Sofoniya 3
3
Wak za̰ya to ge Ursalima ne
1Woo, suwal ga̰l ge za̰ wak to,
ge seŋgre, ne ge ke naa yál.
2Be za̰ wak to,
be vin mḛreya to,
be kan na saareya ma Bage ɗiŋnedin pal to,
be gwan’a Dok ge na ne ta to.
3Naa ga̰l ge temel ge ne na diŋ ma dimma ne sonne ge ne pyan go,
na naa ge kun sarya ma dimma ne bagomso ge ne an kyare gasamal go,
ya̰ a̰me digi ge zamma cya̰wak to.
4Na anabi ma naa ge jan fare asar ma,
ne naa ge boge naa ma ne,
na naa ge tuwaleya ma hat kaŋ ge mbegeya ma ya kaŋ ge baŋ,
a yele eya ma pala.
5Bage ɗiŋnedin dosol, ya suwal mbe diŋ,
ke a̰me ge ya̰l to.
Cya̰wak ɗaɗak ka kun sarya,
ka ben fare ma pe zum kwaya̰l, ya̰ a̰me ge vul to.
Go no puy ɗe, naa ge sone ma ke saaso to.
6Mbi pú pehir ge ɗogle ma ya uzi,
mbi gu nama gulum ga̰l keŋ ma se,
nama viya̰ pul ma gá ya kwaya̰l viŋ,
ndu ge gwan kale nama go to.
Mbi burmi nama suwal ma ya uzi,
ndu ge gwan kat nama go to.
7Mbi jya̰ tene go: Na ma̰ sya mbi vo,
na ma̰ vin mbi mḛreya.
Te ke go ɗe, mbi burmi na te to!
Amma swaga ge mbi ne ɗage mḛre nama go,
a gwan har ta ke sone waɗeya.
8Ne pe no, ka̰l ge Bage ɗiŋnedin ne, da̰re me mbi gale:
da̰re me dam ge mbi mbo ɗage ya ke ho̰l ne aŋ,
mbi vḭ tene go, mbi kote pehir ge ɗogle ma digi,
mbi ɓa̰ muluk ma pala ya digi,
ndwara á mbi laar ol nama pal,
ne pore juliliya ge mbi ne nama ta.
Ago laar ol ge mbi ne ge yil mbo ɗaabe suwar uzi kucup.
Dok mbo er pehir ge ɗogle ma dulwak
9Ago mbi mbo hat pehir ma wak ma harcal,
a mbo gá uware mbi ge Bage ɗiŋnedin dḭl,
a mbo gá ke mbi temel mo̰r pe dagre ɗu.
10Ko nama ge ne maŋgaɗam ge suwal Kuch ne ndwara zḛ ya ma,
nama ge ne ka uware mbi, ge mbi ne ɓarse nama se ma,
a mbo gene mbi bobo ma ya.
Dok mbo er Israyela vya ge ne gá ma
11Dam mbe go, saaso mbo gwan ke aŋ
ne aŋ kaŋ kerra ge sone ge aŋ ne ke mbi ndwara se ma pe to.
Ago swaga mbe go, mbi mbo ndage
naa ge ne hufugi pala ga̰l ma ne aŋ buwal zi uzi,
aŋ mbo gwan jegre ge njal ge mbi ne ge mbegeya pal to.
12Mbi mbo ya̰ naa ge a̰se ma, ne woɗegeya ma aŋ buwal zi,
a mbo deŋge ta Bage ɗiŋnedin ko̰o̰l zi.
13Israyela vya ge ne gá ma mbo gwan ke ya̰l to bat,
a mbo jan fare ge hale ma to bat,
fare ge laseya ma mbo gwan ndage ne nama wak zi to bat
Amma a mbo gá zamma ne fiya halas,
be ge ndu a̰me gwan da̰a̰me nama to.
Ursalima mbo gwan’a na byalam ge zaŋgal go
14Suwal ge Siyona ne, suwa̰le me digi ne laar saal,
Israyela vya ma, pya̰ me digi,
suwal Ursalima, ke tuli ne dulwak ɗu.
15Bage ɗiŋnedin her dṵṵl ge ne aŋ pal ya uzi,
e aŋ naa ge ho̰l ma ya syat bama pe so aŋ ndwara zḛ.
Bage ɗiŋnedin, Gan ge Israyela ne, ya aŋ buwal zi,
aŋ mbo gwan sya a̰me ge sone vo to bat.
16Dam mbe go, a mbo jan Ursalima go:
«O Siyona, sya vo to, ka̰ tene se to.»
17Bage ɗiŋnedin, Dok ge aŋ ne ya aŋ buwal zi,
a garlaŋ pore ne, a Bage máya ne me.
ne aŋ pe, mbo ke laar saal ge ɓaŋlaŋ,
laar wanna ge na ne zi, mbo gwan ne aŋ ya#3:17 Ne wak ibriniya zi go, laar wanna ge na ne zi, mbo kat wak ɗamal.
laar wanna ge na ne zi, mbo ke laar saal ge ɓaŋlaŋ ne aŋ pe.
18Mbi mbo kote nama ge ne gá ne uzi ya be ke vḛso to ma ya,
mbi mbo her dṵṵl ge saaso ne ge ne ka nama pal uzi.
19Dam mbe ma zi ya, mbi mbo mḛre nama ge ne ke aŋ yál ma,
mbi mbo má nama ge giɗi ma,
nama ge ne ɓarse se ma, mbi mbo kote nama ya digi.
Mbi mbo her aŋ pala digi,
aŋ dḭl mbo tol ge suwal ge aŋ ne ɓó saaso go ma go mwaɗak.
20Dam mbe ma zi ya, mbi mbo gwan ne aŋ ya,
dam mbe ma go, mbi mbo kote aŋ ya digi.
Ge pehir ge ne suwar pal pet ma buwal zi,
mbi mbo her aŋ pala digi.
Ge aŋ ndwara go, mbi mbo gwan ne aŋ ne mo̰r zi ya,
Bage ɗiŋnedin jya̰ ne.
Currently Selected:
Sofoniya 3: FGN2013
Highlight
Share
Copy
Want to have your highlights saved across all your devices? Sign up or sign in
La Bible en langue Kim © Alliance Biblique du Tchad, 2013.