Fare sḭ ma 14
14
1Gwale ge zwama sin na yàl,
amma ge dale gul na ne na tok zi ne.
2Ndu ge ne ke mborra dosol pal sya Bage ɗiŋnedin vo,
ndu ge ne ke mborra syagal sen na sen.
3Jegreya pyar ya fare janna ge ndu ge daal ne zi,
amma fare janna ge naa ge zwama ma ne koy nama koy.
4Ndu ge ne nday gar kaŋ to, na hal kat pṵṵl,
ndu ge ne nday pool digli ma, ɓol kaŋ gḛ.
5Ndu ge ne ke sayda ge fareba kun hale to,
ndu ge ne jan fare ge hale ke sayda ge hale.
6Ndu ge kalam ɓyare zwama pe, ɓol na to,
amma ndu ge ɗalla ɓol kwarra avun cap.
7Abe tene uzi ne ndu ge daal ta,
ne jo̰ mo ɓol fare kwara ne nama fare janna ma zi to.
8Ndu ge zwama ge ɗalla wan kaŋ kerra ge na ne ma pe wan,
amma daal ge naa ge dale ma ne a boge naa.
9Poreya ne naa ge dale ma ta biyal baŋ,
amma naa ge jwap ma kat tuli ta buwal zi.
10Ndu ge daage kwa kḭḭmi ne laar saal ge na ne ne,
ndu ge var na ne na dagre to.
11Yál ge naa ge sone ma ne mbo burmi uzi,
amma yál ge naa ge dosol ma ne mbo fyaɗe se#10:27..
12Ndu dasana ndil na kaŋ kerra ma kwaɗa,
e no ɗe, gene na mbo siya zi.
13Ndu da ne pool ka manna, amma ka za̰ yál na dulwak zi,
go̰r go, laar saal da ne pool á ne kḭḭmi.
14Ndu ge dulwak sone ɓol potɗa ge na kaŋ kerra ne,
ndu ge dulwak kwaɗa waɗe na waɗe.
15Ndu ge be kwa fare jwap to hon fareba fare ge a ne jan na ma pal pet,
amma ndu ge zwama kwa swaga e na koo kwa.
16Ndu ge zwama sya sone vo, abe tene ne na ta uzi,
amma ndu ge dale ndil tene mbyatɗa, gandale zi ya.
17Ndu ge ne ame pore avun ke fare ge dale,
ndu ge ne dwatɗa ge sone é naa sen na sen.
18Naa ge ne kwarra jwap to ma joo daal,
Fare kwarra a balme ge naa ge zwama ma ne ne.
19Naa ge sone ma mbo gur naa ge kwaɗa ma ndwara se,
naa ge sone ma mbo gá mḛya naa ge dosol ma viya̰ wak pala zum.
20Ndu ge a̰se, ko na kaam ma puy a kwane na kwane,
amma ndu ge gan na kondore ma gḛ.
21Ndu ge ne sen na kon ke sone,
ndu ge ne kwa naa ge woɗegeya ma a̰se da ne laar saal.
22Naa ge ne dwat ke sone ma ya̰me ya̰me,
naa ge ne dwat ke kwaɗa ma ɓol kwa a̰se ma ne fareba.
23Temel kerra jyat baŋ to,
ndu ge ne ka ne farra pe gwan a̰se.
24balme ge naa ge zwama ma ne a nama kaŋ ɓolla,
naa ge daal ma kat bama daal zi.
25Ndu ge ne ke sayda ge fareba ma̰ naa,
amma ndu ge ne kun hale mbuɗi naa.
26Jobreya ge hatal ya sya Bage ɗiŋnedin vo zi,
Ago na sḛ swaga woy ta ge na vya ma ne ne.
27Sya Bage ɗiŋnedin vo, a mam ge ɗermel,
pwat naa ne faɗe ge siya ne zi ya uzi#13:14..
28Hormo ge gan ne, a swaga ge ne kat ne naa gḛ,
swaga ge naa ne gá woɗege, a na detɗa ne.
29Ndu ge ne gumi pore avun to a ndu ge ne kwar fare gḛ ne,
Ndu ge ne ame pore avun, ŋgay dale ge na ne.
30Dulwak eya se a halas ge duur ne ne,
amma yil a sabayso ge ne ɗar kal ne.
31Ndu ge ne ke ndu a̰se yál sal bage ne dó na,
ndu ge ne hon ndu ge woɗegeya hormo hon na hormo.
32Sone ge ndu ge sone ne mbo ban na,
ko siya zi, ndu ge dosol kat da ne jobreya.
33Zwama ka swaga ya naa ge ɗalla ma dulwak zi,
A da ne pool ɓol na naa ge daal ma buwal zi ɗaa?
34Dosol kerra her suwal pala digi,
Sone kerra cwage suwal pala se.
35Kwa a̰se ge gan ne da ne dore ge ɗalla ma pe,
Juliliya ge na ne da ne nama ge ne ke na saaso ma pe.
Currently Selected:
Fare sḭ ma 14: FGN2013
Highlight
Share
Compare
Copy
Want to have your highlights saved across all your devices? Sign up or sign in
La Bible en langue Kim © Alliance Biblique du Tchad, 2013.
