Kaŋ mballa ma 71
71
Vyale mbi sabar ge mbi ne zi to
1O Bage ɗiŋnedin, mbi woy tene mo zi,
ya̰ saaso ke mbi to bat!
2Dosol ge mo ne zi, zu mbi, há mbi suli!
Só mo togor ya mbi ta, má mbi!
3Ka njal woy tene ge mbi ne,
na ge mbi ba ka mbo ya na zi ɗaɗak.
Mo ho̰ wak go mo má mbi,
ago mo mbi njal ne, mo mbi gulum ga̰l ne.
4O Dok, má mbi ne ndu ge sone tok go,
ne ndu ge ya̰l, ne ndu ge ne ke fare pool tok go!
5O Bageyal, Bage ɗiŋnedin, mbi e mbi jobreya ya mo pal,
ne bool ge mbi ne ya day, mbi ka̰ mbi saareya ya mo pal.
6Ne mbi ná laar zi ya day, mbi e mbi saareya ya mo pal,
a mo zwa mbi ne mbi ná laar zi ya zum ne.
Mbi mbo ka uware mo ɗaɗak.
7Mbi ka dimma ne kaŋ ŋgayya go naa gḛ ta,
Amma mo ɗe, mo mbi swaga woy tene ne.
8Ya̰ mbi wak na ka siya̰le mo,
na ka uware hormo ge mo ne ɗaɗak!
9Sabar ge mbi ne zi no, dó mbi uzi to,
Lwageya ge mbi ne zi no, ya̰ mbi to.
10Ago, mbi naa ge ho̰l ma far fare mbi pal,
naa ge ne huli mbi ma za̰ ta mbi pal.
11A jan ta go: «Dok saŋge na ya na go̰r,
ya̰ me nee na pe, wa̰ me nee na,
ago, ndu ge zur na to.»
12O Dok, abe tene uzi ya ne mbi ta to!
Dok ge mbi ne, sya mbi ko̰r ya avun cap!
13Nama ge ne ke mbi ho̰l ma,
saaso wa̰ nama, nama pe burmi uzi!
Nama ge ne ɓyare ke mbi yál ma,
saaso ke nama, nama gá cwageya cugum!
14Amma mbi ɗe, mbi e mbi saareya ya mo pal ɗaɗak,
mbi mbo ka dwage uware mo.
15Dam ne dam, mbi wak mbo ka wan dosol ge mo ne ma ne máya ge mo ne pe,
ne jo̰, mbi day ge wan nama pe pet to.
16Mbi mbo ka waage pateya ge mo ne, Bageyal, Bage ɗiŋnedin,
mbi mbo ka wan dosol ge mo ne fare pe ɗeŋgo.
17O Dok, mo hate mbi ne ne bool ge mbi ne ya day,
ɗiŋ ma̰ no, mbi waage kaŋ ajab ge mo ne ma.
18Uwale, O Dok, ɗiŋ mbo sabar ge mbi ne zi,
mbi pala ha pyasapso saal mbṵṵ puy, ya̰ mbi to,
ne da pe, mbi ka wan kaŋ ge mo ne ke ma pe hon doŋ pe mbe no,
ne wan pateya ge mo ne pe hon doŋ pe ge ne mbo ne go̰r ya ma me.
19O Dok, dosol ge mo ne ɓaŋlaŋ,
ago mo ke kaŋ ge ga̰l ma!
O Dok, a wuɗi mbya ne mo go ne ɗaa?
20Mo é mbi za̰ ŋgiɗim ne yál gḛ ge be to,
mo mbo gwan e mbi kat ne ndwara.
mo mbo gwan e mbi say ne tuul se ya digi.
21Mo mbo her mbi pala digi,
mo mbo gwan iyal mbi laar.
22Go no, mbi mbo uware mo ne mbi biliŋ
ne kwaɗa ge mo ne pe, Dok ge mbi ne!
Mbi mbo siya̰le mo ne ŋgeleŋ, Bage mbegeya uzi hini cat ge Israyela ne.
23Mbi mbo ka oyya digi ne laar saal,
mbi mbo siya̰le mo,
ne jo̰ mo má mbi ne.
24Dam ne dam mbi ɗel mbo ka waage dosol ge mo ne.
Nama ge ne ɓyare ke mbi yál ma
saaso mbo wan nama, nama pala mbo cwage se.
Currently Selected:
Kaŋ mballa ma 71: FGN2013
Highlight
Copy
Compare
Share
Want to have your highlights saved across all your devices? Sign up or sign in
La Bible en langue Kim © Alliance Biblique du Tchad, 2013.
