Kaŋ mballa ma 78
78
Maana ge Israyela vya ma ne be mbyat vyaleya to
1Fare saareya ge Asaf ne.
Mbi pehir ma, só me aŋ togor za̰ mbi eya!
Só me aŋ togor za̰ fare ge ne mbi wak zi!
2Mbi hage mbi wak jan fare sḭ,
mbi waage fare ɗimil ge dḛ zaŋgal ma.
3Kaŋ ge nee ne za̰ nama,
ge nee ne kwa nama,
ge nee bá ma ne waage nee nama,
4nee ne pool ge woy nee vya ma nama to.
Nee waage doŋ pe ge ne mbo ne go̰r ya ma,
kaŋ ma ge ne e nama uware Bage ɗiŋnedin,
ne na pool ma, ne na kaŋ ajab ge ne ke ma.
5Ke wak tuli ne pehir ge Yakub ne,
ho̰ Israyela vya ma eya ma,
ho̰ nee bá ma wak no go nama ke nama vya ma na kwarra.
6Ne da pe, doŋ pe ge ne mbo ne go̰r ya na kwa na,
nama ke nama vya ge ne tol ya ma na kwarra,
nama sḛ ma waage nama vya kon ma me.
7Nama e nama saareya ma Dok pal,
nama vyale kaŋ ge Dok ne ke ma to,
nama koy na wak honna ma me.
8Go no, a mbo bole bama bá ma koo pul to,
nama ge ne ka za̰ wak to ma, naa ge pala ndaar ma,
naa ge dulwak ɗu to ma, ge o̰yom ne Dok pal to ma.
9Pehir ge Efrayim ne ne bama kajamle ma bama tok go,
dam pore go, a saŋge bama go̰r.
10A be koy wak tuli ge Dok ne to,
a be ke mborra na eya ma pal to.
11A vyale na kaŋ ge ne ke ma,
na kaŋ ajab ge ne e nama na kwarra ma.
12Ke kaŋ ge ajab ma nama bá ma ndwara go,
suwal Masar ya, Sowan go.
13Caɗe maŋgaɗam ga̰l yuwam se, e nama kaleya no,
e mam ma soge mḛya ne hub torra go#Wat 14:21-22..
14Ka ɗame nama gyala ne pḭr lurra nama pal,
ɗaal ma mwaɗak ne kwaya̰l ge ol me#Wat 13:21-22..
15Ɓá njal ma ful pul zi,
ho̰ nama mam njotɗa no baŋneya bindik#Wat 17:1-7, Isi 20:2-13..
16E mam ɓulla ne njal zi ya,
e mam sor so̰o̰l vit dimma ne maŋgaɗam go.
17Go no puy ɗe, a ka gwan ke sone na ndwara se,
ge ful pul ge fiya̰l no zi, a ka ke ho̰l ne Bage ne digi zi ya.
18Ne laar ɓyareya, a kugi Dok
na ho̰ bama kaŋzam ne bama sḛ pe#Wat 16:2-15, Isi 11:4-23,31-34..
19A ka ŋgare Dok fare janna go:
«Dok da ne pool ke kaŋzam ful pul zi ɗaa?
20A fareba, iya njal, mam ɓu ne zi ya no baŋneya bindik.
Na sḛ da ne pool hon kaŋzam,
ko hon na ɓase ma duur ɗaa?»
21Swaga ge Bage ɗiŋnedin ne za̰,
saŋge pore no,
ka juliliya Yakub vya ma pal no,
saŋge pore Israyela vya ma pal no.
22Ne da pe, a be hon fareba Dok ta to,
a be ya̰ bama saareya na pal go, na ma̰ má bama to.
23Ho̰ pḭr ne digi wak,
hage pḭr wak ma.
24Ká̰ maan ne digi ya nama pal wal nama no,
ho̰ nama kaŋzam ge digi ge no#Yoh 6:31..
25Ndu ge daage za kaŋzam ge naa ge Pool#78:25 Naa ge pool ma da ne pool kat maleka ma. ma ne,
teme nama ya kaŋzam baŋneya bindik.
26Ne digi ya, Dok teme saam ne ham ya,
ne pool ge na ne, e saam kwal ne mbii ya.
27Swá nama duur ya se dimma ne kuci go,
njoole ma ɓase dimma ne kafeɗem ne maŋgaɗam ga̰l yuwam wak go go.
28ká̰ nama ya nama swaga katɗa go,
koŋleya nama gur ma ziyar go.
29A za, a huri ndiŋ.
Ago Dok ho̰ nama kaŋ ge nama laar ne ɓyare.
30A gale ne be hurra,
kaŋzam gale ne nama wak zi ɗe,
31Dok saŋge pore nama pal,
pu naa ge pool ma ne nama buwal zi mbut,
hṵ Israyela vya ge bool ma uzi me.
32Go no puy ɗe, a ka gwan ke sone,
a hon fareba na kaŋ ge ajab ge ne ke ma pal to.
33Go mbe no, há nama dam ma dimma ne saam go baŋ,
a á bama del ma vo zi baŋ.
34Swaga ge Dok ne ka hun nama, a ka ɓyare Dok pe,
a ka saŋge ta ya na ta, a ka ɓyare na pe lilit.
35A ka gwan dwat go, na ka bama njal woy ta,
Dok ge ne digi zi ya ka bama bage zurra.
36Amma a ka lase na lase,
a ka kun na hale.
37Nama dulwak be kat na pal to,
a be koy na wak tuli to.
