2 Tɛsalonikinu 2
2
Nǔ e ná jɛ cóbɔ Jezu ná lɛ́ kɔ wá é
1-2 Nɔví lɛ́ɛ mi, Aklúnɔ mǐtɔn Jezu Klísu sín wǐwá, kpó kplé e mǐ ná kplé ɖo gɔ̌n tɔn ɔ́ kpó sín xó ɔ́, è nǎ wá ɖɔ nú mi ɖɔ hwe ɔ́ nu ko su; é sixú nyí mɛɖé, bó ɖɔ Mawu wɛ dó sɛ́n gbɔn jǐ émítɔn, abǐ Wɛn Ɖagbejlátɔ́ ɖé, abǐ è sixú ɖɔ nú mi ɖɔ mǐ ɖésú ko wlán dó wěma mɛ sɛ́ dó. Ényí mi se xó énɛ́ lɛ́ɛ hǔn, mǐ ɖo kɛnklɛ́n dó nú mi wɛ ɖɔ mi ní ma nɔ yá wǔ jó miɖée dó nú ayixa mitɔn ní gbadó ó; xɛsi ma ka ɖi mi ó. 3Mi ma lɔn nú mɛɖé blɛ́ mi gbɔn alɔkpa ɖěbǔ mɛ ó, ɖó azǎn énɛ́ ná ko wá cóbɔ gǔfínfɔ́n gǔdo gúdo tɔn ɔ́ na wá yi ǎ; é ná ko wá cóbɔ Mɛdídá e sín kún è nǎ sú dó ɔ́ ná tɔ́n jɛ wěxo ǎ. 4 É ná lɔn bónú gbɛtɔ́ lɛ́ɛ sɔ́ ná sɛn nǔ e yě nɔ sɛn lɛ́ɛ ɖě ǎ; yě ká sɔ́ ná sɛn nǔ e yě nɔ dó ɖó Mawu ná ɔ́ ɖě ǎ. É ná sɔ́ éɖée ɖó aga, nú nǔ énɛ́ lɛ́ɛ bǐ, bó ná hun káká yi byɔ́ sinsɛnxɔ Mawu tɔn mɛ, bó na jínjɔ́n ayǐ, lobo ná jlá ɖɔ émí nyí Mawu.
5Mi sɔ́ flín ɖɔ hwenu e un kpo ɖo mi gɔ́n ɔ́, un nɔ ko ɖɔ nǔ énɛ́ lɛ́ɛ nú mi ǎ cé? 6É ɖo mɔ̌ có, nǔɖé ka tíin bó hɛn nǔ énɛ́ lɛ́ɛ ɖó te; mi ka tunwun nǔ e wɛ é. Ée nǔ cí mɔ̌ ɔ́, hwenu e Mɛdídá ɔ́ ná tɔ́n dó ɔ́ jɛ́n ná su cóbɔ é ná tɔ́n. 7Dǎnúwiwa sín hlɔ̌nhlɔ́n e ɖo wi mɛ ɔ́ ko ɖo azɔ̌ wa wɛ. Cóbónú nǔ énɛ́ lɛ́ɛ ka ná jɛ ɔ́, mɛ e hɛn Mɛdídá ɔ́ ɖó te ɔ́ jɛ́n ná gosín i hwɛ̌. 8 Hwenɛ́nu ɔ́, Mɛdídá ɔ́ ná tɔ́n, bɔ Aklúnɔ Jezu ná zé funfún e nɔ́ tɔ́n sín nu tɔn mɛ ɔ́ dó hu i, lobo ná sɔ́ wǐwá tɔn sín kínkɔ́n dó vívá kún tɔn. 9 Mɛdídá ɔ́ ná wá kpó Satáan sín hlɔ̌nhlɔ́n kpó, bó ná jlɛ́ nǔ tɛnmɛ tɛnmɛ, bó ná ɖe wuntun tɛnmɛ tɛnmɛ lɛ́ɛ xlɛ́, lobo ná bló nǔjíwǔ tɛnmɛ tɛnmɛ lɛ́ɛ; nǔ énɛ́ lɛ́ɛ ɖě ká nyí nǔgbó ǎ. 10É ná wa nǔ nyanya gbɔn alɔkpa bǐ mɛ, bó ná dó blɛ́ mɛ e ná dɔn lɛ́ɛ ná; yě ná dɔn, ɖó nǔgbó e ná hwlɛ́n yě gán ɔ́, yě yí ǎ; yě ká yí wǎn ná ǎ. 11Nǔ e wú wɛ Mawu sɛ́ hlɔ̌nhlɔ́n e nɔ dɔn mɛ, bɔ è nɔ wa nǔ nyi do ɔ́ dó yě, bónú yě ná nɔ ɖi nǔ nú adingban ɔ́ nɛ́. 12Énɛ́ ɔ́, mɛ e ma ɖi nǔ nú nǔgbó ɔ́ ǎ, bó ka nɔ yí wǎn nú nǔ agɔ wiwa lɛ́ɛ ɔ́, è nǎ ɖó hwɛ nú yě bǐ.
Mawu sɔ́ mi, bó ná hwlɛ́n mi gán
13Nɔví lɛ́ɛ mi, mi mɛ e Aklúnɔ yí wǎn ná lɛ́ɛ ɔ́, mǐ ɖó ná nɔ dó kú nú Mawu hwebǐnu ɖó ta mitɔn mɛ. Đó Mawu sɔ́ mi, bónú mi ná nyí mɛ nukɔn nukɔntɔn e é ná hwlɛngán, gbɔn Yɛsinsɛn e zɔ́n bɔ mi nyí étɔn ɔ́ kpódó nǔɖiɖi e mi ɖó nú nǔgbó ɔ́ kpán jí. 14Nǔ énɛ́ wú wɛ Mawu ylɔ́ mi gbɔn Wɛn Ɖagbe e mǐ dó mi ɔ́ gbla mɛ; é ylɔ́ mi bónú mi ná ɖó susu Aklúnɔ mǐtɔn Jezu Klísu tɔn. 15Nɔví lɛ́ɛ mi, ényí mɔ̌ hǔn, mi dó gǎn, bó hɛn nǔ e mǐ kplɔ́n mi lɛ́ɛ bǐ dó ayi mɛ: ée mǐ ɖɔ xó dó kplɔ́n mi lɛ́ɛ, abǐ ée mǐ wlán sɛ́ dó mi lɛ́ɛ é.
16-17Aklúnɔ mǐtɔn Jezu Klísu ɖésúnɔ kpódó Mawu Tɔ́ mǐtɔn e yí wǎn nú mǐ ɔ́ kpó, ní bló bónú mi ní kpan akɔ́n titewungbe; ní ná hlɔ̌nhlɔ́n mi, bónú mi ná nɔ́ wa nǔ e ko nyí nǔ ɖagbe ɔ́ bǐ, ɖo nǔwiwa mitɔn lɛ́ɛ kpódó xóɖiɖɔ mitɔn lɛ́ɛ kpán mɛ. Mawu wɛ na akɔ́nkpinkpan mavɔ mavɔ kpó nukúnɖíɖó ɖagbe kpó mǐ gbɔn fɛ́nú tɔn jí.
Currently Selected:
2 Tɛsalonikinu 2: FONDC
Highlight
Copy
Compare
Share
Want to have your highlights saved across all your devices? Sign up or sign in
La Bible en langue fon © Alliance Biblique du Bénin, 2012.
