Balúki 4
4
1 Sɛ́núnywɛ́ ɔ́, sɛ́nwéma Mawu tɔn wɛ;
sɛn e ɖe tɛgbɛ ɔ́ wɛ.
Mɛ e nɔ xwedó e lɛ́ɛ bǐ ná nɔ gbɛ;
mɛ e nɔ jó e dó lɛ́ɛ bǐ wɛ ná kú.
2Jakɔ́bu hɛ́nnu ví e mi, mi lɛ́ kɔ wá gɔ̌n tɔn!
Mi yí i. Mi zɔn wěziza tɔn mɛ ɖidó fí e é hɔ́n wě ɖe é.
3Mi ma jó wi mitɔn nú mɛ ɖé lɛ́ɛ kpowun ó.
Mi ma jó nǔ e mi ɖó acɛ ná é dó nú toɖévomɛnu ɖé ó.
4Mi mɛ Izlayɛ́li ví lɛ́ɛ ɔ́, nǔ nyɔ́ nú mi,
ɖó mi tunwun nǔ e nyɔ́ Aklúnɔ nukún mɛ ɔ́.
MAWU DÓ GBƆ NÚ TOGUN TƆN
Mɛ e è tún to ná lɛ́ɛ ɖó ná ɖó akɔ́nkpinkpan
5Kpan akɔ́n togun ce;
hwi mɛ e nɔ flín Izlayɛ́li é.
6È sa mi nú togun ɖé lɛ́ɛ,
é ká nyí kún mitɔn ná vívá wú wɛ ǎ.
Mawu jó mi nú kɛntɔ́ mitɔn lɛ́ɛ,
ɖó mi dó xomɛsin xomɛ n'i.
7Mi dó xomɛsin nú Gbɛɖótɔ́ mitɔn,
ɖó mi jó éyɛ́ dó bó sá vɔ̌ nú nǔmɛsɛn lɛ́ɛ.
8Mi wɔn Mawu e ɖo gbɛ tɛgbɛ ɔ́,
bó hɛn mi vǐ ɖɔhun é.
Mi lɛ́ ná wǔvɛ́ Jeluzalɛ́mu,
Jeluzalɛ́mu e nyí nɔ nú mi bo nɔ ná nǔɖuɖu mi é.
9É mɔ xomɛsin Mawu tɔn jɛ mi jí bó ɖɔ:
“Mi se xó ce, mi toxo e lɛ́ dó Sinyɔ́ɔ lɛ́ɛ mi!
Mawu sɛ́ aluwɛ ɖaxó ɖé dó mì.
10Un mɔ lě e Mawu Mavɔmavɔ nya vǐ ce lɛ́ɛ
gǎnnugǎnnu dó gbě gbɔn é.
11Un hɛn yě vǐ ɖɔhun kpó awǎjijɛ kpán,
lo ɔ́, aluwɛ kpó wǔvɛ́ kpó mɛ wɛ un mɔ yě ɖe bɔ yě ɖidó.
12Mɛ ɖěbǔ ɖó ná j'awǎ ɖó un nyí asúkúsi,
bɔ mɛ gěgé jó mì dó wǔtu ǎ.
Un kpo nyi ɖokpónɔ, ɖó hwɛ e vǐ ce lɛ́ɛ hu e wútu.
Yě jó Mawusɛ́n ɔ́ dó.
13Yě kpé nukún sɛ́n tɔn lɛ́ɛ wú ǎ;
yě zán gbɛ yětɔn ɖěe é byɔ́ yě gbɔn ɔ́ ǎ,
yě dó vɛ̌ nú ali jlɔ́jlɔ́ e é kplɔ́n yě ɔ́.
14Mi sɛ yá mi, toxo e lɛ́ dó Sinyɔ́ɔ lɛ́ɛ e mi!
Mi flín ɖɔ Mawu Mavɔmavɔ wɛ dɔn vǐ ce súnnu,
vǐ ce nyɔ̌nu bó tún to nú yě.
15É sɛ́ togun ɖé dó sín zɔga dó yě,
togun goyítɔ́ ɖé, bó nɔ́ dó gbe baɖabaɖa ɖé.
Mɛ énɛ́ lɛ́ɛ nɔ́ sí degénɔ ǎ;
yɔkpɔ́vú sín nǔ ka nɔ́ blá wǔ nú yě ǎ.
16Yě kplá vǐ vívɛ́ná asúkúsi ɔ́ tɔn,
yě gbi vǐ tɔn nyɔ̌nu lɛ́ɛ sín así tɔn,
bó jó e ɖokpó nɔ́ dó.
Jeluzalɛ́mu ɖo akɔ́nkpinkpan ná vǐ tɔn lɛ́ɛ wɛ.”
17Vǐ ce lɛ́ɛ mi, étɛ́ un ka ná wa
dó dó wǔsyɛ́n lanmɛ nú mi?
18Mɛ e sɛ́ nyladó nɛ́ lɛ́ɛ dó mi ɔ́
jɛ́n ná lɛ́ hwlɛ́n mi sín kɛntɔ́ mitɔn lɛ́ɛ sín alɔ mɛ.
19Vǐ ce lɛ́ɛ mi, mi yi, mi mlɛ́ ali mitɔn;
nyɛ ɖokpónɔ géé ɖo fí. 20Un ɖe fífá hwenu sín awu ce ɖ'ayǐ,
bó sɔ́ vɔ̌sísávɔ dó wǔ.
Un ná ɖo xó sú ylɔ́ Mawu Mavɔmavɔ wɛ
nú azǎn e kpo bɔ un ná nɔ gbɛ xɔ e bǐ.
