Kaŋ mballa ma 118
118
Kwa a̰se ge Bage ɗiŋnedin ne á to
1Uware me Bage ɗiŋnedin, na sḛ kwaɗa,
ago kwa a̰se ge na ne a ɗiŋnedin!
2Israyela vya ma, jya̰ me go:
ago kwa a̰se ge na ne a ɗiŋnedin!
3Vuwal pe ge Aaron ne, jya̰ me go:
ago kwa a̰se ge na ne a ɗiŋnedin!
4Naa ge ne sya Bage ɗiŋnedin vo ma, jya̰ me go:
ago kwa a̰se ge na ne a ɗiŋnedin!
5Yál njotɗa ge mbi ne zi, mbi tó Bage ɗiŋnedin,
na sḛ gwa̰ ne mbi vinna, ya̰ mbi digi suli no.
6Bage ɗiŋnedin da ne mbi pe, mbi sya a̰me vo to.
Ndu dasana ke ne mbi da ɗaa#Ibr 13:6.?
7Bage ɗiŋnedin a bage sya mbi ko̰r ne,
mbi gá kyat mbi naa ge ho̰l ma kyat.
8Golgo ndu woy tene Bage ɗiŋnedin zi,
ge é na jobreya naa dasana ma pal!
9Golgo ndu woy tene Bage ɗiŋnedin zi,
ge é na jobreya naa ge tok pool ma pal!
10Pehir ge ɗogle ma pet, a ve mbi zi,
ne dḭl ge Bage ɗiŋnedin ne, mbi pú nama uzi pet.
11A terse mbi verra ya zi,
ne dḭl ge Bage ɗiŋnedin ne, mbi pú nama uzi pet.
12A ve mbi zi dimma ne daaram go,
dimma ne kore ne kabre ol go, a piri uzi,
ne dḭl ge Bage ɗiŋnedin ne, mbi pú nama uzi pet.
13A ɓya̰ mbi ndwara dol mbi se,
Bage ɗiŋnedin sya mbi ko̰r no.
14Bage ɗiŋnedin a mbi pool ne,
na sḛ bage má mbi ne#Wat 15:2, Isa 12:2..
15Ge gur ge naa ge dosol ma ne zi,
puwale me puwaleya ge ne laar saal go:
«Tok matoson ge Bage ɗiŋnedin ne ke kaŋ ya go!
16Tok matoson ge Bage ɗiŋnedin ne a herra digi!
Tok matoson ge Bage ɗiŋnedin ne ke kaŋ ya go!»
17Mbi su to, mbi mbo kat ne ndwara,
mbi mbo wan kaŋ ge Bage ɗiŋnedin ne ke ma pe.
18Bage ɗiŋnedin mḛre mbi,
amma be ya̰ mbi suya to#2Kor 6:9..
19Hage me mbi zok wak ge naa ge dosol ma ne,
mbi wá zi mbo uware Bage ɗiŋnedin!
20Ndi, zok wak ge Bage ɗiŋnedin ne no,
naa ge dosol ma wat zi da ne na!
21Mbi uware mo, ne da pe, mo gwa̰ ne mbi vinna,
a mo má mbi ne!
22Njal ge naa ge sin zok ma ne dó na uzi
gwan ja keŋ go, na ge zok dṵṵl ne ka ne na pal#Mat 21:42, Mar 12:10-11, Luk 20:17, Tkm 4:11, 1Bit 2:7..
23No, mbo da ne Bage ɗiŋnedin ta ya.
a kaŋ ajab nee ndwara zi taa#Mat 21:42, Mar 12:10-11.!
24Ndi, dam ge Bage ɗiŋnedin ne ke na no:
Nee sḛ ma ke tuli, nee ke laar saal!
25O Bage ɗiŋnedin, má i nde!
O Bage ɗiŋnedin, ho̰ i halla nde#Mat 21:9, 23:39, Mar 11:9-10, Luk 13:35, 19:38, Yoh 12:13.!
26Uwareya ka na ge ne mbo ya dḭl ge Bage ɗiŋnedin ne zi pal!
Ne zok ge Bage ɗiŋnedin ne zi ya, i uware aŋ#Mat 21:9, 23:39, Mar 11:9, Luk 13:35, 19:38, Yoh 12:13.!
27Bage ɗiŋnedin a Dok ne ɗu kikit,
a na zen kwaya̰l nee pal ne!
Wá me ɓase ma buwal zi ne gaar ma aŋ tok go,
mbo me ɗiŋ twal kḭḭm tuwaleya ma ta ya!
28Mo mbi Dok ne, mbi uware mo!
Dok ge mbi ne, mbi mbo ka dore mo!
29Uware me Bage ɗiŋnedin, na sḛ kwaɗa,
ago kwa a̰se ge na ne a ɗiŋnedin!
Currently Selected:
Kaŋ mballa ma 118: FGN2013
Highlight
Copy
Compare
Share
Want to have your highlights saved across all your devices? Sign up or sign in
La Bible en langue Kim © Alliance Biblique du Tchad, 2013.
