2 Makabée 15
15
Nikanɔ́ɔ gbɛ́ ɖɔ émí kún ná nyi Gbɔjɛzán Jwifu lɛ́ɛ tɔn sín sɛ́n ɔ́ ó
1Nikanɔ́ɔ se ɖɔ Judáa kpódó mɛ tɔn lɛ́ɛ kpán ɖo Samalíi gbé ɔ́ jí. É sí te d'é jí ɖɔ émí ná yi tɔ́n ahwan yě ɖo gbɔjɛzán gbe, ɖó azǎn nɛ́ ɔ́ gbe ɔ́, nǔɖé kún sixú jɛ émí jí ó. 2Jwifu e è hɛn gǎnnugǎnnu, bɔ yě ná fun ahwan ɖo ahwangɔnu Nikanɔ́ɔ tɔn mɛ lɛ́ɛ ɖɔ n'i ɖɔ: “Ma yi hu yě kpó alǎnnú kpán dó xo dǎka ná mɔ̌ ó. Nyi azǎn e Mawu ɖe ɖó vo bó xo ɖɛ d'é jí é. Azǎn énɛ́ wɛ é sɔ́ dó ɖó azǎn mímɛ́ hú ɖě lɛ́ɛ bǐ. Flín ɖɔ Mawu nɔ mɔ nǔ jɛ nǔ bǐ mɛ!” 3Lo ɔ́, nya énɛ́ e dá hú nǔ bǐ é kanbyɔ́ ɖɔ: “Nǔbǐɖótɔ́ ɖé ka ɖo jǐxwé bó zɔ́n ɖɔ è ni nyi gbɔjɛzán ɔ́ a?” 4Jwifu lɛ́ɛ yí gbe ɖɔ: “Ɛɛn, Aklúnɔ Mawu gbɛɖe ɔ́ ɖésú, Nǔbǐɖótɔ́ e ɖo jǐxwé é wɛ ná gbe ɖɔ è ni nyi azǎn tɛ́nwegɔ́ e ɖo azǎn lɛ́ɛ mɛ é.” 5Nikanɔ́ɔ yí gbe ɖɔ: “Nyɛ, nyi wɛ kpa acɛ ɖo ayǐkúngban jí. Mi fɔ ahwanlyánnú mitɔn lɛ́ɛ bó ná wa azɔ̌ nú axɔ́sú ɔ́!” É ɖo mɔ̌ có é kpé wú bó wa nǔ baɖabaɖa e é kó lin nɛ́ é ǎ.
Judáa dó akɔ́nkpinkpan lanmɛ nú mɛ tɔn lɛ́ɛ
6Goyíyí gɔ́ ayi mɛ nú Nikanɔ́ɔ. É kó jɛ nukɔn, bó ɖo go yí wɛ ɖɔ émí ná fɔ ahwanlyánnú e émí ná yí sín Judáa kpódó mɛ tɔn lɛ́ɛ kpán sí é dó mɛ ahwanjíɖuɖexɔ ɖokpó ná. 7Lo ɔ́, Judáa Makabée ɖó jiɖiɖe ɖésú. É tunwun ɖɔ Aklúnɔ ná jɛ ahwan yě jí. 8Énɛ́ wú wɛ é ná akɔ́nkpinkpan mɛ e ɖo kpɔ́ xá ɛ lɛ́ɛ é, bó ɖɔ nú yě ɖɔ: “Mi ma ɖi xɛsi nú mɛ e ma nyí Jwifu ǎ bó ja ahwan tɔ́n mi gbé lɛ́ɛ ó. Mi flín hwe ɖěɖě nu Mawu kó dó alɔ mǐ wá yi lɛ́ɛ é bǐ. Din ɖésú ɔ́, mi lɛ́ ɖeji ɖɔ Nǔbǐwúkpétɔ́ ɔ́ ná ná mi ɖuɖéjí.” 9Judáa nɔ sɔ́ Mawuxówéma sín akpáxwé e ɖɔ xó dó Mɔyízisɛ́n ɔ́ kpódó gbeyíɖɔ Mawu tɔn lɛ́ɛ kpán wú é dó ná akɔ́nkpinkpan yě. É lɛ́ flín yě ɖuɖéjí e yě ko ɖó wá yi lɛ́ɛ é. Lě e é dó akɔ́nkpinkpan akɔ́nkpinkpan jí nú yě gbɔn é nɛ́. 10Ée é fɔ́n kan ɖó dó nǔ wú yětɔn dó jǐ é gúdo ɔ́, é ɖɔ ayi hízíhízí mɛ e ma nyí Jwifu ǎ lɛ́ɛ é tɔn, bó ká ɖɔ xó nú yě dó lě e yě dó akpá, bó má ɖe ǎ gbɔn é wú ɔ́, yě wá yí gbe nú xó tɔn. 11Lě e Judáa sɔ́ ahwannú nú mɛ tɔn lɛ́ɛ ɖokpó ɖokpó gbɔn é nɛ́. É ɖɔ xó nú yě dó alɔcyɔ́nmɛjí e gǎglónú lɛ́ɛ kpó gǎ lɛ́ɛ kpó nɔ́ ná mɛ é wú ǎ, lo ɔ́, é ɖɔ xó syɛ́nsyɛ́n ɖé lɛ́ɛ bónú yě ná ɖeji ɖɔ émí ná ɖu ɖ'é jí.
