Roma ma 1
1
Wak sanna ne ŋgay tene ge Bulus ne
1Bulus, mo̰r ge Jeso Kris ne, na ge a ne tó na go na ka bage temeya, ge a ne mbege na ne waage fare ge kwaɗa ge Dok ne pe. 2Fare ge kwaɗa mbe, Dok ke wak tuli ne zaŋgal ya day na anabi#Isa 52:7, 61:1. ma ta ge kaŋ njaŋgeya ge mbegeya ma zi. 3Fare mbe jan na vya pal, na ge ne tó ne hir ge Dawda ne zi, le sḛ duur go, 4ne O̰yom ge mbegeya ta, a tó na go na Dok vya ge pool zi, swaga ge ne ta̰ ne naa ge siya ma buwal zi digi go, ndwara go Jeso Kris, nee Bageyal. 5Ne na ta, i ɓo bobo ge kat naa ge temeya ma no, ndwara gwan ne pehir ma pet pala ya na pe ne hon fareba ta dḭl ge na ne zi, 6aŋ ya naa mbe ma buwal zi me, aŋ ge Jeso Kris ne tó aŋ ya ma. 7Aŋ ge ne suwal Roma go ma pet, aŋ ge Dok laar ne wa̰ aŋ ma, aŋ ge Dok ne mbege aŋ ne na sḛ pe ma, kwa a̰se ne halas ge Dok ge nee Bá ne, ge Bageyal Jeso Kris ne nama ka aŋ pal.
Ene ge Bulus ne ge mbo ndil ná vya ge ne Roma go ma
8Zḛ ɓya, mbi gwan da ne gugu hon Dok ge mbi ne Jeso Kris zi, ne aŋ pe pet, ne da pe naa fá ne hon fareba ge aŋ ne ya dunya zi kaɗak. 9Ago, Dok, na ge mbi ne ke na temel ne dulwak ɗu swaga waage fare ge kwaɗa ge na vya ne naa ta, kwa kwa go mbi jan fare ge fareba. Na sḛ da ne kwarra go mbi dwat ya aŋ pal ɗaɗak. 10Kaɗeya ge mbi ne ma zi ɗaɗak, mbi kaɗe go, kadɗa a na laar ɓyareya ne, na hage mbi viya̰ mbo ndil aŋ. 11Ago mbi da ne ene ge mbo ndil aŋ, ne da pe mbi ba hon aŋ bobo ge O̰yom ne ma mbut, ndwara sirsi aŋ, 12ko, ne da pe, nee ɓo me laar iyalla, ne hon fareba ge aŋ ne ta, ne ge mbi ne ta me.
13Ná vya ma, mbi ke aŋ kwarra go, ɗaɗak mbi da ne dwatɗa go mbi mbo aŋ ta ya, ne da pe mbi temel kerra tó vya ma aŋ buwal dimma ne tó vya ma pehir ge ɗogle ma buwal zi go. Amma ɗiŋ ma̰ no mbi be ɓol viya̰ to. 14Mbi da ne wul ge Grek ma ne, ne ge naa ge pe yak ma ne, ne ge naa ge zwama ma ne, ne naa ge be kwa fare to ma ne ne mbi pal. 15Da ne pe no, mbi da ne ene gḛ ge mbi mbo waage aŋ ge ne suwal Roma go ma fare ge kwaɗa me.
16Ago mbi waage fare ge kwaɗa be saaso: na sḛ pool ge Dok ne ge ne má ndu ge daage pet ge ne hon fareba, Yuda ma zḛ ɓya, ba det ya Grek ma ta gale. 17Ago Dok hat naa dasana ma dosol na ndwara se da ne na ta, ne hon fareba ta ɗeŋgo, ne hon fareba pe, dimma ne a ne njaŋge go: «Ndu ge dosol ne hon fareba ta ba kat ne ndwara#Hab 2:4..»
