Fare sḭ ma 12
12
1Ndu ge na laar ne wa̰ mḛreya, na laar wa̰ fare kwarra,
ndu ge ne kuri yuwaleya, a ndu ge dale ne.
2Ndu ge kwaɗa Bage ɗiŋnedin laar wan na wan,
amma ndu ge boge naa, kun sarya na pal.
3Ndu ne pool ɗur na swaga katɗa pe se ne sone kerra to,
naa ge dosol ma pe mbugi digi to bat.
4Gwale ge hormo a balme ge na obe ne ne,
na ge ne hon naa saaso a dimma ne sabayso go na obe kal wak zi.
5Dwatɗa ge naa ge dosol ma ne a ke kaŋ ge jwap,
dwatɗa ge naa ge sone ma ne a boge naa ɗeŋgo.
6Fare janna ge naa ge sone ma ne a kaŋ hun siya ne,
amma fare janna ge naa ge dosol ma ne ma̰ nama ma̰.
7swaga ge naa ge sone ma ne det, nama a̰me gá to,
yàl ge naa ge dosol ma ne pe mḛ digi pejeŋ.
8A uware naa ge ne jan fare ɗalla ma,
a sen naa ge ka̰l ya̰l ma sen.
9Golgo a ndil mo kaŋ senna mo kat ne mo̰r ɗu,
ge mo ka uware mo pala, kaŋzam ge zam mo wak zi kat to.
10Ndu ge dosol kwa na kavaar ma walla kwa,
amma naa ge sone ma dwat yál ke nama ɗeŋgo.
11Ndu ge ne gar na gaaso mbo ɓol kaŋzam,
ndu ge ne ka ne fare ge yak ma pe, na pala ne zi to.
12Ndu ge sone ke ene ne kaŋ ge naa ge sone ma ne ɓol,
a kaŋ kerra ge naa ge dosol ma ne zam zḛ ne.
13Fare janna ge ndu ge sone ne wan na ne fare ne,
ndu ge dosol iyan ne yál zi uzi.
14Ndu da ne pool ɓol wak zamma ne na fare janna ma
dimma ne temel kerra ne hon naa wak zamma go.
15Ndu ge dale ndil kaŋ kerra ge na ne ma na ndwara zi kwaɗa,
ndu ge ne za̰ yuwaleya a ndu ge zwama ne.
16Ndu ge dale ame pore avun cap,
ndu ge zwama uɗi saaso uɗi.
17Ndu ge ne jan fare ge fareba ben fareba pe zum,
ndu ge ne ke sayda ge hale mbuɗi naa.
18Ndu ge ne sot na wak se yayak twa̰se naa twa̰se,
amma ndu ge ne jan fare ɗalla, má naa má.
19Fare ge fareba a mḛya ɗiŋnedin,
amma ndu ge hale a dimma ne ndwara barra baŋ go.
20Naa ge ne dwat ke sone ma nama dulwak wi da ne sone,
Amma naa ge ne yuwale naa kat swaga kwaɗa ma da ne laar saal.
21Yál a̰me ɓol ndu ge dosol to,
amma naa ge ya̰l ma ɓol yál gḛ ge be to.
22Bage ɗiŋnedin sen naa ge hale ma sen,
amma na laar wa̰ naa ge ne jan fare ge fareba ma.
23Ndu ge zwama woy kwarra ge na ne woy,
ndu ge dale oy dale ge na ne digi.
24Tok ge ke temel ke muluk naa pal,
tok ge iyalam lapcak hat tene mo̰r.
25Dwatɗa e ndu duur suya leɗet,
amma fare janna ge kwaɗa e na ke laar saal.
26ndu ge dosol wan na kon viya̰
viya̰ ge naa ge sone ma ne ya̰me naa ya̰me.
27Ndu ge sḛ iyalam day swar na nii to,
A kwaɗa ndu sḛ kat fogor.
28Ndwara ya viya̰ pul ge dosol ne go,
ndu ge ne her viya̰ mbe det siya zi to.
Currently Selected:
Fare sḭ ma 12: FGN2013
Highlight
Share
Compare
Copy
Want to have your highlights saved across all your devices? Sign up or sign in
La Bible en langue Kim © Alliance Biblique du Tchad, 2013.
