Titus 3
3
Kaŋ ge naa ge Dok ne ma ne mbya kerra ma
1Vó nama pala go, nama gwa̰ ne nama pala ga̰l ma ne naa ge pool ne bama tok go ma pe se, nama gwa̰ ne nama pala se, nama ka ke temel ge kwaɗa ge daage pet#Rom 13:1, 1Bit 2:13., 2nama sá ndu a̰me to, nama ka ɓole fare ma pal to, nama ka suul, nama ŋgay hal ge suul ge nama ne naa ta pet. 3Ago nee sḛ ma me, zaŋgal nee ka naa ge dale ma, naa ge be za̰ wak ma, naa ge ya̰meya ma, mo̰r ge ene ne sḛ tuli hir ge daage ne ma, nee ka kat sone ne ene ma zi, nee ka ɓyare ta to, ne kwane ta. 4Amma swaga nee Bage máya Dok ne dya̰ na pe kerra ge na ne, ne laar wanna ge na ne ya naa dasana ma ta, 5má nee, a be ne temel kerra ge dosol ge nee ne ma ta to, amma ne kwa a̰se ge na ne ta. Ne sonna ge tolla ge giya̰l ne, ne erra ge giya̰l ge O̰yom ge mbegeya ne ta#Efe 5:26, Yoh 3:5.. 6Ka̰ O̰yom mbe nee pal zuliya bindik ne Jeso Kris nee Bage máya ta. 7Ne da pe no, ne kwa a̰se ge na ne ta, há nee naa ge dosol ma, ne da pe nee ɓo joo ge ndwara ge ɗiŋnedin ne, na ge nee ne jobre na. 8Fare mbe no, a fare ge fareba ne, mbi ɓyare go mo mḛ mo koo fare mbe pal janna, ne da pe nama ge ne ho̰ fareba Dok ta ma nama ho̰ ta ke temel ge kwaɗa. No a kaŋ ge kwaɗa, ne ge hamba ne naa dasana ma pe ne. 9Amma abe tene uzi ne fare ɗaŋgreya ge daal ma, ne pehir cemeya ma, ne gool ma, ne gaage ge Eya ma pal ta, ago a mbar a̰me pe to, nama hamba to#1Tim 1:4, 2Tim 2:23.. 10Ndu ge ne e caɗeya naa buwal zi, mḛre na ndwara ɗu, ko azi, ne go̰r go, abe tene uzi ne na ta#Mat 18:15-17.. 11Mo da ne kwarra go, ndu ge ne ke kaŋ hir ge go mbe no ya viya̰ ge sone go, ke sone, kun sarya tene pal.
Wak honna ge go̰r dab
12Swaga ge mbi ne mbo teme mo Artemas, ko Tikikus ya ya, há tene ya avun cap mbo ya ɓol mbi suwal Nikopolis go, ago mbi vḭ tene go mbi á somor swaga mbe go. 13Mbá Zenas bage ne kwa Eya ma tyatyat, ma ne Apollos, na kaage a̰me woɗege nama ne viya̰ pe to. 14Ke ya kwaɗa nee naa ge ne suwal Krete go ma me, nama hate ke temel ge kwaɗa ndwara mbar naa ge woɗegeya ma. Ne da pe nama ka baŋ bet to.
15Naa ge ne mbi ta ma pet a sá̰ mo wak. Sá̰ nee naa ge laar wanna hon fareba zi ma wak. Kwa a̰se ge Dok ne na ka poseya ne aŋ pet.
Currently Selected:
Titus 3: FGN2013
Highlight
Share
Copy
Want to have your highlights saved across all your devices? Sign up or sign in
La Bible en langue Kim © Alliance Biblique du Tchad, 2013.