Haggay 2
2
Zok ge Dok ne ge giya̰l mbo kat siŋli gḛ waɗe ge zaŋgal
1Dam wara azi para ɗu ge saba ge ɓyalar ne go, Bage ɗiŋnedin jan anabi Haggay go: 2«Jya̰ Zorobabel ge Chaltiyel vya, bage ne dó na ndwara ne suwal Yuda pal, ma ne kep tuwaleya Juswa ge Yehosadak vya, ma ne ɓase ge ne gá ma pet go: 3A wuɗi ge ne gá ne aŋ buwal zi ne ndwara ge ne kwa hormo ge zok ge zaŋgal mbe ne ne ɗaa? Ne se no, aŋ ndil na ne go gyana ɗaa? Te be gwan gá ne go a̰me pe to to’a? 4Se no, wa̰ mo dulwak Zorobabel, ka̰l ge Bage ɗiŋnedin ne! Wa̰ mo dulwak Kep tuwaleya Juswa ge Yehosadak vya! Wa̰ me aŋ dulwak ɓase ge ne suwal go ma pet, ka̰l ge Bage ɗiŋnedin ne! Ke me temel, ago mbi dagre ne aŋ, ka̰l ge Bage ɗiŋnedin, Bage naa ge mbal pore ma ne. 5Dimma ne wak tuli ge mbi ne ke ne aŋ swaga ge aŋ ne ɗage wat ne suwal Masar diŋ ya zum go, mbi o̰yom ya aŋ buwal zi. Sya me vo to! 6Ago Bage ɗiŋnedin, Bage naa ge mbal pore ma ne jan ne: Swaga gá ŋgeɗo, mbi mbo é pḭr ma ne suwar, ne maŋgaɗam ga̰l yuwam ma ne suwal ma ndaceya#Ibr 12:26-27.. 7Mbi mbo é pehir ge ɗogle ma pet ndaceya. Kaŋ kwaɗa ge pehir ge ɗogle ma ne ma pet, a mbo gene nama ya swaga mbe no go. Mbi mbo saŋge zok mbe hormo gḛ, Bage ɗiŋnedin, Bage naa ge mbal pore ma ne jya̰ ne. 8Fool kaal ma ne dinar ma a mbi ne ma ne, ka̰l ge Bage ɗiŋnedin, Bage naa ge mbal pore ma ne. 9Zok ge kare pe mbe no na hormo mbo kat ɓaŋlaŋ waɗe ge zḛ ge, Bage ɗiŋnedin, Bage naa ge mbal pore ma ne jya̰ ne. Mbi mbo hon swaga katɗa ge halas swaga mbe go, ka̰l ge Bage ɗiŋnedin, Bage naa ge mbal pore ma ne.»
Ɓase ma hat ya seŋgre
10Del ge azi ge muluk ge Dariyus ne zi, na dam wara azi para anda ge saba ge lamaɗo ne go, Bage ɗiŋnedin jan anabi Haggay go: 11«Bage ɗiŋnedin, Bage naa ge mbal pore ma ne jan na go: Ele fare pe naa ge tuwaleya ma ta ge eya ma pal gale: 12Kadɗa ndu a̰me wan duur ge tuwaleya ne ja na ba̰r wak zi, na ba̰r wak mbe tat katugum, ko kaŋ kogor ma, ko oyo̰r-jiya̰l, ko num, ko kaŋzam ge daage pe, kaŋ mbe ma hat mbegeya ɗaa?» Naa ge tuwaleya ma gwan ne na janna go: «To!» 13Haggay gwan ele nama go: «Kadɗa ndu a̰me tat siya ya, hat tene seŋgre. Kadɗa na tat kaŋzam a̰me ya, kaŋ mbe hat seŋgre ɗaa?» Naa ge tuwaleya ma gwan ne na janna go: «Hat seŋgre#Lev 22:4.!» 14Haggay gwan ne nama janna go: «Ɓase mbe ma go no, naa ge ne mbi ndwara se mbe ma go no, ka̰l ge Bage ɗiŋnedin ne. Nama kaŋ ge a ne ke ne bama tok zi ma go mbe no, nama kaŋ ge a ne tyare swaga mbe no go ma seŋgre.»
Pala gwanna se zwal ya wak busu ge Dok ne
15Se no, saare me kwaɗa ge kaŋ ge ne ɓyare e pe kerra ma̰ no pal. Tek ge aŋ gale ne é pe e njal ma ta pal ndwara sin zok ge Bage ɗiŋnedin ne, 16a ma fare ke aŋ ne ɗaa? Swaga ge ndu ne ndé hal mbo abe swara kaŋ pul wara azi, ɓol wol baŋ. Swaga ge ndu ne mbo swaga ɓerse oyo̰r ya ndwara ɓol oyo̰r jiya̰l kaŋ pul wara anuwa̰y, ɓol wara azi baŋ. 17Mbi tí aŋ kaŋ kyarga ma uzi, mbi kaare nama kaal yumur, mbi swa tuwar-ndaar ya vḛne nama uzi, mbi vḛne kaŋ ge aŋ ne ke ne aŋ tok zi ma pet uzi, go no puy, aŋ be gwan’a mbi ta to, ka̰l ge Bage ɗiŋnedin ne. 18Saare me kaŋ ge ne ɓyare kerra ma̰ mbe no pal kwaɗa. Ma̰ no a dam wara azi para anda ge saba lamaɗo ne ne, a dam ge aŋ ne dó zok ge Bage ɗiŋnedin ne pe ne, wá̰ me na aŋ pala zi kwaɗa. 19Swara ndwara gwan gá ya hal se ɗaa? Ko oyo̰r, ko fere, ko uwara grenad, ko olive, a be tol to. Ne ma̰ no, mbi é aŋ mbi wak busu.
Wak tuli ne Zorobabel pe
20Bage ɗiŋnedin gwan jan Haggay fare ge ndwara azi, dam wara azi para anda ge saba ne go. 21Jya̰ Zorobabel, bage ne dó na ndwara ne suwal Yuda pal go: «Mbi mbo é pḭr ma ne suwar ndatɗa. 22Mbi mbo gul muluk ma uzi, mbi mbo burmi pool ge pehir ge ɗogle ma ne ma uzi. Mbi mbo é naa ge ne njaŋge ne pus pore ma hal zoŋgre ne bama pus ma, naa ge ne njaŋge ne tisi ma mbo hal ne bama tisi ma uzi, a mbo gá ta ta hun ta. 23Dam mbe go, ka̰l ge Bage ɗiŋnedin, Bage naa ge mbal pore ma ne, mbi mbo wan mo ge mbi dore Zorobabel, ge Chaltiyel vya, ka̰l ge Bage ɗiŋnedin ne. Mbi mbo é mo dimma ne logom ge mbi ne go, ago mbi tá mo ne, ka̰l ge Bage ɗiŋnedin, Bage naa ge mbal pore ma ne.»
Currently Selected:
Haggay 2: FGN2013
Highlight
Share
Copy
Want to have your highlights saved across all your devices? Sign up or sign in
La Bible en langue Kim © Alliance Biblique du Tchad, 2013.