Bó ná sú ta ná ɔ́, é ɖɔ dlɔ̌ e é kú é nú yě. È hɛn ɔ́, è nǎ ɖeji dó dlɔ̌ nɛ́ ɔ́ wú, bɔ é dó awǎjijɛ lanmɛ nú yě bǐ. 12Nǔ e Judáa mɔ ɖo dlɔ̌ tɔn mɛ ɔ́ ɖíe: Jɛ nukɔn ɔ́, é mɔ vɔ̌sánú-xwlémawutɔ́ ɖaxó xóxó Oniyási. Gbɛtɔ́ ɖagbe ɖé wɛ, bó nɔ́ sɔ́ éɖée hwe, bó nɔ́ dɔn mɛ dó wǔ. É nɔ́ ɖɔ xó ganjí, bó kó kplɔ́n lě e è nɔ zán gbɛ ɖagbe gbɔn é sín kpɛví mɛ tɔn ɖokpóó. Hǔn, Oniyási sín alɔ ɖo jǐ, bɔ é ɖo vo sa nú Mawu dó togun Jwifu lɛ́ɛ tɔn ta mɛ wɛ. 13Mɔ̌ ɖokpó ɔ́, Judáa lɛ́ mɔ nya ɖé; nya ɔ́ ɖó ɖa wěwé tété; mɛjɔmɛ wɛ n'i, bó cí mɛ e ɖó acɛkpikpa nukúnɖéjí ɖé é ɖɔhun. 14Oniyási ɖɔ: “Gbeyíɖɔ Mawu tɔn Jelemíi ɖíe. É yí wǎn nú mǐ mɛ e nyí nɔví tɔn lɛ́ɛ é, bó nɔ́ sa vo nú Mawu ɖésú dó togun mǐtɔn kpódó toxo mímɛ́ Jeluzalɛ́mu ɔ́ kpán tamɛ.” 15Jelemíi ka sɔ́ ɖisílɔ tɔn bó dlɛ́n sikádɛnkpe ɖokpó dó Judáa, bó ɖɔ n'i ɖɔ: 16“Yǐ dɛnkpe mímɛ́ élɔ́. Mawu wɛ ɖo sísɔ́ dó así nú we wɛ. É wɛ a nǎ sɔ́ dó ɖu ɖo kɛntɔ́ towe lɛ́ɛ jí ná.”
È ɖu ɖo Nikanɔ́ɔ jí bó hu i
17Dlɔ̌ e Judáa kú é nyɔ́ káká bó ná jiɖiɖe sɔ́ja lɛ́ɛ. É fɔ́n akɔ́nkpinkpan yětɔn dó jǐ, bó ná hlɔ̌nhlɔ́n e è nǎ dó fun ahwan ná ɔ́ dɔ̌nkpɛvú e ma ko su bǐ ǎ lɛ́ɛ nú yě ná fun ahwan súnnu glegbenu ɖɔhun. Ahwandán wɛ gbo Jeluzalɛ́mu, sinsɛn nú wiwa ɔ́ kpódó Sinsɛnxɔ Mawu tɔn kpán. Jwifu lɛ́ɛ ɖe gbeta tɔ́n ɖɔ émí kún ná nɔ ahwankpá mɛ dó fun ahwan ó, lo ɔ́, émí ɖó ná yi kpé ahwanfuntɔ́ ɖé lɛ́ɛ, bó ná tɔ́n ahwan yě kpódó hlɔ̌nhlɔ́n yětɔn bǐ kpán. 18Ɖo ahwan énɛ́ ɔ́ mɛ ɔ́, Sinsɛnxɔ mímɛ́ ɔ́ nyí linkpɔ́n nú yě hú asi yětɔn lɛ́ɛ, vǐ yětɔn lɛ́ɛ, nɔví yětɔn lɛ́ɛ kpódó hɛ̌nnumɔ yětɔn lɛ́ɛ kpán. 19Mɛ e kpo ɖo Jeluzalɛ́mu lɛ́ɛ ɖésú ɖo adohu jí taala; yě ɖo xɛsi ɖi wɛ bó nɔ́ kanbyɔ́ yěɖée ɖɔ nɛ̌ ahwan e è nǎ fun ɖo gbětótló mɛ ɔ́ ká ná nyí gbɔn ǎ jí.
