Fare sḭ ma 1
1
Fare ná ge maktub fare sḭ ne
1Fare sḭ ma ge Salomon ge Dawda vya, gan ge suwal Israyela ne#1Gan 5:9-14.. 2Fare sḭ mbe ma no da ne hon zwama ma, ne yuwaleya pe. E ndu kwa fare ma pe 3Da ne hon yuwaleya ndwara det ya katɗa ge jwap go pe. 4Hon naa ge ne kwarra jwap to ma fare kwarra, hon bool ma fare kwarra ma ne kwar fare ma buwal varseya. 5Ya̰ ndu ge zwama na za̰ fare mbe ma, na zwama ba don zḛ, ndu ge ɗalla ba ɓol zwama ge ɗame tene me. 6Ndwara wan fare sḭ ma, ne fare ge ɗimil ma, ne fare ge mbidgil ma pe. 7Sya Bage ɗiŋnedin vo, a pe eya ge zwama ne ne. A naa ge dale ma sen zwama ma ne yuwaleya ma ne ɗeŋgo#2:5, 9:10, 15:33, Ayu 28:28, Kmb 111:10..
Koy tene ne kaam vya ge sone ma ta
8Mbi vya, za̰ yuwaleya ge mo bá ne,
sḛ hateya ge mo ná ne to.
9Mbo kat balme ge siŋli ne mo pe,
ne bayir mo ka̰l zi.
10Mbi vya, kadɗa mo kaam vya ma ɓyare gene mo sone zi,
kuri uzi,
11Kadɗa a jan mo ya go: «Mbo ya, nee mbo fiiri viya̰,
nee mbo hun naa viya̰ go baŋ ɗar.
12Nee wa̰ naa ne ndwara, nee ba hun nama,
nee teme nama mbo taal ge siya ma ne se
ne mo jo̰ nee siya ma ne ne go.
13Nee mbo ɓol kaŋ kwaɗa ma pe hini hini,
nee mbo wi nee zok ma ne kaŋ paal ma.
14Mbo ya mo ma̰ ɓol mo ne ndwara,
nee e nee kaŋ ma dagre»
15Mbi vya, mbo swaga dagre ne nama to,
abe tene uzi ne nama koo pul go.
16Ago nama koo her nama pe go fogor swaga mbo ke sone go,
a har ta mbo kan swama se.
17Swaga ge njoole ne kwa mo ya,
a golgo mo gwan hul faɗe ne na pe to.
18Ago nama sḛ ma hul faɗe ta pal,
kaŋ ge a ne ke gwan nama pal.
19Pe aya ge ndu ge na laar ne wa̰ bware no:
Bware ban na bá ban.
Tolla ge zwama ne
20Zwama oy ya viya̰ ma go,
ndage na ka̰l oyya ya buwal pe ma go.
21Oy swaga ya viya̰ ga̰a̰r ge naa ne kote ne go,
ge viya̰ wak pala zum ka ndage na ka̰l jan na fare.
22Aŋ ge kwa fare jwap to ma, aŋ kat aŋ fare kwarra jwap to be zi ɗiŋ ma swaga go ɗaa?
Aŋ ge besere fare ma, aŋ kat aŋ fare besereya mbe zi ɗiŋ ma swaga go ɗaa?
Dale ma, aŋ kuri be ge ɓyare fare kwarra pe to ɗiŋ ma swaga go ɗaa?
23Gwa̰ me aŋ pala mbi mḛreya ma pe se,
mbi mbo kan mbi o̰yom aŋ pal,
mbi mbo e aŋ kwa mbi fare ma me.
24Ne jo̰ mbi tó aŋ, aŋ kuri uzi ya,
mbi ɓyare kote aŋ ya mbi ta zi, aŋ be za̰ mbi to.
25Ne jo̰, aŋ kuri yuwaleya ge mbi ne ma uzi pet,
aŋ be vin mbi mḛreya ma to,
26mbi me, swaga ge yál ne mbo ɓol aŋ ya, mbi mbo man aŋ,
swaga ge vo ne mbo wan aŋ ya, mbi mbo cot aŋ.
27Swaga ge vo ne mbo ɗage ya labre aŋ dimma ne saam labreya go,
swaga ge yál ne mbo detɗa aŋ pal dimma ne mandal go,
swaga ge iigiya ma ne kḭḭmi ne mbo wan aŋ ya,
28swaga mbe go, aŋ mbo tol mbi, mbi mbo vin aŋ to bat,
aŋ mbo ɓyare mbi pe, aŋ mbo ɓol mbi to bat#Irm 11:11, Mik 3:4, Yoh 7:34..
29Ne jo̰ a sḛ fare kwarra sen,
a be tal sya Bage ɗiŋnedin vo to,
30ne jo̰, aŋ kuri yuwaleya ge mbi ne ma,
aŋ sḛ́ mbi mḛreya ma no,
31aŋ mbo ɓol potɗa ge wak za̰ya to ge aŋ ne,
dwatɗa ge aŋ ne ma mbo mbyat aŋ sḛ.
32A wak za̰ya to ge naa ge kwa fare jwap to ma ne hun nama ne,
a dwatɗa to ge naa ge daal ma ne burmi nama pe ne.
33Amma ndu ge ne za̰ mbi wak, kat swaga halas,
sya yál vo to.
Currently Selected:
Fare sḭ ma 1: FGN2013
Highlight
Share
Compare
Copy
Want to have your highlights saved across all your devices? Sign up or sign in
La Bible en langue Kim © Alliance Biblique du Tchad, 2013.