Naa dasana ma pet a sone
18Ne digi ya, pore ge Dok ne dyan ja ndwara ke ho̰l ne naa ge ne sen Dok ma, ne naa ge be dosol to ma pal, nama ge dosol to ge bama ne zi a ne ndal fare ge fareba bama koo zi ma. 19Ago kaŋ ge ne mbya go a kwa Dok ne na ta a kwaya̰l go waŋ, a Dok sḛ dya̰ na nama ta ne. 20Ne pe dolla ge dunya ne ya day, fare ɗimil ge na ne dya̰ dyan naa ndwara go ne kaŋ kerra ge na ne ma ta, ndwara go pool ge na ne ge ɗiŋnedin ma ne dir ge na ne. Ne no pe, poreya ne naa dasana ma pe to. 21Ne jo̰ a kwa Dok puy ɗe, a be hon na hormo, ko a gwan ne gugu hon na dimma ne Dok go to. Amma a yá̰ ta ya̰meya ge dwatɗa ge baŋ yak ma pe go, nama pala ge be kwa fare to, gwan dwat dwatɗa ge jwap to. 22A ke ta naa ge zwama ma, a saŋge ya naa ge dale ma. 23Ge nama uware Dok ge hormo ge ɗiŋnedin, a ga ya uware naa dasana ma ge ne su su baŋ ma kḭḭm ma, ne njoole ma, ne kaŋ ge ne kḛ ma, ne ge ne sar ma#Dwa 4:16-18..
24Da ne pe no, Dok ɓya̰ nama kaŋ kerra ge seŋgre ma zi no, laar ɓyareya ge nama ne zi no, a go no a ga ke kaŋ ge saaso ma ta buwal zi no. 25Nama ge a ne er fareba ge Dok ne ne kaŋ ge hale, a ga uware kaŋ dolla ma, ne ker nama temel mo̰r, ge a te ya uware Bage dolla, ge ne mbya uwareya ɗiŋnedin! Ago!
26Da ne pe no, Dok ɓya̰ nama fare kerra ge saaso ma zi no, ago nama gwale ma er kaŋ ge ne mbya kerra ya ne kaŋ ge ne mbya kerra to. 27Naa sonmo ma me, a ya̰ kaŋ ge ne mbya kerra ne naa zaab, a ga olbe ene ta ta, naa sonmo ma ta buwal zi a ga ke kaŋ ge saaso ma, a go no, nama sḛ ma ɓol potɗa ge ya̰meya ge bama ne no.
28Ne jo̰ nama sḛ ma kuri go bama kwa Dok to, Dok ɓya̰ nama nama dwatɗa ge sone ma zi, a go no a gá ker kaŋ ge ne mbya kerra to ma no. 29A wiya cwacwak ne kaŋ kerra ge dosol pal to hir ge daage, ne ya̰l kerra, ne ene kerra, ne sone kerra, wiya ne yil, ne siya hunna, ne gool kerra, ne mbuɗiya ma, ne gele ta ma, ne or ta ma, 30ne syal ta koo ma, ne ho̰l kerra ne Dok ma, naa ge kar fare ma, naa ge pala ga̰l ma, naa ge jegreya ma, naa ge ɗor fare ma, naa ge be za̰ bá ma wak ma, 31naa ge dale ma, naa ge be koy bama wak tuli ma, naa ge be kwa naa a̰se ma, naa ge be sya naa ko̰r ma. 32Ne jo̰ a kwa sarya ge Dok ne kṵ kwa tyatyat go naa ge a ne ker kaŋ hir ge go mbe ma no mbya siya puy ɗe, a ke nama ke ɗeŋgo to, amma a vin naa ge ne ke kaŋ mbe pe vin.
Currently Selected:
Roma ma 1: FGN2013
Highlight
Share
Copy
Want to have your highlights saved across all your devices? Sign up or sign in
La Bible en langue Kim © Alliance Biblique du Tchad, 2013.