Kaŋ mballa ma 119
119
Eya ge Bage ɗiŋnedin ne ma ɗeŋger
1Nama ge ne he viya̰ ge ɗeŋger ma,
ne nama ge ne ke mborra eya ge Bage ɗiŋnedin ne ma pal da ne laar saal!
2Nama ge ne ke mborra na wak honna ma,
ne nama ge ne ɓyare na pe ne dulwak ɗu ma da ne laar saal!
3Nama sḛ ma ke a̰me ge ya̰l to bat,
a ka mbo na koo pul go!
4Mo ho̰ mo wak honna ma go,
a koy nama cemet.
5Ya̰ mborra ge mbi ne na ka jwap,
ne da pe, mbi ba koy eya ge mo ne ma!
6Go no, saaso mbo ke mbi to,
swaga ge mbi ne mbo katɗa ka ndil wak honna ge mo ne ma.
7Mbi mbo uware mo ne dulwak ɗu,
swaga hate mo wak yuwaleya ge dosol ma go.
8Mbi koy mo eya ma,
saŋge mbi mo go̰r dedet to!
9Bool ke gyana ba ke mborra ge jwap ɗaa?
Kadɗa na koy mo fare ma!
10Mbi ɓyare mo pe ne dulwak ɗu,
ya̰ mbi ya̰me uzi ne wak honna ge mo ne ma go to!
11Mbi koy mo fare ma mbi dulwak zi,
ne da pe, mbi ke sone mo ndwara se to!
12O Bage ɗiŋnedin, uwareya hon mo!
Hate mbi mo eya ma!
13Wak yuwaleya ge ne ndage ne mo wak zi ma pet,
mbi isi nama isi.
14Bí mo eya ma, hon mbi laar saal,
dimma ne kaŋ gan ma ne hon naa laar saal go.
15Mbi saare mo eya ma pal,
mbi hun mbi haŋgal mo koo pul ma pal.
16Mo eya ma ke mbi sḛ tuli,
mbi vyale mo fare ma to.
17Ke mbi ge mo dore kwaɗa,
ne da pe mbi ka ne ndwara,
go no mbi ba koy mo fare ma!
18Tyá̰ mbi ndwara zum,
ne da pe, mbi kwa siŋli ge mo eya ne!
19Mbi ka mbay baŋ ne suwar pal,
woy mbi mo wak honna ma to!
20Mbi da ne ene ge kwa mo wak yuwaleya
ge mo ne hon nama ɗaɗak!
21Mo mḛre naa ge pala ga̰l ma,
nama ge wak vḛneya ne nama pal ma,
ge a ne ya̰me ta uzi ya ne mo wak honna ma ta ma.
22Pwa mbi ya uzi ne wak saaso ma ne senna go,
ago, mbi ho̰ tene ke mborra mo wak honna ma pal.
23Ko naa ga̰l ma kote ta jan fare mbi pal puy,
mbi ge mo dore, mbi saare eya ge mo ne ma pal.
24Ago mo wak honna ma ke mbi sḛ tuli,
nama sḛ ma yuwale mbi ne.
25Mbi gá ya ɓyaleya suwar zi,
fare janna ge mo ne pal,
gwa̰ ne mbi ya kat ne ndwara!
26Mbi wa̰ mo mbi fare ma pe,
mo gwa̰ ne mbi vinna no,
hate mbi mo eya ma!
27Hate mbi hale mo wak honna ma pe,
go no, mbi ba ka saare mo kaŋ ajab ma pal!
28Yál njotɗa e mbi ya kan mḭḭm,
fare janna ge mo ne pal, wa̰ mbi digi!
29Abe mbi uzi kaal ne viya̰ ge hale go,
Kwaɗa ge mo ne zi, e mbi kwa mo eya ma!
30Mbi tá viya̰ ge fareba,
mbi gwan ne mbi pala wak yuwaleya ge mo ne ma pe se!
31Mbi wan tene mo wak honna ma ta,
o Bage ɗiŋnedin, ho̰ mbi saaso to!
