntɔ́ mǐtɔn lɛ́ɛ, 35 ɖó mǐ sɔ́ nǔmɛsɛn yětɔn lɛ́ɛ su wútu. Aklúnɔ, mɔ̌ e a wa é ɔ́, a wa ɖó hwɛjijɔ jí. 36 Din ɔ́, kɛntɔ́ mǐtɔn lɛ́ɛ sɔ́ ba ná hɛn mǐ gantɔ́ ɖɔhun kɛ́ɖɛ́ ǎ; akpá wɛ yě dó nú nǔmɛsɛn yětɔn lɛ́ɛ, lobo nyi kpo dó nukɔn nú yě ɖɔ: 37 È ma sɔ́ nyi sɛ́n towe ɖě ó, bó ná gbídí togun e nyí towe ɔ́, bónú mɛɖé má sɔ́ kpa susu nú we ó, bó ná cí zɔ nú susu e xwé towe kpó vɔ̌sákpe towe kpó ɖó é. 38 Gbɔn mɔ̌ ɔ́, yě jló ná hun ali nú togun ɖě lɛ́ɛ, nú yě ná sɔ́ nǔ tófwe su, lobo ná nɔ́ kpɔ́n axɔ́sú e nyí gbɛtɔ́ kpowun é hwebǐnu.
39 “Ma sɔ́ acɛ towe jó nú nǔ e má tíin ǎ lɛ́ɛ ó mɛ Aklúnɔ! Ma jó yě dó nú yě wá yi gbɔ́ mǐ ko hwenu e è nǎ sú kún mǐtɔn dó vlafo é ó mɛ. Lo ɔ́, lǐlɛ́ nǔ e yě lin ɔ́ kpan nukɔn yě, lobo ka sɔ́ bǎ vívɛ́ ɖé dó xo mɛ e ɖe linlin ɔ́ tɔ́n é. Sɔ́ nyladó e ná nyí kpɔ́ndéwú n'i ɔ́ dó xo yě ná.
40 “Ma wɔn mǐ ó mɛ Aklúnɔ! Ɖe hwiɖée xlɛ́ mǐ ɖo nyladó mǐtɔn hwenu. Hwi mɛ e nyí axɔ́sú nǔmɛsɛn lɛ́ɛ tɔn, lobo ka ɖɔ nǔ dó acɛkpatɔ́ lɛ́ɛ bǐ nu é, bo ná mǐ akɔ́nkpinkpan. 41 [24] Sɔ́ xó e jɛ xá ɔ́ dó nu nú mì hwenu e un ná yi xwetɔ́n ɖo kinnikínní jawuntá énɛ́ ɔ́ nukɔn é; hǔzú ayi tɔn nú é ná dó gbɛ́ wǎn nú Hamáa kɛntɔ́ mǐtɔn ɔ́; ní sú é kpódó mɛ e ɖo gǎnjɛwú ná ɛ wɛ lɛ́ɛ é bǐ kpó sín kún dó. 42 Sɔ́ nǔwúkpíkpé towe dó hwlɛ́n mì; wǎ d'alɔ mì, ɖó un jɛ nyɛ ɖóɖó, bɔ mɛ ɖěbǔ sɔ́ ɖe bó ná d'alɔ mǐ zɛ hwi Mawu Aditi ɔ́ wú ǎ, hwi mɛ e tunwun nǔ bǐ é. 43 A tunwun lě do e un gbɛ́ wǎn nú susu mɛ e ma nɔ nyi sɛ́n towe ǎ lɛ́ɛ tɔn gbɔn é, bɔ un nɔ ba nú súnnu e má gbo ada ǎ é, éé má nyí togun towe mɛ nu ǎ é ná ɖó xó xá mì ǎ. 44 A tunwun ganjí ɖɔ un kún ɖó ɖě wa gbɔn ó; axɔ́sijɛ́gbákún e un ɖó ná xwe yi agun mɛ ɔ́, un gbɛ́ wǎn ná; wǎn tɔn gbɛ́ mì avɔ e mɛ hun kɔn dó é ɖɔhun, bɔ un sɔ́ ná dó hwe ɖěvo nu gbeɖé kpɔ́n ǎ. 45 [28] Nyɛ mɛsɛntɔ́ towe ɔ́, un ɖu nǔ ɖo Hamáa sín távo jí kpɔ́n gbeɖé ǎ; un ka sɔ́ lɛ́ yi agbanɖutɛn axɔ́sú ɔ́ tɔn kpɔ́n ǎ; un nu ahan e é nɔ́ ná nǔmɛsɛn tɔn éé má nyí Mawu jɔ Mawu ǎ lɛ́ɛ é kpɔ́n gbeɖé ǎ. 46 Un sɔ́ mɔ gbɛvíví ɖé kpɔ́n sín hwenu e un ko ɖyɔ́ ninɔmɛ é káká wá tɔ́n égbé din ǎ, afi ɖo hwɛ Aklúnɔ Mawu Ablaxámu tɔn kpá jɛ́n ná nyí nɛ́. 47 Óo! Mawu, hwi mɛ e kpé nǔ wú bǐ é, bo ɖótó mɛ e ma sɔ́ ɖo nukúnɖíɖó mɛ vo káká ɖé ǎ lɛ́ɛ é sín gbe; yǐ mǐ sín mɛdídá lɛ́ɛ sí, bó ɖe xɛsi sín ayi mɛ nú mǐ.”
Currently Selected:
Ɛsitɛ́ɛ Glɛ̌sigbe C: FONDC
Highlight
Copy
Compare
Share
Want to have your highlights saved across all your devices? Sign up or sign in
La Bible en langue fon © Alliance Biblique du Bénin, 2012.