Haggay 1
1
Swaga ge sin zok ge Dok ne mbyat go
1Swaga ge Dariyus ne ke del azi na muluk zi go, ge dam ge zḛ ge ge saba myanaŋgal ne go, Bage ɗiŋnedin jan Zorobabel ge Chaltiyel vya, bage ne dó na ndwara ne suwal Yuda pal ma ne kep tuwaleya Juswa ge Yehosadak vya, ne anabi Haggay wak zi. 2Bage ɗiŋnedin, Bage naa ge mbal pore ma ne jan go: «Naa mbe ma jan go: ‹Swaga ge sin zok ge Bage ɗiŋnedin ne gale be mbyat to.›» 3Ndi, fare ge Bage ɗiŋnedin ne jya̰ ne anabi Haggay wak zi no: 4«A swaga ge aŋ kat aŋ zok ge siŋli gḛ ma zi ne ɗo, zok ge Dok ne ba gá burmiya suwar zi ɗaa? 5Se no, Bage ɗiŋnedin, Bage naa ge mbal pore ma ne jan ne: Dwa me ne kaŋ ge aŋ ne ke no pal kwaɗa. 6Aŋ zare se gḛ ceɗed, amma aŋ sya ŋgeɗo baŋ, aŋ zá kaŋzam, amma aŋ be huri to, aŋ njó, amma be mbyat aŋ to, aŋ ka̰ ba̰r ma, amma be wan aŋ ṵwa̰sal to, aŋ ame aŋ vaswa ma, amma a ka̰ galam ge pe zugul ma zi. 7Bage ɗiŋnedin, Bage naa ge mbal pore ma ne jan ne: Dwa me ne kaŋ ge aŋ ne ke no pal kwaɗa. 8Nde me njal pala digi, syá me uwara ma ya, sḭ́ me mbi zok digi. Go no, mbi sḛ ba ke tuli, mbi ba ɓol uwareya, Bage ɗiŋnedin jya̰ ne. 9Aŋ e aŋ jobreya go aŋ mbo syat gḛ ceɗed, amma aŋ syá ŋgeɗo baŋ, swaga ge aŋ ne in na ya yadiŋ, mbi uusi na uzi. Kyaɗa ɗaa? Ka̰l ge Bage ɗiŋnedin, Bage naa ge mbal pore ma ne. Da ne aŋ ne ya̰ zok ge mbi ne burmiya se pe. Amma aŋ sḛ ma ka hon ta ne aŋ zok ma pe. 10Da ne pe no, pḭr kuri be swar mam ya aŋ pal, suwar kuri be don kaŋ ma no me. 11Mbi dol baktar ja suwar pal, ne njal ma pal: gḛme ma, ne oyo̰r ma, ne uwara ge ke num ma, ne kaŋ ge ne don ne suwar pal ma mwaɗak a mbo fya̰ uzi. Baktar mbe mbo det naa dasana ma, ne kavaar ma, ne kaŋ kyarga ma pal pet.»
12Swaga mbe go no, Zorobabel ge Chaltiyel vya, ne kep tuwaleya Juswa ge Yehosadak vya, ne ɓase ge ne gá ma pet, a her fare ge Bage ɗiŋnedin, Dok ge bama ne, ne jya̰ bama ne anabi Haggay wak zi bama dulwak zi. A go no, Haggay wi temel ge Bage ɗiŋnedin, Dok ge nama ne ne ho̰ na no. Ɓase ma sḛ wá̰ vo Bage ɗiŋnedin ndwara se no me. 13Haggay, bage temeya ge Bage ɗiŋnedin ne, zwagre ɓase ma fare janna dimma ne Bage ɗiŋnedin ne jya̰ na go: «Mbi poseya ne aŋ, ka̰l ge Bage ɗiŋnedin ne.» 14Bage ɗiŋnedin cya̰me Zorobabel ge Chaltiyel vya, bage ne dó na ndwara ne suwal Yuda pal, ne kep tuwaleya Juswa ge Yehosadak vya, ne ɓase ge ne gá ma pet digi. A mbo ya wan temel ge zok ge Bage ɗiŋnedin, Bage naa ge mbal pore ma ne, Dok ge bama ne sinna digi, 15ge dam wara azi para anda ge saba ge myanaŋgal ne go, del ge azi ge muluk ge Dariyus ne zi.
Currently Selected:
Haggay 1: FGN2013
Highlight
Share
Copy
Want to have your highlights saved across all your devices? Sign up or sign in
La Bible en langue Kim © Alliance Biblique du Tchad, 2013.