32Mbi ba̰a̰re só viya̰ ge mo wak honna ma ne go,
ago mo ndage mbi ya digi suli!
33O Bage ɗiŋnedin, hate mbi viya̰ ge mo eya ma ne,
ne da pe, mbi ba ke mborra nama pal ɗiŋ mbo mbi dam pe aya.
34Ho̰ mbi kwarra ge mbi ba ke mborra mo eya ma pal,
go no, mbi ba koy nama ne dulwak ɗu.
35Ɗame mbi ge koo pul ge mo wak honna ne go,
ago mbi za̰ tuli ya na zi.
36E mbi dulwak mo wak honna ma pal,
be ge kaŋ ɓolla ge ne na viya̰ go to ma pal to.
37Cigi mbi ndwara ne kaŋ ge yak ma ta uzi,
e mbi kat ne ndwara viya̰ pul ge mo ne go.
38Wi fare ge mo ne jya̰ ne naa ge ne sya mo vo ma pe wak
ge mbi ge mo dore pal.
39Abe saaso ge ne ke mbi vo ne mbi ta uzi,
ago wak yuwaleya ge mo ne ma kwaɗa.
40Mbi da ne ene ne mo eya ma,
e mbi kat ne ndwara dosol ge mo ne zi.
41O Bage ɗiŋnedin, kwa a̰se ge mo ne na dé ya ɗiŋ mbi ta,
má mbi fare janna ge mo ne pal!
42Mbi mbo gwan ne naa ge ne sal mbi ma fare janna pal,
ne da pe, mbi e mbi jobreya ma ya mo fare janna ma pal.
43Ndage fare ge fareba ne mbi wak zi uzi to bat,
ago mbi saare wak yuwaleya ge mo ne ma pal.
44Mbi mbo ka koy mo eya ma ɗaɗak,
ɗiŋ mbo ɗiŋnedin.
45Mbi mbo viya̰ go halas,
ago mbi ɓyare wak honna ge mo ne ma pe.
46Mbi mbo jan fare ge mo wak honna ma ne gan ma ndwara se,
mbi mbo ke saaso to bat.
47Mbi sḛ ke tuli ne wak honna ge mo ne ma,
mbi laar wa̰ nama wan.
48Mbi abe mbi tok ma digi ge mo wak honna ma,
ge mbi laar ne wa̰ nama ma pe go,
mbi saare mo eya ma pal.
49Dwa ne fare ge mo ne jya̰ mo dore,
na ge ne é mbi jobreya.
50A na iyal mbi laar mbi yál ma zi ne,
mo fare janna e mbi kat ne ndwara ne.
51Ne jo̰ naa ge pala ga̰l ma cot mbi gḛ puy ɗe,
mbi sele uzi ne mo eya ma ta to.
52Mbi dwat da ne mo wak yuwaleya ge mo ne ho̰ i na dḛ zaŋgal,
Bage ɗiŋnedin, mbi ɓol mbi laar iyalla na zi.
53Mbi da ne tiiɗiya swaga ge mbi ne kwa naa ge
sone ma saŋge eya ge mo ne ma bama go̰r.
54Mo eya ma mbi kaŋ mballa ma ne,
katɗa ge mbi ne gwasal suwar pal no go.
55Ɗaal mbi dwat mo dḭl pal, Bage ɗiŋnedin,
mbi ka koy mo eya ma me.
56Kaŋ joo ge mbi ne,
ago mbi ke mborra mo wak honna ma pal.
57Bage ɗiŋnedin, mbi gwan jan go, joo ge mbi ne,
a koy mo fare ma.
58Ne dulwak ɗu, mbi ɓyare ke mo sḛ tuli,
sya mbi ko̰r fare janna ge mo ne ma pal.
59Mbi dwa mborra ge mbi ne pal,
mbi gwan ne mbi koo ya wak honna ge mo ne ma pal.
60Mbi har tene digi, mbi ke bolom to bat,
ndwara koy mo wak honna ma.