20Kɛntɔ́ lɛ́ɛ kó sɛ yěɖée kplé, yě ko to yěɖée bó ɖo ahwan lɔ jí. Yě bɛ̌ ajinakú lɛ́ɛ dó tɛn ɖagbe lɛ́ɛ mɛ, bɔ sɔ́ lɛ́ɛ ɖo akpá ɖokpó nú yě. Mɛ bǐ ɖo te kpɔ́n lě e ahwan e ɖo malín málín mɛ é ná fó gbɔn é. 21Judáa Makabée kpɔ́n ahwankpá wɔ̌buwɔ́bú nɛ́ lɛ́ɛ, ahwanlyánnú yětɔn tɛnmɛ tɛnmɛ lɛ́ɛ kpó ahwanjinakú yětɔn e ɖó adǎnkanlin sín ninɔmɛ lɛ́ɛ é kpán sɛ́ dó. É sɔ́ alɔ tɔn lɛ́ɛ yi jǐ, bó sa vo nú Mawu e sixú wa nǔ e nɔ jí wǔ lɛ́ɛ é; ɖó é tunwun ɖɔ ahwan jí ɖu ɖe kún nyí ahwanlyánnú hlɔ̌nhlɔ́nnɔ sín nǔɖé ó, Aklúnɔ wɛ nɔ ɖe gbeta tɔn tɔ́n, ɖó é wɛ nɔ ná ɖuɖéjí mɛ e jɛ xá lɛ́ɛ é.
22 Ɖɛ e é xo ɔ́ ɖíe: “Nǔbǐɖótɔ́, hwenu e Ezekiyási ɖo azinkpo jí é ɔ́, a sɛ́ wɛnsagun towe dó bɔ é hu gbɛtɔ́ adɔ̌kpo tɛ́nnɛ děgba ɖě afatɔ́n (185.000) ɖo Senakelíbu sín ahwangɔnu ɔ́ mɛ. 23Un ɖo kɛnklɛ́n dó nú we wɛ, hwi Nǔbǐɖótɔ́ e ɖo jǐxwé é, lɛ̌ sɛ́ wɛnsagun ɖagbe ɖokpó dó nukɔn mǐtɔn éhɔ́nmɛ, bónú xɛsi ɖaxó ɖé ná jɛ kɛntɔ́ mǐtɔn lɛ́ɛ jí. 24Ɖe nǔwúkpíkpé towe xlɛ́, bó dɔn tó nú mɛ e bɔ zun ɖó nú we, bó wá tɔ́n ahwan togun e nyí towe lɛ́ɛ é.” Lě e Judáa ɖó nǔ ɖɛxixo tɔn nu gbɔn é nɛ́!
25 Nikanɔ́ɔ sín ahwan lɛ́ɛ zɔn ahwankpɛn kpódó adǎnhan kpán mɛ, bó ɖo nukɔn wá wɛ. 26Judáa kpó ahwan tɔn lɛ́ɛ kpán ɔ́, yědɛɛ lɛ́ɛ ɖo Aklúnɔ ylɔ́ wɛ, bó ɖo vo sa n'i wɛ, bó zɔn kɛntɔ́ yětɔn lɛ́ɛ jí. 27Ée yě zě alɔ yětɔn lɛ́ɛ dó ɖo ahwan fun wɛ, bó ká ɖo vo sa nú Mawu wɛ ɖo ayi mɛ ɔ́, yě hu gbɛtɔ́ adɔ̌kpo ɖokpó děgba atɔn afɔwó-afatɔ́n (35.000) jɛjí. Nǔwúkpíkpé Mawu tɔn e yě mɔ ɖó nukún wú nɛ́ ɔ́ ná yě awǎjijɛ ɖaxó.
28Ée ahwan ɔ́ fó ɔ́, Jwifu lɛ́ɛ lɛ́ kɔ wá xwé kpódó xomɛhunhun ɖaxó ɖé kpán. Yě mɔ Nikanɔ́ɔ sín cyɔ, bɔ ahwanlyánnú tɔn lɛ́ɛ bǐ ɖo wǔ tɔn. 29Yě sú xó ɖaxó bó ɖú agbojlaka bó jɛ kú dó nú Aklúnɔ Nǔbǐwúkpétɔ́ ɔ́ jí, dó gbe yětɔn mɛ.
