Kaŋ mballa ma 72
72
Kaɗeya ne gan pe
1Kaŋ mballa ge Salomon ne
O Dok, ho̰ gan zwama ge kun sarya ne mo go,
ho̰ gan vya dosol ge mo ne.
2Na kṵ mo naa ma fare buwal dosol pal,
naa ge a̰se ma fare buwal ɗeŋger zi me.
3Njal ma, ho̰ me ɓase ma swaga katɗa ge halas,
Twal pala ma, ho̰ me nama katɗa dosol zi me!
4Na kṵ a̰se ma ge ne ɓase ma buwal zi fare buwal jwap,
na má naa ge woɗegeya ma,
na ró naa ge ne ke naa yál ma uzi me.
5Tek ge gyala gale ne zen ne go,
ko tek ge saba gale ne ɗele ne go,
na ka ne ndwara doŋ pe ma mbo doŋ pe ma!
6Na ka dimma ne mam ge ne swar sugur pal go,
ko dimma ne mam ge ne puwale swarra suwar pal go.
7Na dam ma zi, ndu ge dosol ɓo swaga katɗa ge kwaɗa,
ɗiŋ saba gá be ge ndwarra.
8Na ke muluk ne maŋgaɗam ga̰l yuwam ge no go mbo ge may ya,
ne maŋgaɗam Efrat go ɗiŋ mbo suwar pe ndegɗe ya.
9Naa ge ne ful pul zi ma mbo gur bama koo na ndwara se,
na naa ge ho̰l ma mbo mbur suwar.
10Gan ge suwal Tarsisa ne ma ne ge til zi ya ma a mbo tyare na bobo ma,
gan ge suwal Saba ne ma ne ge Seba ne ma mbo hon na bama bobo ma.
11Gan ma pet a mbo gur na ndwara se,
pehir ge ɗogle ma pet a mbo ke temel mo̰r hon na.
12Ago mbo zur ndu ge woɗegeya ge ne fyal tene,
ne ndu ge a̰se ge ne ndu ge mbarra to.
13Mbo kwa ndu ge taŋgay ma ne ndu ge woɗegeya a̰se,
mbo má nama.
14Mbo zur nama ne ndu ge ne ke nama yál ma
ne ndu ge ne ke fare pool tok go,
nama siya mbo kat ne yé gḛ na ndwara se.
15Gan ka ne ndwara dedet!
A tyare dinar ge suwal Saba ne ma hon na!
A ke kaɗeya ne na pe ɗaɗak!
A ka e wak busu na pal dam ne dam!
16Suwal dó̰ gḛme baŋneya bindik,
nama pala ma do̰ haal digi cim,
nama do̰ kwaɗa dimma ne njal ge Liban ne ne don kaŋ go.
Ge suwal diŋ, naa nṵsi siŋli
dimma ne sugur ma ne don ne ful zi go.
17Na dḭl ɓó pateya ɗiŋnedin,
na ka tolla tek ge gyala gale ne go!
Naa ka e ta wak busu ne na dḭl,
pehir ma pet nama ka jan go, na ka ne laar saal!
18Dok, Bage ɗiŋnedin,
Dok ge Israyela ne dḭl ɓo uwareya,
na ge ɗu kikit ke kaŋ ge ajab ma!
19Dḭl ge na ne ge pool ɓo uwareya,
na hormo wi suwar pal pet!
Na ka mbe go! Na ka mbe go!
20Dawda ge Isay vya kaɗeya pe aya.
Currently Selected:
Kaŋ mballa ma 72: FGN2013
Highlight
Copy
Compare
Share
Want to have your highlights saved across all your devices? Sign up or sign in
La Bible en langue Kim © Alliance Biblique du Tchad, 2013.