61Naa ge sone ma vwa mbi se ne táál puy ɗe,
mbi vyale mo eya ma to.
62Ɗaal ga̰l zi, mbi ɗage digi, mbi ka uware mo,
ne wak yuwaleya ge mo ne ge dosol ma pe.
63Mbi naa ge ne sya mo vo ma,
ne naa ge ne koy mo wak honna ma kondore ne.
64O Bage ɗiŋnedin, kwa a̰se ge mo ne wi suwar,
hate mbi mo eya ma.
65O Bage ɗiŋnedin, fare janna ge mo ne pal,
mo ke ne mbi ge mo dore kwaɗa.
66Hate mbi hale mo wak honna ma pe, ne kwa nama,
ago mbi e mbi saareya ma ya nama pal.
67Zḛ ge mbi pala gwa̰ se, mbi ka ya̰me ya̰me,
se no, mbi koy mo fare janna ma.
68Mo kwaɗa, mo ke naa kwaɗa me,
hate mbi mo eya ma.
69Naa ge pala ga̰l ma hat mbi ya seŋgre ne bama hale kunna,
amma mbi ke mborra mo wak honna ma pal ne dulwak ɗu.
70Nama dulwak togreya,
amma mbi, mbi za̰ tuli ya eya ge mo ne ma zi.
71A kwaɗa ge mbi za̰ yál,
ne da pe, mbi ba hate mo eya ma.
72Eya ge ne ndage ne mo wak zi ma kwaɗa ne mbi pe,
waɗe dinar ma ne fool kaal ma dubu.
73A mo tok ma ke mbi ne, a nama mḛ ne mbi ne go ne,
ho̰ mbi kwarra ne da pe, mbi ba hate mo wak honna ma.
74Naa ge ne sya mo vo ma ndil mbi, a ka ke laar saal,
ago mbi saare ya fare janna ge mo ne pal.
75Bage ɗiŋnedin, mbi kwa kwa,
mo wak yuwaleya ma dosol,
a fareba go, a mo e mbi za̰ yál ne.
76Ya̰ kwa a̰se ge mo ne na iya mbi laar,
dimma ne mo ne jya̰ mbi ge mo dore go.
77Ŋgay mbi mo laar wanna, go no mbi ba kat ne ndwara,
ago mo eya ma ke mbi sḛ tuli.
78Naa ge pala ga̰l ge ne ke mbi yál ne bama hale ma saaso ke nama,
mbi, mbi saare mo wak honna ma pal.
79Naa ge ne sya mo vo ma gwa̰ ya mbi ta,
nama ge ne kwa mo wak honna ma.
80Ya̰ mbi dulwak na ka ɗeŋger mo eya ma zi,
ne da pe, saaso ke mbi to.
81Mbi á tene ɓyare máya ge mo ne pe,
mbi saareya ya fare janna ge mo ne pal.
82Mbi ndwara ɓá ya go swaga ɓyare mo fare pe go,
Mbi ele tene go: «Mo iyal mbi laar ma del ɗaa?»
83Ko mbi há dimma ne ɗutulu ge ol-swama ne togre na go puy,
mbi vyale ne mo eya ma to.
84Mbi ge mo dore, mbi dam ma gá gyana ga ɗaa?
Mo mbo kun sarya naa ge ne ke mbi yál ma pal ma del ɗaa?
85Naa ge pala ga̰l ma al tuul mbi ndwara zḛ,
no a be eya ge mo ne ma pal to.
86Mo wak honna ma pet a fareba.
Naa ke mbi yál hale pal baŋ, sya mbi ko̰r.
87Gá ŋgeɗo, a te ya kot mbi suwar zi,
amma mbi ɗe, mbi ya̰ mo eya ma to.
88Kwa a̰se ge mo ne zi, ya̰ mbi kat ne ndwara,
ne da pe, mbi ba koy mo wak honna ma.
89O Bage ɗiŋnedin, mo fare a mḛya digi zi ya ɗiŋnedin.
