Kaŋ mballa ma 109
109
Kaɗeya ge ndu ge a ne dé na tamay ne
1Ne naa ge mbal kaŋ ma ga̰l pe: Kaŋ mballa ge Dawda ne.
O Dok, mo ge mbi ne uware mo,
ke wak ɗamal to.
2Ago naa ge sone ma ne naa ge hale ma
beŋge bama wak mbi pal,
a jan fare ge hale ma mbi pal.
3A ver mbi ya se ne bama fare osor ma janna,
a ɓá mbi pore baŋ ɗar.
4Ne jo̰ mbi laar wa̰ nama wan puy ɗe, a ke mbi ho̰l,
amma mbi ɗe, mbi ke kaɗeya.
5A gwan ne mbi sone mbi kwaɗa pal,
kwaneya mbi laar wanna pal.
6E ndu a̰me ge sone na ndwara zi,
ndu ge kaŋge na na mḛ na tok matoson pal!
7Swaga kun na fare buwal go, a wa̰ na ne fare,
na kaɗeya saŋge sone!
8Na dam ma gwa̰ zi woɗege gwa,
ndu ge ɗogle è na byalam temel zi#Tkm 1:20.!
9Na vya ma gá kya̰le,
na gwale gá kumur!
10Na vya ma gá anna buwal go kaɗe kaŋ,
nama mbo kaɗe kaŋ uzi ya kaal ne nama yàl ge gubul!
11Na naa ge wul ma wa̰ na kaŋ ma dwagal,
naa ge pe baŋ ma pá na kaŋ ma!
12Ndu a̰me na kwa na a̰se to,
ndu a̰me na sya na vya ge kḭya̰le ma ko̰r to!
13Na hir ma pe burmi uzi,
nama dḭl gwan kat doŋ pe ge ne mbo ne go̰r ya ma buwal zi to.
14A vó Bage ɗiŋnedin pala ne ya̰l ge na bá ma ne pe,
sone ge na ná ne na gu uzi to!
15Nama ka ɗaɗak Bage ɗiŋnedin ndwara se,
na gu nama dḭl ne suwar pal uzi!
16Ne da pe, be kwa naa a̰se to,
yá̰ ndu ge a̰se, ndu ge woɗegeya, ndu ge taŋgay pe,
ɗiŋ mbo hun na uzi!
17Na laar wa̰ vḛne wak naa pal,
wak vḛneya dé na pal!
Be ka ɓyare e wak busu naa pal to,
wak busu abe tene uzi ya kaal ne na ta!
18Ká̰ wak vḛneya na ta dimma ne ba̰r go,
na wá na zi dimma ne mam go,
na wá na kal wak zi dimma ne num go!
19Na ka larra na ta dimma ne ba̰r go,
na ka vwalla ɗaɗak na pul go dimma ne bit go!
20No a potɗa ge Bage ɗiŋnedin mbo pot mbi naa ge ho̰l ma ne,
ne naa ge ne jan fare sone mbi pal ma ne!
21Mo Bage ɗiŋnedin, Bageyal ge mbi ne, ke fare a̰me ne mbi pe,
ne dḭl ge mo ne pe!
Ago kwa a̰se ge mo ne a kwaɗa, zu mbi!
22Ago mbi ndu ge a̰se, ne ndu ge woɗegeya ne,
Mbi da ne tiiɗiya ne mbi zi!
23Mbi tit uzi ya dimma ne soŋgoy ge tit uzi ya go,
a yan mbi dimma ne naa ne yan tere go.
24Ne asiyam ge mbi ne ke pe, mbi koo ge mḛ digi to,
mbi sḛ á ya ne mbi ta uzi.
25Mbi gá ya nama kaŋ cotɗa,
swaga ge a ne kwa mbi, a syal bama pala.
26O Bage ɗiŋnedin Dok ge mbi ne, sya mbi ko̰r,
kwa a̰se ge mo ne zi, ma̰ mbi.
27Nama kwa go, na mo sḛ, mo ke fare mbe ne,
na mo Bage ɗiŋnedin, mo ke na ne.
28Nama sḛ ma vḛne wak, amma mo mo e wak busu,
nama ɗage ya digi, saaso mbo wan nama,
amma mbi ge mo dore, mbi laar mbo ke saal.
29Saaso mbo wan mbi naa ge ho̰l ma,
saaso mbo kulbi nama zi dimma ne ba̰r ga̰l go.
30Mbi mbo uware Bage ɗiŋnedin ne ka̰l ndaar,
mbi mbo komre na naa ɓase buwal zi.
31Ago na sḛ mḛ ndu ge woɗegeya tok matoson pal,
ndwara má na ne naa ge ne kun sarya na pal ma tok go.
Currently Selected:
Kaŋ mballa ma 109: FGN2013
Highlight
Copy
Compare
Share
Want to have your highlights saved across all your devices? Sign up or sign in
La Bible en langue Kim © Alliance Biblique du Tchad, 2013.
