Kaŋ mballa ma 86
86
Mbi yál ma zi, mbi tol mo
1Kaɗeya ge Dawda ne.
O Bage ɗiŋnedin, so mo togor ya mbi ta, gwa̰ ne mbi vinna,
ago mbi ndu ge a̰se ne, ndu ge woɗegeya ne.
2Koy mbi, ago mbi ndu ge ɗeŋger ne!
Má mbi ge mo dore, mo mbi Dok ne!
Mbi ka̰ mbi saareya ma ya mo pal.
3Bageyal, kwa mbi a̰se,
mbi tol mo dam ne dam!
4Ke mbi ge mo dore sḛ tuli, Bageyal,
mbi gwan tene ya mo ta!
5Mo Bageyal, mo kwaɗa, mo pore naa pore me,
kwa a̰se ge mo ne a ɓaŋlaŋ ne naa ge ne tol mo ma pe!
6Bage ɗiŋnedin, so mo togor ya za̰ mbi kaɗeya,
ka jejew za̰ mbi fyaso!
7Dam yál njotɗa ge mbi ne zi, mbi tol mo,
ago mo gwan ne mbi vinna ne!
8Bageyal, dok a̰me ne mo go to,
dok a̰me ge ke kaŋ dimma ne mo ne ke go to.
9Bageyal, pehir ge mo ne dó nama ma pet, a mbo mbo ya,
a mbo gur mo ndwara se,
a mbo hon mo dḭl hormo#Daa 15:4..
10Ago mo ɓaŋlaŋ, mo ke kaŋ ge ke naa ajab ma,
a mo Dok ne ɗu kikit.
11O Bage ɗiŋnedin, hate mbi mo koo pul,
mbi ba mbo fareba ge mo ne zi.
Ho̰ mbi dulwak ge mbi sya dḭl ge mo ne vo.
12Bageyal, Dok ge mbi ne, mbi siya̰le mo ne dulwak ɗu,
mbi mbo ka uware mo ɗiŋnedin.
13Ago kwa a̰se ge mo ne ne mbi pe a ɓaŋlaŋ,
mo pwa mbi ne taal ge siya ma ne se ya digi ne.
14O Dok, naa ge pala ga̰l ma ɗage ja mbi pal,
naa ge ke fare pool ma ɓyare hun mbi.
A ndil mo kaŋ senna.
15Amma mo Bageyal, mo Dok ge laar wanna ne,
bage kwaɗa, dṵṵl pore kerra zi,
zuliya ceɗed kwa a̰se zi, ne fareba zi.
16Saŋge mo ndwara ya mbi pal, kwa mbi a̰se,
ho̰ mbi ge mo dore mo pool,
mbi ge mo kale vya, má mbi!
17Ke mbi kaŋ ge kwaɗa,
go no, swaga ge mbi naa ge ho̰l ma ne kwa na ya, saaso ba wan nama.
Ago mo Bage ɗiŋnedin, mo bage sya mbi ko̰r ne,
mo bage iyal mbi laar ne.
Currently Selected:
Kaŋ mballa ma 86: FGN2013
Highlight
Copy
Compare
Share
Want to have your highlights saved across all your devices? Sign up or sign in
La Bible en langue Kim © Alliance Biblique du Tchad, 2013.