90Fareba ge mo ne ya go mḛya doŋ pe ma ne doŋ pe ma,
a mo ɗù suwar pe ne, mḛ ne go no.
91A wak yuwaleya ge mo ne pal, kaŋ ma mḛ ne go no ɗiŋ ma̰ no,
ago kaŋ ma pet, a ke mo temel mo̰r.
92Te go mo eya ke mbi sḛ tuli to,
mbi su ya uzi yál ge mbi ne zi.
93Mbi vyale mo eya ma to bat,
ago mo e mbi kat ne ndwara da ne nama ta.
94Mbi ge mo ne ne, má mbi,
ago mbi ɓyare mo eya ma.
95Naa ge sone ma huli mbi ndwara ban mbi uzi,
amma mbi ka̰ mbi saareya ma ya mo wak honna ma pal.
96Mbi kwa go, kaŋ ge kwaɗa ma pet nama pe á á,
amma mo wak honna ma pe á to bat.
97Mbi laar wa̰ mo eya gḛ,
dam ma mwaɗak mbi hale na pe.
98Mo wak honna ma hon mbi zwama gḛ waɗe mbi naa ge ho̰l ma,
a mbi kaŋ ne ɗiŋnedin.
99Mbi kwa fare waɗe naa ge ne hon mbi hateya ma pet,
ne da pe, mbi kat da ne hale mo wak honna ma.
100Mbi kwa fare waɗe naa ge sabar ma,
ago mbi ke mborra mo eya ma pal.
101Mbi abe tene uzi ne viya̰ ge sone go,
ne da pe, mbi koy mo fare janna ma.
102Mbi hon mo wak yuwaleya ma mbi go̰r to,
ne jo̰ a mo sḛ, mo hate mbi nama ne.
103Mo fare janna ma tuli,
a tuli waɗe daaram mbi wak pul zi.
104Mbi ɓo fare kwarra da ne mo eya ma ta,
da ne pe no, mbi kwane viya̰ ge hale ne no.
105Mo fare ɗuli ne mbi koo pul se,
a kwaya̰l ne mbi viya̰ pul go.
106Mbi guni tene, mbi mbo ke na pal,
mbi mbo koy mo wak yuwaleya ge dosol ma.
107A ke mbi yál ya gḛ ge be to,
O Bage ɗiŋnedin, e mbi kat ne ndwara fare janna ge mo ne pal.
108O Bage ɗiŋnedin, ame mbi tuwaleya ge ne ndage ne mbi wak zi,
hate mbi mo wak yuwaleya ma.
109Ɗaɗak, mbi ya yál zi,
amma mbi vyale mo eya ma to.
110Naa ge sone ma hul faɗe mbi koo se puy ɗe,
mbi abe tene uzi ne mo eya ma ta to bat.
111Mo wak honna ma mbi joo ne ɗiŋnedin,
a ke mbi sḛ tuli.
112Mbi á tene ke mborra mo eya ma pal,
a mbi vaswa ne ɗiŋnedin.
113Mbi kwane naa ge wak azizi ma kwane,
mbi laar wá̰ mo eya ma.
114Mo mbi swaga woy tene ne, mo mbi ɓiyaar ne,
mbi ka̰ mbi saareya ma ya mo fare janna pal.
115Naa ge sone ma, abe me ta uzi ya ne mbi ta,
Mbi ke mborra wak honna ge mbi Dok ne ma pal!
116Mbyale mbi fare janna ge mo ne pal,
go no mbi ba kat ne ndwara,
ya̰ mbi saaso zi mbi jobreya pal to.
117Mbyale mbi, go no mbi ba ɓol máya,
mbi ndwara mbo ka dol mo eya ma pal ɗaɗak.
118Mo dol naa ge ne sele ne viya̰ ge mo eya ne go ma uzi,
ago nama dwatɗa ma hale baŋ.
119Mo kan naa ge sone ge ne suwar pal ma uzi pet
dimma ne naa ne kan kaŋ ge sone baal pe se ya go.
Da ne pe no, mbi laar wa̰ mo wak honna ma no.