21Mi kpan akɔ́n vǐ ce lɛ́ɛ mi.
Mi sú xó ylɔ́ Aklúnɔ,
é ná ɖe mi sín adǎngbomɛ mɛ,
sín kɛntɔ́ mitɔn lɛ́ɛ sín alɔ mɛ.
22Nukún ce ɖo Aklúnɔ Mawu Mavɔmavɔ jí;
un ɖo te ní hwlɛ́n mi gán.
Mawu wɛ ná mì awǎjijɛ énɛ́ ɔ́.
Ajalɔ̌nlɔn Mɛhwlɛ́ngántɔ́ ná ɖe xomɛnyínyɔ́ tɔn xlɛ́ mi.
23Aluwɛ kpó wǔvɛ́ kpó mɛ wɛ un ɖe bɔ mi yi.
Amɔ̌, Mawu ná kplá mi wá nú mì ɖo xwe kpó awǎjijɛ kpó mɛ.
24Égbé din ɔ́, toxo e sɛkpɔ́ mi lɛ́ɛ mɔ ɖɔ è tún to nú mi.
Zaanɖé din ɔ́, yě ná mɔ hwlɛngán e ná wá
sín Mawu mitɔn gɔ́n nú mi é.
Nǔgbó wɛ, hwlɛngán ɔ́ ná wá ɖo susu akpé Mawu Mavɔmavɔ tɔn mɛ.
25Vǐ ce lɛ́ɛ mi, mi yí suúlu,
bó dɛ ɖo xomɛ e Aklúnɔ sin dó mi ɔ́ nu.
Kɛntɔ́ mitɔn ɖo ya dó nú mi wɛ,
amɔ̌, mi ná mɔ é ná kíjá bǐ zaanɖé din yi kɔ́ mɛ,
bɔ mi ná gbídí kɔ n'i ɖó afɔ wú .
Mɛ e ɖu ɖo ahwan jí lɛ́ɛ nɔ́ ɖó walɔ énɛ́ xá mɛ e jí yě ɖu ɖe lɛ́ɛ.
26Vǐ ce lɛ́ɛ má ɖó gǎn ɖé nɛ́,
ali e vɛ́ gbɔn e jí wɛ yě ká gbɔn bó yi.
È kplá yě yi lě e è nɔ fin kanlin
bó nɔ́ dɔn yi gǎnnugǎnnu é ɖɔhun.
27Mi kpan akɔ́n vǐ lɛ́ɛ,
mi sú xó ylɔ́ Mawu!
É mɛ e tún to nú mi ɔ́ ná lɛ́ flín mi sɛ́ dó.
28É nyɔ́ mi nukún mɛ bɔ mi jɛ zɔ nú Mawu.
Énɛ́, din e mi lɛ́ kɔ e ɔ́,
mi bo dó gǎn mɔ̌hunkɔtɔn azɔn wǒ, bó ba ɛ mɔ.
29É mɛ e sɛ́ nyladó énɛ́ dó mi ɔ́ jɛ́n ná lɛ́ hwlɛ́n mi gán.
É jɛ́n ná lɛ́ ná mi awǎjijɛ káká sɔ́yi.
Jeluzalɛ́mu, kpan akɔ́n. 30Kpan akɔ́n Jeluzalɛ́mu,
Mawu e ylɔ́ nyǐkɔ towe dó ylɔ́ we ɔ́ ná dó gbɔ nú we.
31Heelú toxo e wa adǎnú xá we lɛ́ɛ,
heelú mɛ e j'awǎ hwenu e a j'ayǐ lɛ́ɛ!
32Heelú toxo e sɔ́ vǐ towe lɛ́ɛ dó húzú kannumɔ é.
Kéyi nú toxo e hɛn yě lɛ́ɛ é.
33Ée a j'ayǐ é ɔ́, é víví n'i.
Ée è gba we hánnyá é ɔ́, é j'awǎ.
Nǔgbó wɛ, é ná jɛ aluwɛ mɛ,
ɖó é ná húzú gbětótló.
34Ahwangɔgɔ e nyí toví tɔn lɛ́ɛ;
bɔ é nɔ́ ɖo susu xɔ wɛ lɛ́ɛ ɔ́, un ná yí bǐ sín así tɔn;
bɔ goyíyí tɔn ná húzú aluwɛ.
35Mawu Mavɔmavɔ ná ɖe
zo e ná ji káká é kɔn nyi jǐ tɔn,
bɔ yɛ nyanya lɛ́ɛ ná jɛ agban nyi gɔ̌n tɔn temasímásí.
36Jeluzalɛ́mu kpɔ́n zǎnzǎnhwe jí,
bó kpɔ́n awǎjijɛ e jǎwe nú we sín Mawu gɔ́n é.
37Lɛ̌ nukún kpɔ́n vǐ towe e
a mɔ bɔ yě wlí ali wǔvɛ́ tɔn bó yi lɛ́ɛ;
yě jǎwe, yě jǎwe sín zǎnzǎnhwe jí, sín gbadahwe jí;
kpódó gbeɖiɖe Mawu mímɛ́ kpó tɔn.
Yě gɔ́ túnflá kpó awǎjijɛ kpán,
ɖó susu Mawu tɔn wútu.
Currently Selected:
Balúki 4: FONDC
Highlight
Copy
Compare
Share
Want to have your highlights saved across all your devices? Sign up or sign in
La Bible en langue fon © Alliance Biblique du Bénin, 2012.