38Amma na sḛ, ka koy laar wanna ge na ne nama ta,
ka pore nama ya̰l ma, ka ya̰ be ge burmi nama pe uzi.
Ɗaɗak, ka wan tene pore ge na ne zi,
ka ndal tene ne juliliya ge na ne go.
39Dok kwa go, nama naa dasana ma ne bo,
saam ge ne kwal ge ne gwan’a to ne baŋ.
40Ge ful pul zi, a ka ke ho̰l ne Dok ɗaɗak,
a ka vḛne na laar ge ful pul ge fiya̰l go ɗaɗak.
41A ka gwan kugi Dok,
a ka e Bage mbegeya uzi hini cat ge Israyela ne laar hotɗa.
42A be dwat ne tok pool ge na ne,
swaga ge ne zu nama ne bage ho̰l tok zi ya to,
43ko ne kaŋ ŋgayya ge ne ke nama suwal Masar ya to,
ko ne na kaŋ ajab ge ne ke nama suwal Sowan go ma to.
44Saŋge nama maŋgaɗam ma ne nama mam so̰o̰l ma swama,
a be gwan day njot nama to#Wat 7:14-25..
45Ka̰ far ma nama ta, a ka mbal nama no,
ka̰ móy ma nama ta, a ka vḛne nama no me#Wat 7:26—8:11, 8:16-28..
46Ka̰ tere ma nama gaaso ma ta,
ka̰ tere baktar ma nama kaŋ kyarga ma ta#Wat 10:1-20..
47Karge nama gaaso oyo̰r ma uzi ne tuwar ndaar,
vḛne nama fere ma uzi ne iyalam me.
48Ka̰ tuwar ndaar kavaar ma ta,
ba̰y nama vog ge kavaar ma ne ne mam me#Wat 9:13-35..
49ka̰ na pore juliliya, ne na laar ol ge bibilu masar ma ta,
ka̰ na maleka ge ke naa yál ma nama ta me.
50Ka̰ pore ge na ne digi,
be ya̰ nama be ge hunna to.
Amma ka̰ mbogom nama ta.
51Hṵ masar ma vya pul soy ma no mwaɗak,
pehir ge Cham ne ma vya ge zḛ ge ge a ne tó nama pool ge bama ne zi ma#Wat 12:29..
52Abe na ɓase ma ya poleya na ndwara zḛ dimma ne gii ma go,
ka pole nama na ndwara zḛ ful pul zi dimma ne kavaar ma go#Wat 13:17-22..
53Ka koy nama cwacwagat, be ge a̰me ke nama vo to,
mam somɗe nama naa ge ho̰l ma se ya mwaɗak#Wat 14:26-28..
54Gene nama ya na suwal ge mbegeya go,
ge njal ge na ne maŋge na ne pool ge na ne go#Wat 15:17..
55Yá̰ pehir ge ɗogle ma nama ndwara zḛ,
va nama nama suwal ma joo se,
e pehir ge Israyela ne ma kat gur ge nama ne ma zi me#Jus 11:16-23, 18:10..
56Amma a kugi Dok ge ne digi zi ya,
a pili ta ne na,
a be koy na eya ma to#Nks 2:11-15..
57A saŋge na bama go̰r, a ka lase na dimma ne bama bá ma go,
a sele uzi dimma ne kajamle ge taal ŋgobol ne mbal go.
58A gumi pore ge Dok ne digi ne bama swaga siim ma,
a e na ke yil ne bama kaŋ cerra ma.
59Swaga ge Dok ne kwa no, saŋge pore,
saŋge Israyela vya ma na go̰r no.
60Saŋge na zok ge ne Silo go,
na ge ne ɗu ne naa dasana ma buwal zi na go̰r no#Jus 18:1, Irm 7:12-14, 26:6..
61Ɓya̰ na hormo naa ge ho̰l ma tok go,
ya̰ nama sandu wak tuli mbo paal zi.
62Ɓya̰ na ɓase ma pore wak zi,
saŋge pore na joo ta.
63Ol til nama bool ma ya swaga,
ndu ge mbal kaŋ ɗame nama vya kale ma to.
64Pore zam nama naa ge tuwaleya ma ya swaga,
nama kumur ma pool ge fyalla to.
65Dimma ne ndu ge ne fi dam go,
dimma ne ndu ge pateya ge oyo̰r jiya̰l ne fere na go,
Bageyal kore digi,
66dé nama naa ge ho̰l ma ne go̰r go,
ká̰ saaso ge ɓaŋlaŋ nama pal ɗiŋnedin.
67Amma cigi Yusuf vya ma uzi,
be tal pehir ge Efrayim ne to.
68Tá pehir ge Yuda ne,
njal ge Siyona ne ge na laar ne wa̰ na.
69Sḭ na zok digi dimma ne njal pala njeel go,
dimma ne suwar ge na pe ne dó ne go dol ɗiŋnedin go.
70Tá na dore Dawda,
wá̰ na da ne gii ma pe ya#1Sam 16:11-13, 2Sam 7:8, 1Maa 17:7..
71Wá̰ na da ne kavaar ma pe ya ndwara mbo ya koy na ɓase, Yakub vya ma,
na joo, Israyela vya ma.
72Dawda koy nama ne dulwak ɗu,
koy nama ɗeŋger zi.
Currently Selected:
Kaŋ mballa ma 78: FGN2013
Highlight
Copy
Compare
Share
Want to have your highlights saved across all your devices? Sign up or sign in
La Bible en langue Kim © Alliance Biblique du Tchad, 2013.