120Vo ge mo ne hon naa ndat mbi ndat,
mbi sya mo wak yuwaleya ma vo.
121Mbi ke kaŋ ge jwap ma ne dosol,
ɓya̰ mbi, mbi naa ge ne ke mbi yál ma tok go to.
122Hé mbi ge mo dore fare mo pal, ne ke mbi kwaɗa,
ya̰ naa ge pala ga̰l ma ke mbi yál to.
123Mbi ndwara lar go swaga da̰re máya ge mo ne,
ne fare janna ge mo ne ge dosol go.
124Ke ne mbi ge mo dore kwa a̰se ge mo ne pal,
hate mbi mo eya ma.
125Mbi mo dore ne, ho̰ mbi kwa pe ɗugul,
ne da pe, mbi kwa mo wak honna ma.
126Bage ɗiŋnedin, swaga mbyat go ge mo ke fare a̰me,
a yele mo eya pala.
127Da ne pe no, mbi laar wá̰ mo wak honna ma gḛ
waɗe dinar, ko dinar ge siŋli gḛ ma no.
128Uwale, eya ge mo ne ma pet a dosol ne mbi ta,
mbi kwane viya̰ ge hale ma kwane pet.
129Mo wak honna ma siŋli,
da ne pe, mbi ke mborra nama pal no.
130Fare ge mo ne ma pe benna hon kwaya̰l,
hon naa ge ne kwarra jwap to ma fare kwarra.
131Mbi hage mbi wak ame mo fare mbi zi,
ago mbi laar wá̰ mo wak honna ma gḛ ge be to.
132Saŋge mo ndwara ya mbi pal, sya mbi ko̰r,
dimma ne mo ne vḭ tene ne naa ge nama laar ne wan mo ma pe go.
133Sirsi mbi fare janna ge mo ne pal,
yá̰ ya̰l a̰me ke muluk mbi pal to.
134Zu mbi ne naa ge ne ke mbi yál ma tok go,
go no, mbi ba koy mo wak honna ma.
135Dó mo ndwara mbi ge mo dore pal,
hate mbi mo eya ma.
136Mbi fyal ne mḭḭm mbi ndwara go bḭḭ,
ne da pe, naa gwan koy mo eya ma to.
137O Bage ɗiŋnedin, mo dosol,
mo wak yuwaleya ma dosol me.
138Mo ho̰ mo wak honna dosol zi,
ne fareba ge mbyatɗa tap zi.
139Yil ne mo fare pe ɓyare hun mbi uzi,
ne da pe, mbi naa ge ho̰l ma vyale mo fare janna ma.
140Mo fare ɗyage ɗyage,
mbi ge mo dore mbi laar wa̰ na wan.
141Mbi be a̰me pe to, kaŋ senna baŋ,
amma mbi vyale mo wak honna ma to.
142Dosol ge mo ne a dosol ge ɗiŋnedin ne,
mo eya ma fareba.
143Yál ma ne wak nonna ɓó mbi,
amma kaŋ ge ne ke mbi sḛ tuli, a mo wak honna ma.
144Mo wak honna ma dosol ɗiŋnedin,
ho̰ fare kwarra, go no mbi ba kat ne ndwara.
145Bage ɗiŋnedin, mbi á tene tol mo ne dulwak ɗu,
gwa̰ ne mbi vinna,
mbi ɓyare ke mborra mo eya ma pal.
146Mbi tol mo, má mbi,
mbi ɓyare koy mo wak honna ma.
147Tek swaga gale ne be ɓaya, mbi tol mo, mo sya mbi ko̰r,
mbi ka̰ mbi saareya ma ya mo fare janna pal.
148Tek swaga gale ne be ko̰yya, mbi hage mbi ndwara,
ndwara saare mo fare ma pal.
149Kwa a̰se ge mo ne pal, za̰ mbi ka̰l,
O Bage ɗiŋnedin, wak honna ge mo ne pal,
e mbi kat ne ndwara.