30Judáa jɛ́n nɔ jɛ nukɔn, bó nɔ́ fun ahwan ɖó togun tɔn nu, kpódó hlɔ̌nhlɔ́n tɔn bǐ kpán tɛgbɛ. Sín dɔ̌nkpɛvú mɛ tɔn ɖokpóó wɛ é kó yí wǎn nú to tɔn. É wɛ ná gbe ɖɔ è gbo ta Nikanɔ́ɔ bó sɛ́n alɔ tɔn ɖisí ɔ́, bó bɛ́ hɛn yi Jeluzalɛ́mu. 31É ɖésú yi kplé to ɔ́ mɛ nu lɛ́ɛ lobo sɔ́ vɔ̌sánú-xwlémawutɔ́ lɛ́ɛ ɖó vɔ̌sákpe ɔ́ nukɔn. Énɛ́ gúdo ɔ́, é sɛ́ mɛ dó ɖɔ yě ni yi kplá mɛ e ɖo ahohó ɔ́ mɛ lɛ́ɛ é wá. 32É sɔ́ nya dídá Nikanɔ́ɔ sín ta xlɛ́ yě. Mɔ̌ ɖokpó ɔ́, é lɛ́ sɔ́ alɔ e nya adǎkaxotɔ́ nɛ́ ɔ́ dlɛ́n dó Sinsɛnxɔ mímɛ́ Aklúnɔ Nǔbǐwúkpétɔ́ tɔn jí, kpódó goyíyí kpán é sɔ́ xlɛ́ yě. 33Énɛ́ gúdo ɔ́, é já ɖɛ̌ nya baɖabaɖa nɛ́ ɔ́ tɔn ywɛ́ywɛ́ywɛ́, bó bɛ́ nyi dó xɛ lɛ́ɛ. É zɔ́n bɔ è dǒ kan Nikanɔ́ɔ sín alɔ, bó sin dó gblǒlǒ mɛ kpan nukɔn Sinsɛnxɔ ɔ́, bó ná dó ɖe nǔ e taɖunɔ núwiwa tɔn hɛn wá n'i é xlɛ́. 34Énɛ́ ɔ́, yě bǐ jɛ awǒbóbó kpa nú Aklúnɔ susu lɛ́ɛ bǐ nɔ ɔ́ jí sɛ́ dó jǐxwé. Yě nɔ́ ɖɔ: “Kpikpa wɛ jɛ xá mɛ e ma jó Sinsɛnxɔ tɔn dó, bɔ è ɖu su ná ǎ é.” 35Judáa zɔ́n, bɔ è sin Nikanɔ́ɔ sín ta dó ahohó ɔ́ wú. Énɛ́ nyí wuntun e mɛ bǐ mɔ ɖɔ Aklúnɔ wá d'alɔ togun tɔn é.
36 Kplékplémɛ ɔ́ bǐ sɔ́ wěma bó dó zǒgbé jí ɖɔ azǎn élɔ́ ɔ́, azǎn ma na wɔn gbeɖé wɛ, bɔ è nǎ nɔ ɖu xwe tɔn xwewú xwewú tɛgbɛ ɖo Maadocée xwezán kpo sɔ. Azǎn wǎtɔngɔ́ e ɖo sun wěwegɔ́ e è ylɔ́ ɖɔ Adáa ɖo Alamɛ́ɛgbe mɛ é wɛ.
Tamɛ e mɛ e wlán wěma élɔ́ lin dó wěma ɔ́ wú é
37Nǔ e xá Nikanɔ́ɔ é nɛ́. Sín hwenɛ́nu ɔ́, Jeluzalɛ́mu toxo ɔ́ cí Jwifu lɛ́ɛ sín acɛkpikpa mɛ. Énɛ́ wú wɛ un ɖó nǔwlánwlán ce te ɖo fí. 38Nú lě e un to gbɔn é nyɔ́ bó dɔn mɛ hǔn, un bló nǔ e ba wɛ un ɖe é. Ényí blɔ̌ ká ɖ'é wú bɔ é má hwɛ́n nǔjɔnǔ ɖé ǎ hǔn, un ko bló ce e wú un kpé é. 39É nyɔ́ ɖɔ è nǐ nu vǐwunhan akú alǒ sin yǎyá ǎ. Lo ɔ́, ényí è dǒ sin kpɛɖé vǐwunhan akú cácá ɔ́ jí ɔ́, é nɔ́ nyí ahan bó nɔ́ wlí ɖɛ̌, bó nɔ́ dɔn mɛ. Mɔ̌ ɖokpó ɔ́, nyɔ̌wa e è dǒ wlán hwenuxó ɖé ná é wɛ nɔ nyɔ́ xixatɔ́ lɛ́ɛ nukún mɛ. Mɔ̌ hǔn, un nɔ te ɖo fí.
Currently Selected:
2 Makabée 15: FONDC
Highlight
Copy
Compare
Share
Want to have your highlights saved across all your devices? Sign up or sign in
La Bible en langue fon © Alliance Biblique du Bénin, 2012.