150Naa ge ne yan kaŋ ge seŋgre ma pe ma yan ja,
a abe ta uzi ya ne eya ge mo ne ma ta.
151Bage ɗiŋnedin, mo gwa,
mo wak honna ma pet a fareba.
152Mbi kwa kwa ne zaŋgal ya day, mo wak honna ma
mo e nama go, nama gá ɗiŋnedin.
153Ndi yál njotɗa ge mbi ne, zu mbi,
ago mbi be vyale mo eya ma to.
154Ɗaŋge mbi pe, zu mbi,
fare janna ge mo ne pal, e mbi kat ne ndwara.
155Máya kaal ne naa ge sone ma,
ne da pe, a ɓyare eya ge mo ne ma to no.
156O Bage ɗiŋnedin, kwa a̰se ge mo ne ɓaŋlaŋ,
wak honna ge mo ne pal,
e mbi kat ne ndwara.
157Naa ge ne ke mbi yál ma,
ne mbi naa ge ho̰l ma gḛ ge be to,
amma mbi be abe tene uzi ne mo wak honna ma ta to.
158Mbi ndil naa ge ne gwan ne go̰r
hon fareba ge bama ne zi ma kaŋ senna,
ndwara go, nama ge ne koy mo fare to ma.
159Ndi, mbi laar wa̰ mo wak honna ma wan,
o Bage ɗiŋnedin, kwa a̰se ge mo ne zi,
e mbi kat ne ndwara.
160Pe dolla ge mo fare ne, a fareba,
wak yuwaleya ge mo ne ma pet a dosol, a ɗiŋnedin.
161Naa ga̰l ma a ke mbi yál baŋ go ɗar,
amma mbi sya fare ge mo ne vo ɗeŋgo.
162Fare janna ge mo ne ma ke mbi sḛ tuli,
dimma ne ndu ne pál kaŋ gḛ ceɗed go.
163Mbi kwane hale kwane, mbi sḛ́ na sen,
amma mbi laar wa̰ mo eya ma.
164Dam ge ɗu go, mbi uware mo ndwara ɓyalar,
ne wak yuwaleya ge mo ne ge dosol ma pe.
165Naa ge nama laar ne wa̰ mo eya ma nama dulwak a fiya se halas,
kaŋ a̰me ge syal nama koo to.
166O Bage ɗiŋnedin, mbi jobre máya ge mo ne,
a go no, mbi ke mborra mo wak honna ma pal no.
167Mbi á tene koy mo njaŋgeya ma no,
mbi laar wan nama gḛ no me.
168Mbi koy mo eya ma ne mo njaŋgeya ma,
ago, viya̰ mborra ge mbi ne ma pet a ya mo ndwara se.
169O Bage ɗiŋnedin, ya̰ fyaso ge mbi ne ma dé mo ndwara se ya,
fare janna ge mo ne pal, ho̰ mbi fare kwarra!
170Ya̰ kaɗeya ge mbi ne ma dé mo ndwara se ya,
fare janna ge mo ne pal, zu mbi!
171Ya̰ wak ge mbi ne na uware mo,
ago mo hate mbi mo eya ma ne!
172Mbi ɗel na komre fare janna ge mo ne,
ago wak honna ge mo ne ma pet a dosol!
173Mo tok na sya mbi ko̰r,
ago mbi tá mo eya ma!
174O Bage ɗiŋnedin, mbi ɓyare máya ge mo ne,
mo eya ma ke mbi sḛ tuli.
175Ya̰ mbi ka ne ndwara mbi ba ka uware mo,
wak yuwaleya ge mo ne ma ka sya mbi ko̰r me!
176Mbi ya̰meya dimma ne tame ge ne bá̰ go,
ɓyare mo dore pe,
ago mbi vyale wak honna ge mo ne ma to bat.
Currently Selected:
Kaŋ mballa ma 119: FGN2013
Highlight
Copy
Compare
Share
Want to have your highlights saved across all your devices? Sign up or sign in
La Bible en langue Kim © Alliance Biblique du Tchad, 2013.
